تۇركىستان وبلىسىندا الداعى مەرەكەلىك كۇندەرى حالىقتىڭ شوعىرلانۋىنا تىيىم سالىنىپ, وڭىردە جاپپاي رەيدتىك ءىس-شارالار وتەدى, دەپ حابارلايدى Egemen.kz.
وبلىس اكىمى ومىرزاق شوكەەۆ اپتالىق اپپارات وتىرىسىندا كوروناۆيرۋستىڭ تارالۋىنا جول بەرمەۋ ءۇشىن وڭىردە كارانتيندىك شەكتەۋ شارالارىن كۇشەيتۋدى تاپسىردى.
مەرەكە كۇندەرى تۇركىستان وبلىسى پوليتسيا دەپارتامەنتىنىڭ جەكە قۇرامى كۇشەيتىلگەن كۇن تارتىبىندە قىزمەت اتقارادى. ازاماتاردىڭ جاپپاي جينالۋ ورىندارىندا پوليتسيا جاساقشىلارىنىڭ تىعىزدىلىعى كۇشەيتىلدى. قوعامدىق ءتارتىپ پەن جول قاۋىپسىزدىگىن قامتاماسىز ەتۋ ماقساتىندا 635 قىزمەتكەر 69 ارنايى اۆتوكولىك جۇمىلدىرىلىپ, ورنالاستىرۋ جوسپارىمەن بەكىتىلىپ, قىزمەت اتقارادى.
ءبىر اپتا ىشىندە وبلىستا COVID-19 ينفەكتسياسىن جۇقتىرعان 59 ادام تىركەلدى. سوڭعى تاۋلىكتە وبلىس اۋماعىندا قاۋىپتى ىندەت جۇقتىرعان 16 ادام انىقتالعان. ولاردىڭ باسىم بولىگى شەكارا اسىپ, الىس جولدان كەلگەندەر. سىرقاتتانعانداردىڭ اراسىندا جيىن-تويلاردان جۇقتىرعاندار كوپ. وڭىردە كوروناۆيرۋس ينفەكتسياسىنا شالدىققانداردىڭ ارتۋ قاۋپى دە جوق ەمەس. وسى ورايدا الداعى اقپان – ماۋسىم ايلارىندا وبلىستى 180 مىڭ دوزا «سپۋتنيك-V» ۆاكتسيناسىمەن قامتاماسىز ەتۋ جوسپارلانىپ وتىر.