ەلباسى ۇكىمەتتىڭ كەڭەيتىلگەن وتىرىسىندا شەنەۋنىكتەر قىزمەت بابىن اسىرا پايدالانىپ, مەملەكەتتىك باعدارلامالار بويىنشا بولىنەتىن قاراجاتتى قىمقىرىپ قالۋ فاكتىلەرىن وتكىر سىنعا العانى ءمالىم.
الماتى وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس (قارجى پوليتسياسى) دەپارتامەنتىنىڭ دەرەكتەرىنە سۇيەنسەك, بيۋدجەت قاراجاتىن جىمقىرۋ فاكتىلەرى بويىنشا الماتى وبلىسىندا اعىمداعى جىلدىڭ 10 ايىندا 28 قىلمىستىق ءىس قوزعالىپتى.
ەلباسى ۇكىمەتتىڭ كەڭەيتىلگەن وتىرىسىندا شەنەۋنىكتەر قىزمەت بابىن اسىرا پايدالانىپ, مەملەكەتتىك باعدارلامالار بويىنشا بولىنەتىن قاراجاتتى قىمقىرىپ قالۋ فاكتىلەرىن وتكىر سىنعا العانى ءمالىم.
الماتى وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس (قارجى پوليتسياسى) دەپارتامەنتىنىڭ دەرەكتەرىنە سۇيەنسەك, بيۋدجەت قاراجاتىن جىمقىرۋ فاكتىلەرى بويىنشا الماتى وبلىسىندا اعىمداعى جىلدىڭ 10 ايىندا 28 قىلمىستىق ءىس قوزعالىپتى.
سالالاپ ايتساق, «اقبۇلاق» مەملەكەتتىك باعدارلاماسى بويىنشا 3 قىلمىستىق ءىس قوزعالىپ, سوتقا جولدانىپ, ونىڭ 1-ەۋىن سوت قارادى. مىسالى, اقسۋ اۋداندىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمى مەملەكەتتىك مەكەمەسىنىڭ بۇرىنعى باستىعى س.سۇلەيمەنوۆ قىزمەت بابىن اسىرا پايدالانىپ, «الەمقۇرىلىس» جشس جانسۇگىروۆ كەنتىندەگى ءار تۇرعىن ۇيگە اۋىز سۋ تارتىپ بەرۋى تۋرالى جاسالعان كەلىسىمشارتتا كورسەتىلگەن مىندەتىن تولىق ورىنداماسا دا قابىلداپ الۋ اكتىسىنە قول قويىپ, ءمور باسىپ, مەملەكەتكە 1 825 630 تەڭگە كولەمىندە زيان كەلتىرگەن.
«100 مەكتەپ, 100 اۋرۋحانا» مەملەكەتتىك باعدارلاماسى بويىنشا قاراتال اۋدانىنىڭ ويان اۋىلىندا 120 ورىندىق مەكتەپ سالۋ بارىسىندا جاسالعان قىلمىستىق ارەكەتپەن مەملەكەتكە 1,1 ملن. تەڭگە زالال كەلتىرگەنى ءۇشىن اقىلجان جانداربەكوۆتى سوت 8 جىلعا باس بوستاندىعىنان ايىرىپ, مۇلكىن تاركىلەپ, مەملەكەتكە كەلتىرىلگەن زالالدى ءبىر اي ىشىندە تولىق قايتارۋ تۋرالى تالاپ قويدى.
ەلدىڭ وزەكتى ماسەلەسىنىڭ ءبىرى – باسپانالى بولۋ. بۇل ورايدا مەملەكەتتىك باعدارلاما ءوز ماقساتىندا تولىق ورىندالمايتىنى بيىك مىنبەلەردەن ايتىلۋدا. ناقتى دەرەككە دايەكتەمە كەلتىرسەك, «قولجەتىمدى باسپانا-2020» مەملەكەتتىك باعدارلاماسى بويىنشا 2 قىلمىستىق ءىس قوزعالدى. ايدا اسىلبەكوۆا دەگەن ازاماتشا ەڭبەكشىقازاق اۋدانىنىڭ تۇرعىن ءۇي ينسپەكتسياسى ءبولىمىنىڭ جەتەكشى مامانى مىندەتىن ۋاقىتشا اتقارا ءجۇرىپ, قىزمەت بابىن پايدالانىپ, پايدا كورۋ نيەتىمەن تۇرعىن ءۇي كەزەگىندە تۇرعان ازاماتتاردىڭ سەنىمىنە كىرىپ, پاتەر الۋعا كومەك كورسەتەمىن دەگەن ۋادەمەن 75 مىڭ 810 تەڭگەنى زاڭسىز جولمەن العان. سول ءۇشىن وعان ەڭبەكشىقازاق اۋداندىق سوتى شەشىمىمەن 3 جىلعا سىناق تۇرىندەگى جازا تاعايىندالدى. كەلتىرىلگەن زالالدى تولىق قايتارۋ تۋرالى تالاپ قويىلدى.
«جۇمىسپەن قامتۋ-2020» مەملەكەتتىك باعدارلاماسى بويىنشا پانفيلوۆ اۋدانىندا 4 ملن. 700 مىڭ تەڭگەنى جىمقىرۋ فاكتىسى بويىنشا 1 قىلمىستىق ءىس وندىرىسكە ءتۇسىپ, تەرگەۋ امالدارى جۇرگىزىلۋدە», دەدى الماتى وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس (قارجى پوليتسياسى) دەپارتامەنتى باستىعىنىڭ ورىنباسارى ارمان نۇرعاليەۆ.
مەملەكەتتىك باعدارلامالاردىڭ ورىندالۋى بارىسىنداعى تاعى ءبىر كەلەڭسىزدىك – ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا قاپشاعاي قالاسىندا 2011 جىلى قارجىلاندىرۋشى «قازاگروقارجى» اق ورىنداۋشى «پروەكتنوە كومپانيا كز» جشس اراسىندا زاۋىت قۇرىلىسىن سالۋ تۋرالى كەلىسىمشارت جاسالىپ, 18 840 000 تەڭگە الدىن الا تولەنگەن. سوسىن, جوبالاۋ قۇجاتتارى جوق بولعاندىقتان, الدىن الا تولەنگەن قاراجاتتى قايتارۋعا ەش شارا جاسالماي, كەلىسىمشارت بۇزىلعان. ءسويتىپ, بيۋدجەت قاراجاتى شاشىلىپ, مەملەكەتكە جوعارىدا كورسەتىلگەن سوما كولەمىندە شىعىن كەلتىرىلگەن. قاپشاعاي قالالىق سوتىنىڭ اعىمداعى جىلدىڭ 31 مامىرىنداعى ۇكىمىمەن ايداربەك كۇرىشباەۆ پەن ايا كليم 3 جىلعا جازالانعان.
نۇربول الدىباەۆ,
«ەگەمەن قازاقستان».
الماتى وبلىسى.