ورمان شاۋاشىلىعى جانە جانۋارلار الەمىنىڭ سولتۇستىك قازاقستان اۋماقتىق ينسپەكتسياسى جانۋارلار الەمى جانە اڭ اۋلاۋ شارۋاشىلىعىنىڭ ءبولىم باسشىسى ولەگ بەسپالوۆ 28 قاراشا كۇنى جەلياكوۆو اۋىلى ماڭىنان ءوتىپ بارا جاتىپ, جولدىڭ جيەگىندە جاتقان ەكى ەلىكتىڭ ەتىن بايقايدى.
ماشيناسىن جاسىرىپ, اڭشىلاردى كۇتىپ الماق بولىپ, ۋچاسكەلىك پوليتسيا ينسپەكتورىنا قوڭىراۋ سوعادى. ول دابىل كوتەرىپ, جاقىن ماڭدا رەيدتە جۇرگەن قىزىلجار اۋدانىنىڭ پب قىزمەتكەرلەرى وقيعا ورنىنا شۇعىل جەتەدى. كوپ كەشىكپەي ەلىكتەردى اتقاندار ۋاز اۆتوموبيلىمەن كەلە قالادى. ولار بەس ادام ەكەن. جۇكسالعىشىندا تاعى ءۇش ءسىبىر ەلىگىنىڭ ەتى بولشەكتەپ سالىنىپتى. براكونەرلەردەن بارلىعى 3 مىلتىق, 16 وق-ءدارى, 2 پىشاق الىندى.
«جەدەل-تەرگەۋ توبىنىڭ جۇمىسى بارىسىندا بولشەكتەنبەگەن تاعى ءبىر جانۋاردىڭ ەتى مەن مىلتىق الىندى. اۆتوموبيل ارنايى تۇراققا قويىلدى. اتالعان فاكتى قىلمىستىق كودەكسىنىڭ «زاڭسىز اڭ اۋلاۋ» بابى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. كۇدىكتىلەرگە قاتىستى كەلۋ تۋرالى مىندەتتەمە تۇرىندەگى ماجبۇرلەۋ شاراسى قابىلداندى», - دەپ ناقتىلادى اۋداندىق پب باستىعى, پوليتسيا پولكوۆنيگى ءاليحان بايقاداموۆ.
ءسويتىپ تابيعاتتىڭ سۇلۋ اڭى ەلىكتى قۇرتپاق بولىپ ارنايى شىققان قاراجۇرەكتەر قولعا ءتۇستى.
سولتۇستىك قازاقستان وبلىسى