تۇركىستان قالاسىنداعى 7 قاباتتى 10 تۇرعىن ءۇيدىڭ توبەسى بالالارعا ارنالعان ويىن الاڭىنا اينالادى. بۇل جوبا ارنايى مەملەكەتتىك ساراپتامادان ءوتىپ, ماقۇلدانعان. وبلىس اكىمى ومىرزاق شوكەەۆ ويىن الاڭشالارىنىڭ ەڭ ساپالى قۇرىلىس ماتەريالدارىنان سالىنىپ, قاۋىپسىزدىكتىڭ قاتاڭ ساقتالۋىن مىندەتتەدى.
سونداي-اق وبلىس اكىمى جاۋاپتى باسقارما باسشىلارىمەن بىرگە اكىمشىلىك-ىسكەرلىك ورتالىقتا سالىنىپ جاتقان 7,9 جانە 12 قاباتتى جالپى 89 تۇرعىن ءۇيدىڭ قۇرىلىس الاڭىندا بولدى. جەتى قاباتتى 7 ءۇيدىڭ قۇرىلىس-مونتاج جۇمىستارى اياقتالىپ, بانك ارقىلى بەرىلگەن. ال 24 تۇرعىن ءۇيدىڭ اۋماعىنا سۋ, گاز, ەلەكتر قۋاتى, كارىز جۇيەسىمەن جابدىقتاۋ, اباتتاندىرۋ جۇمىستارى جۇرگىزىلۋدە. باسىم بولىگىندە ارنايى جەراستى اۆتوتۇراقتار بولادى.
«ازىرەت سۇلتان مۇراجاي-قورىعىنىڭ» اۋماعى دا اباتتاندىرىلۋدا. بوتانيكالىق باق, ەكى بىردەي اللەيا, دەكوراتيۆتى توعان قۇرىلىسى قارقىندى جۇرۋدە. جوسپار بويىنشا مۇندا مىڭعا جۋىق, ونىڭ ىشىندە گەرمانيا جانە بەلگيا ەلدەرىنەن ارنايى اكەلىنگەن كوشەتتەر, وزبەكستاننان ساتىپ الىنعان تۇت, قاراعاي, شيە, الما, كاشتان اعاشتارى وتىرعىزىلادى. سونداي-اق 18 مىڭ بۇتالار مەن گەرمانيادان ساتىپ الىنعان 14 مىڭ لاندشافتى جانە الپينيستىك راۋشان گۇلدەرى مەن سۋ لالاگۇلدەرى ەگىلەدى. توپىراقتى قۇنارلاندىرۋ ءۇشىن سالا ماماندارى كەشەندى جۇمىستار جۇرگىزۋدە. ساياباقتار جارىقتاندىرىلىپ, تاستار توسەلىپ, كەسەنە اۋماعى وازيسكە اينالادى.
تۇركىستان وبلىسى