پاۆلودار وبلىسىنىڭ پوليتسەيلەرى ءتيىستى رۇقساتناماسى جوق ءدىني كىتاپتار ساتقان جەرگىلىكتى تۇرعىنداردى اكىمشىلىك جاۋاپكەرشىلىككە تارتتى, دەپ حابارلايدى Egemen.kz
– پاۆلودار وبلىسى ەكىباستۇز قالاسىنىڭ پوليتسەيلەرى 32 جاستاعى قالا تۇرعىنىن ۇستادى. ول ينتەرنەتتەگى سايتتاردىڭ بىرىندە ءدىني ادەبيەتتەر ساتۋ تۋرالى حابارلاندىرۋ بەرگەن. ءدىني ادەبيەتتى جانە ءدىني مازمۇنداعى وزگە دە ماتەريالداردى زاڭسىز تاراتقانى ءۇشىن ەر ادامعا قاتىستى قر اكىمشىلىك قۇقىق بۇزۋشىلىق تۋرالى كودەكسىنىڭ 490-بابىنىڭ 1-بولىگى (قازاقستان رەسپۋبليكاسىنىڭ ءدىني قىزمەت جانە ءدىني بىرلەستىكتەر تۋرالى زاڭناماسىن بۇزۋ) بويىنشا اكىمشىلىك ءىس قوزعالدى. ماتەريال شەشىم قابىلداۋ ءۇشىن سوتقا جىبەرىلدى. سونداي-اق پاۆلودار قالاسىندا 56 جاستاعى ەر ادام ينتەرنەت-رەسۋرستار ارقىلى ءدىني ادەبيەتتەر ساتۋ تۋرالى حابارلاندىرۋ بەرگەن, ەر ادامعا قاتىستى ماتەريال سوتتا قارالىپ, وعان 30 اەك كولەمىندە ايىپپۇل سالىندى, – دەدى ەكسترەميزمگە قارسى ءىس-قيمىل ءبولىمىنىڭ باستىعى جانات سلياموۆ.
پوليتسيا قىزمەتكەرلەرى ءدىني سيپاتتاعى ادەبيەتتەردى تاراتۋ جانە ساتۋ ءۇشىن ءتيىستى رۇقسات قاجەتتىلىگى تۋرالى ءتۇسىندىردى. بيىل پاۆلودار وبلىسىنىڭ پوليتسەيلەرى ءدىني قىزمەت تۋرالى زاڭنامانى بۇزۋدىڭ 16 فاكتىسىن انىقتادى, ونىڭ ىشىندە زاڭسىز ميسسيونەرلىك قىزمەت, ەكسترەميستىك ماتەريالداردى ساقتاۋ, تىركەلمەگەن ءدىني بىرلەستىك قۇرۋ جانە وعان باسشىلىق ەتۋ, ءدىني ادەبيەتتى جانە ءدىني مازمۇنداعى وزگە دە ماتەريالداردى زاڭسىز تاراتۋ فاكتىلەرى بار.