الماتى وبلىسىنىڭ تالعار اۋداندىق سوتى Bek Air اق-نىڭ جاۋاپكەر رەشەت قالىبەك پەن ءۇشىنشى تۇلعالارعا قاتىستى ارىزىن قاراۋسىز قالدىردى. سوتتىڭ قاۋلىسى زاڭدى كۇشىنە ەنبەدى, دەپ حابارلايدى Egemen.kz
ءىستى جۇرگىزۋ بارىسىندا Bek Air اق-نىڭ جاۋاپكەر رەشەت قالىبەككە جانە ءۇشىنشى تۇلعالارعا: "تالعار اۋدانىنىڭ جەر قاتىناستارى ءبولىمى" مەملەكەتتىك مەكەمەسىنە, تالعار اۋدانىنىڭ ساۋلەت جانە قالا قۇرىلىسى بولىمىنە, تالعار اۋدانىنىڭ ادىلەت باسقارماسىنا, تالعار اۋدانىنىڭ قۇرىلىس بولىمىنە قاتىستى ارىزى بويىنشا ازاماتتىق ءىستى قارادى. تۇرعىن ءۇيدى ءوز بەتىمەن سالۋ – "قازاقستاننىڭ ساۋلەت-قۇرىلىس قىزمەتى" تۋرالى زاڭ تالاپتارىن بۇزىپ سالىنعان ۇيگە قاتىستى ارىز بويىنشا. سوت Bek Air اق-نىڭ جاۋاپكەر رەشەت قالىبەك پەن ءۇشىنشى تۇلعالارعا قاتىستى ارىزىن قاراۋسىز قالدىردى. سوتتىڭ قاۋلىسى زاڭدى كۇشىنە ەنبەدى", دەدى سۋديا قارلىعاش ەسالينوۆا.
سۋديا ارىزدى قاراۋسىز قالدىرۋ تۋرالى شەشىمنىڭ سەبەبىن دە ايتىپ ءوتتى.
"باس كولىك پروكۋراتۋراسىنىڭ تالعار اۋداندىق سوتىنىڭ ساۋالىنا بەرگەن جاۋابىنا سايكەس, جوعارىدا اتالعان قىلمىستىق ءىس بويىنشا پروتسەسسۋالدىق شەشىم قابىلدانباعان, كىنالى ادامدار انىقتالماعان, ايىپ تاعىلماعان, Bek Air اق-نىڭ پروتسەسسۋالدىق جاعدايى بەلگىلەنبەگەن. وسىعان بايلانىستى ازاماتتىق پروتسەستىك كودەكستىڭ 279-بابى 1-تارماقشاسىنىڭ نەگىزىندە, ەگەر تالاپكەر وسى ساناتتاعى ىستەر ءۇشىن زاڭنامادا بەلگىلەنگەن داۋدى سوتقا دەيىن رەتتەۋ ءتارتىبىن نەمەسە كەلىسىمشارتتا كوزدەلگەن داۋدى سوتقا دەيىن رەتتەۋ ءتارتىبىن ساقتاماسا جانە بۇل ءتارتىپتى قولدانۋ مۇمكىندىگى جوعالماسا, وندا سوت ارىزدى قاراۋسىز قالدىرىلادى", دەدى سۋديا.
ەسكە سالا كەتەيىك, Bek Air ۇشاعى بىلتىر 27 جەلتوقساندا تاڭعى ۋاقىتتا اپاتقا ۇشىراپ, بارشا قازاقستاندىقتارىن جۇرەگى قامىققان ەدى. لاينەر الماتىدان نۇر-سۇلتانعا ۇشىپ شىققان بەتتە قۇلديلاپ, اۋەجاي قورشاۋىنان اسىپ, ۇيگە سوعىلدى. ۇشاق بورتىندا 93 جولاۋشى مەن ەكيپاجدىڭ 5 مۇشەسى بولعان. اپات سالدارىنان 12 ادام قازا تاپقان.