ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ الماتى قالاسىندا ورىن العان اعاش كەسۋ فاكتىسىنە قاتىستى پىكىر ءبىلدىردى, دەپ حابارلايدى Egemen.kz.
"كەشە ءبىز الماتىدا اعاشتاردى جابايىلىقپەن كەسۋ فاكتىسىنە كۋا بولدىق. وقيعانىڭ قوعامنىڭ اشۋىن تۋدىرۋى ورىندى. مۇنداي جاعدايلارعا جول بەرۋگە بولمايدى!"- دەپ جازدى ول Twitter پاراقشاسىندا.
مينيستر قازىر ەل بويىنشا اتموسفەرالىق اۋانىڭ احۋالىن جاقسارتۋعا باعىتتالعان ۇلكەن جۇمىستار جۇرگىزىلىپ جاتقانىن اتاپ ءوتتى.
"ەكوكودەكس قابىلدانىپ جاتىر, پرەزيدەنت 2 ملرد-تان استام اعاش ەگۋگە تاپسىرما بەردى. جۇرت بولىپ جۇمىلىپ, ءبىر ماقسات جولىندا جۇمىس ىستەپ جاتقاندا, جوعارىداعىداي جاعدايلار تىپتەن ورىنسىز",- دەدى مينيستر.
ونىڭ سوزىنشە, بيىل عانا مەملەكەت باسشىسىنىڭ تاپسىرماسىمەن اعاش كەسۋگە قاتىستى جاۋاپكەرشىلىكتى ارتتىرۋ بويىنشا زاڭعا وزگەرىستەر ەنگىزىلگەن. اتاپ ايتاق, 1 اعاش كەسىلسە, ورنىنا 10 اعاش ەگۋ وتەماقىسى ەنگىزىلىپ, ايىپپۇل كولەمى ەكى ەسە ارتقان.
"تابيعي رەسۋرستارىمىزعا ۇقىپتى قاراۋعا شاقىرامىن. ءبىر اعاش جايقالىپ ءوسۋى ءۇشىن ونداعان جىلدار كەرەك. بولاشاعىمىز ءبىزدىڭ ەكولوگيالىق مادەنيەتىمىزدىڭ دەڭگەيىنە تىكەلەي بايلانىستى", - دەپ جازدى ماعزۇم مىرزاعاليەۆ.