بۇگىنگى تاڭدا م.قوزىباەۆ اتىنداعى سولتۇستىك قازاقستان ۋنيۆەرسيتەتىندە «سەرپىن» باعدارلاماسى بويىنشا 836 ستۋدەنت وقىپ جاتىر. ونىڭ ىشىندە بيىلعى وقۋ جىلىندا تۇسكەندەر سانى – 90 ادام. جامان ىندەتتىڭ كەسىرىنەن وسى جىلى «سەرپىندىكتەردىڭ» سانى ازايىپ قالدى. بىلتىر تۇسكەندەردىڭ سانى 240 بولعان ەدى. قازىر «سەرپىندىكتەردىڭ» ەڭ كوبى ءۇشىنشى كۋرستا وقيدى, ولاردىڭ سانى – 343. ال ءتورتىنشى كۋرستا وقيتىندار سانى – 240 ستۋدەنت. بۇلاردىڭ سانى تۇسكەندە كوپ ەدى, بىراق ءتۇرلى سەبەپتەرمەن ءبىراز ستۋدەنت وقۋدان شىعىپ كەتكەن.
«سەرپىندىكتەر» نەگىزىنەن پەداگوگ-عالىمدار, اقپاراتتىق تەحنولوگيالار, قۇرىلىس ينجەنەرلەرى جانە اۋىل شارۋاشىلىعى ماماندىعى سياقتى 35 ءبىلىم بەرۋ باعدارلاماسى بويىنشا وقىپ جاتىر. جاستار سەرگەك, اڭگىمەلەسىپ, پىكىر الماسىپ, بەلسەندىلىك كورسەتىپ تۇرادى. ولاردىڭ 60 پايىزعا جۋىعى – تۇركىستان وبلىسىنان كەلگەن جاستار. سونىمەن قاتار 61 جاس – قىزىلوردا وبلىسىنىڭ تۋماسى, 42-ءسى – الماتى وبلىسىنان كەلگەندەر. جامبىل مەن ماڭعىستاۋ وبلىسىنىڭ ارقايسىسىنان 14 جاستان وقىپ جاتىر.
«سەرپىندىكتەردىڭ» سولتۇستىككە العاشقى قادامى 2014 جىلى باستالعان. سول جىلى تۇسكەندەردەن 2018 جىلى 127 جاس ۋنيۆەرسيتەتتى 10 ماماندىق بويىنشا ءبىتىرىپ, ديپلوم العان. «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ دەرەكتەرى بويىنشا بۇگىنگى تاڭدا ولاردىڭ 101-ءى ەڭبەك ەتىپ ءجۇر. وسى جاستىڭ ءبارى ءتۇرلى قىزمەت ىستەپ, زەينەتاقى قورىنا اۋدارىم جاسايدى ەكەن.
2019 جىلى 11 پەداگوگيكالىق جانە 6 تەحنيكالىق ماماندىق بويىنشا 245 «سەرپىندىك» ستۋدەنت ديپلوم العان. قازىر ولاردىڭ ىشىنەن 162-ءسى ءتۇرلى قىزمەت اتقارىپ ءجۇر. قالعاندارى ناقتى جۇمىسقا تۇرماعان. ال ماگيستراتۋراعا تۇسكەن 22 تۇلەكتىڭ 10-ى سولتۇستىك قازاقستان ۋنيۆەرسيتەتىندە وقيدى.
بيىل ۋنيۆەرسيتەت قابىرعاسىن 203 «سەرپىندىك» تۇلەك ءبىتىردى, سونىڭ 42-ءسى سولتۇستىك قازاقستان وبلىسىندا ءتۇرلى جۇمىستارعا ورنالاستىرىلدى. ال 10-ى قىزىلجار قالاسىنىڭ وزىنە جۇمىسقا تۇردى. بيىلعى ۋنيۆەرسيتەت بىتىرگەن جاستاردىڭ وقۋعا ىنتاسى زور بولعاندىعىن ولاردىڭ اراسىنان 92 ادامنىڭ ماگيستراتۋراعا تۇسكەنىنەن-اق بايقاۋعا بولادى.
كارانتيننىڭ كەسىرىنەن «سەرپىندىك» جاستاردىڭ جەرگىلىكتى حالىقپەن, اقساقالدار ۇيىمىمەن, اقىن-جازۋشىلارمەن كەزدەسۋلەرى, ونەرلى جاستارمەن ارالاسۋلارى تىم سيرەك. بىراق بەلسەندى جاستار ۋنيۆەرسيتەت پەن قالا ءومىرىنىڭ مادەني شارالارىنا قاتىسىپ وتىرادى. ماسەلەن, ارۋاي ايتبەكوۆا ستۋدەنت جاستار اراسىنداعى ايتىسقا قاتىسىپ, جۇلدەلى ورىن العان. روزا قابىل دەگەن قىز بالا دا ماعجان جۇماباەۆتىڭ 125 جىلدىعىنا ارنالعان كونكۋرسقا قاتىسىپ, جۇلدەگەر بولىپتى.
«سەرپىندىك» جاستار اراسىنداعى ءتارتىپ, مادەني تاربيە ماسەلەلەرىنە كوپ كوڭىل بولىنەدى. ۋنيۆەرسيتەتتىڭ وسى جۇمىستارى مىندەتىنە جۇكتەلگەن پرورەكتور نۇرلان بايىمبەتوۆ ءتۇرلى باعدارلامالىق شارالار ۇيىمداستىرادى. ماسەلەن, سولتۇستىك قازاقستان جاستارىنىڭ باستاماشىلىق ورتالىعىنىڭ كوشباسشىلارىن مۇندا ءجيى شاقىرىپ, جاستارمەن كەزدەسۋلەر وتكىزەدى. سونىمەن قاتار ءدىن ىستەرى جونىندەگى ءبولىمنىڭ قىزمەتكەرلەرى, سىبايلاس جەمقورلىققا قارسى ءىس-قيمىل دەپارتامەنتىنىڭ ماماندارى دا مۇندا كەلىپ, اڭگىمەلەسىپ تۇرادى. مەرەكەلىك كونتسەرتتەر مەن كونكۋرستار دا ۇيىمداستىرىلادى. ماسەلەن, جۋىردا تاۋەلسىزدىك كۇنىنە وراي جاستار اراسىندا پاتريوتتىق اندەردىڭ كونكۋرسى بولعان. وسىنداي شارالارعا سىمبات سەيىتقاسىموۆا, وڭعار جانتورە, اقمارال ساتتار, سارا سارسەمباي, باقداۋلەت سامات ۇلى, دانيار ابدراسۋللا جانە باسقا دا بەلسەندىلەر قاتىسىپ, ءتۇرلى شارانىڭ باسى-قاسىندا ءجۇردى.
ءومىر بولعان سوڭ ادامنىڭ جەكە باسىنداعى وزگەرىستەردىڭ بولۋى دا زاڭدىلىق. قازىر مۇنداعى «سەرپىندىك» جاستار اراسىندا 13 جۇپ وتاۋ تىككەن. ستۋدەنتتىك جىلداردا وتباسىن قۇرىپ, ءۇي بولىپ كەتكەندەردىڭ الدى دا, سوڭى دا بۇلار ەمەس. سوندىقتان ۋنيۆەرسيتەت اكىمشىلىگى ولاردىڭ جاعدايلارىنا تۇسىنىستىكپەن قاراپ, قولدان كەلگەن كومەكتەرىن جاساپ تۇرادى.
ەڭ باستىسى, ازاماتتاردىڭ سولتۇستىكتى جەرسىنىپ, وسىندا تامىر جايىپ كەتۋى. بىزبەن كەزدەسكەن جاستار وزدەرىنە تەرىستىكتىڭ ۇنايتىنىن جەتكىزدى. ماماندىق العان سوڭ ءوز باقىتىمدى وسى جەردىڭ توپىراعىنان تابۋعا تىرىسامىن دەگەن جاستار كوپ بولدى.
سولتۇستىك قازاقستان وبلىسى