قىزىلجار تۇرعىندارى كوپتەن كۇتكەن قۋانىشقا كەنەلدى. سالىنعانىنا جارتى عاسىردان ارتىق ۋاقىت وتسە دە كۇردەلى جوندەۋ كورمەگەن ەسكى ۆوكزال قايتا جاڭعىرتىلىپ, وسى زامانعا لايىق كورىنىسپەن جاڭادان اشىلدى. ەندى قالا تۇرعىندارى مەن قوناقتارى ءححى عاسىرعا لايىقتى جاڭا ۆوكزالدىڭ قىزمەتىن پايدالاناتىن بولادى.
حالىق اراسىندا «اكۆاريۋم» دەگەن اتاق العان شىنىدان قاپتالعان ەسكى ۆوكزالدىڭ سىرتقى ءسانى كەلىستى بولعانىمەن ءىشى جولاۋشىلارعا تىم قولايسىز ەدى. ودان ەكىنشى, ءۇشىنشى جانە ءتورتىنشى تەمىر جول پەرروندارىنا شىعۋ ءۇشىن ۆوكزالدىڭ ىشىمەن ءۇش قاباتتى ءۇيدىڭ بيىكتىگىنە كوتەرىلۋگە تۋرا كەلەتىن. ۆوكزالدىڭ ەكى قاناتىنداعى باسقىشتاردىڭ تارلىعى سونداي, وندا قارسى جولىققان ەكى ادام جۇكتەرىمەن زورعا سىيىسىپ وتەتىن. بۇل «قاپ تاسيتىن» قيىن زاماننىڭ ۋاقىتىندا جولاۋشىلارعا ءتىپتى قيىن ءتيدى. شارشاپ, شالدىققان حالىقتىڭ اششى داۋىستارى دا ءجيى شىعىپ جاتاتىن. ال پەرروندارعا ءتۇسۋ ءۇشىن جوعارىدان تەمىر باسپالداقتارمەن قۇلديلاۋعا تۋرا كەلەتىن. قىستىڭ قاتتى ايازدارىندا تەمىر تاعاندارعا مۇز قاتىپ, ولار بارىنشا تايعاناق بولاتىن ەدى. ودان تايىپ, تالاي ادام جاراقات تا العان.
ەندى سونىڭ ءبارى ارتتا قالىپ, قىزىلجاردا مۇلدە جاڭا ۆوكزال اشىلىپ وتىر. ونداعى كۇتۋ زالىنداعى ورىندار بۇرىنعى 300-دەن ەكى ەسە ارتىپ, 600-گە دەيىن ارتتىرىلعان. زالدىڭ ءوزى دە بۇرىنعىدان 800 شارشى مەترگە كەڭەيتىلگەن. جولاۋشىلاردىڭ جۇكتەرىمەن جوعارى كوتەرىلۋىنە ىڭعايلى بولۋ ءۇشىن ليفتىلەر مەن ەسكالاتورلار ورناتىلعان.
ۆوكزالدى قايتا جاراقتاۋ مىندەتىن رەسەيدىڭ تەمىر جول كومپانياسى (رجد) ءوز مىندەتىنە العان. ويتكەنى, بۇل جەردەگى تەمىر جول 1992 جىلعى ەكىجاقتى كەلىسىم بويىنشا رەسەي فەدەراتسياسىنىڭ مەنشىگىنە بەرىلگەن. سوندىقتان «پەتروپاۆلوۆسك ستانساسى» دەپ اتالاتىن ۆوكزال دا سولاردىڭ مەنشىگىندە.
وسى ۆوكزالدى قايتا جاراقتاۋعا قازاقستاننىڭ جەرگىلىكتى بيلىگى وسىدان ءۇش جىل بۇرىن رجد كومپانياسىمەن كەلىسسوزدەر جۇرگىزگەن ەدى. سودان بەرى كومپانيا قۇرىلىس جۇمىستارىن جۇرگىزىپ, ۆوكزالدى قايتادان جاراقتاپ شىقتى. ال قازاقستان تاراپى ۆوكزالدىڭ الدىن قايتا جاڭعىرتىپ, كەلگەن قوناقتار كوز المايتىنداي عاجاپ ساۋلەت جاسادى.
مىنە, جاڭا دەپ ايتۋعا تولىق نەگىزى بار ۆوكزال عيماراتىنىڭ اشىلۋ سالتاناتىنا وبلىس اكىمى قۇمار اقساقالوۆ قاتىستى. ال رەسەي تاراپىنان رجد وكىلى, وڭتۇستىك-ورال تەمىر جول (ووتج) باسقارماسىنىڭ باستىعى اناتولي حرامتسوۆ بولدى. ءوز سوزىندە وبلىس اكىمى ق.اقساقالوۆ: «رەسەي مەن قازاقستان اراسىنداعى تىعىز ىنتىماقتاستىق ارقىلى «رەسەي تەمىرجولدارى» كومپانياسى اۋقىمدى قايتا قۇرۋدى جۇزەگە اسىردى. بۇگىن بىرلەسكەن جۇمىسىمىزدىڭ جەمىسىن كورىپ وتىرمىز. بۇل ۆوكزالدىڭ 1966 جىلى سالىنعاننان بەرگى جارتى عاسىرداعى العاشقى تۇبەگەيلى قايتا جوندەلۋى. ەسكى ۆوكزالدان تەك قابىرعالار عانا قالدى. جاڭعىرتىلۋ بارىسىندا بارىنشا جەتىلدىرىلگەن تەحنولوگيالار قولدانىلدى. ەندى ۇلكەن سومكەلەرمەن باسپالداقپەن كوتەرىلۋدىڭ قاجەتى جوق. قازىر ءبىزدىڭ ەلىمىزدەگى ەڭ كونە ۆوكزالداردىڭ ءبىرى ەڭ ادەمىسىنە اينالدى. قازاقستانداعى ەڭ ادەمى تەمىر جول ۆوكزالدارىنىڭ ءبىرى بىزدە ورنالاسقانىنا ءبارىمىز دە قۋانىشتىمىز», دەدى.
ۆوكزالدى جاڭعىرتۋعا ووتج 3 ملرد تەڭگەدەي قاراجات قۇيدى. وندا جولاۋشىلارعا بارلىق جاعداي جاسالعان. زاماناۋي ساقتاۋ كامەرالارى مەن ەلەكتروندى كەزەك تە ورناتىلعان. ءسويتىپ جاڭا, 2021 جىل سولتۇستىكقازاقستاندىقتار ءۇشىن جاڭا ۆوكزالمەن باستالدى.
سولتۇستىك قازاقستان وبلىسى