پەتروپاۆلداعى مەكتەپ-گيمنازياعا حاكىم ابايدىڭ ەسىمى بەرىلدى

اباي اتىنداعى قازاق مەكتەپ-گيمنازياسى 2007 جىلى بوي كوتەردى. 1100 بالاعا شاقتالعان ءبىلىم ورداسىندا بۇگىندە 1046 وقۋشى وقيدى. سونىمەن بىرگە دايارلىق سىنىپتارىمەن قاتار, 50 بالاعا شاقتالعان شاعىن ورتالىق جۇمىس ىستەيدى. مەكتەپكە اباي ەسىمىنىڭ بەرىلۋىنە بايلانىستى وقۋ باعدارلاماسىنا دا ءبىراز وزگەرىس ەنگىزىلەدى.

اباي اتىنداعى قازاق مەكتەپ-گيمنازياسىنىڭ ديرەكتورى بۇلبۇل احماديقىزى: ء"بىز بۇل حاباردى ءبىر جىلعا تارتا كۇتتىك. پاندەمياعا بايلانىستى سوزىلىپ كەتتى. رەسپۋبليكاداعى اباي مەكتەپتەرىنىڭ جەلىسىنە كىرىپ وتىرعان 17-ءشى مەكتەپپىز. اباي ەسىمىنىڭ بەرىلۋى بىزگە زور جاۋاپكەرشىلىك ارتادى. ارينە, قازاق ءتىلى مەن ادەبيەتىن تەرەڭدەتە وقىتاتىن بولامىز. قازىر بۇل پاندەرگە اپتاسىنا 3 ساعات قانا بەرىلسە, ونى جاڭا وقۋ جىلىندا ەكى ەسە ارتتىرامىز", دەيدى ول.

بيىل ءساۋىر ايىندا مەكتەپ قابىرعاسىندا اباي ورتالىعى اشىلدى. ول 6 بولىمنەن تۇرادى. مۇندا قازاقتىڭ مادەنيەتىن دارىپتەيتىن مۋزەي اشىلعان. ورتالىقتا ماماندار دارىندى بالالارمەن جۇمىس ىستەيدى. سونداي-اق, QR-كودى بار ارنايى ستەند ارقىلى ەلىمىزدەگى اباي مۇراجايلارىمەن تانىسۋعا بولادى. سقو ءبىلىم باسقارماسىنىڭ مالىمەتىنشە, بيىل وڭىردە تاعى ەكى مەكتەپتىڭ اتاۋى وزگەردى. بۋلاەۆ قالاسىنداعى №4 ورتا مەكتەپكە ماعجان جۇماباەۆتىڭ ەسىمى بەرىلسە, جامبىل اۋدانى پرەسنوۆكا ەلدىمەكەنىندەگى جالپى ءبىلىم بەرەتىن ورتا مەكتەپ ەندى قوجابەرگەن جىراۋ ەسىمىمەن اتالادى.