قازاقستاندا ەكستراكورپورالدى ۇرىقتاندىرۋ پروتسەدۋراسىنىڭ قولجەتىمدىلىگى ارتتى. بۇعان دەيىن كەپىلدەندىرىلگەن تەگىن مەديتسينالىق كومەك شەڭبەرىندە عانا جاسالاتىن جوعارى تەحنولوگيالىق قىزمەتتىڭ بۇل ءتۇرى بيىلدان باستاپ مىندەتتى الەۋمەتتىك مەديتسينالىق ساقتاندىرۋ پاكەتىنە ەندى. بۇل تۋرالى «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالى حابارلادى.
جاساندى ۇرىقتاندىرۋ – ۇرپاق ءوربىتۋدىڭ الەمدە كەڭ تارالعان ءارى ەڭ زاماناۋي تاسىلدەرىنىڭ ءبىرى. دۇنيە جۇزىندە 40 جىلدان بەرى پايدالانىلىپ كەلە جاتقان بۇل ءادىس قازاقستاندا 1996 جىلدان باستاپ قولدانىسقا ەنگىزىلگەن بولاتىن. بۇگىندە ەلىمىز بويىنشا ەكستراكورپورالدى ۇرىقتاندىرۋ تاسىلىمەن 22 مىڭ بالا دۇنيەگە كەلدى. الدى بۇگىندە اتا-انا اتانىپ تا ۇلگەردى. ال بەدەۋلىككە بايلانىستى تىركەۋدە تۇرعان ايەلدەر سانى 9 مىڭنان اسادى.
فيليال ديرەكتورى تىلەۋحان ابىلداەۆتىڭ ايتۋىنشا, ەكستراكورپورالدى ۇرىقتاندىرۋ باعدارلاماسى 2010 جىلدان باستاپ كەپىلدەندىرىلگەن تەگىن مەديتسينالىق كومەك پاكەتىنە ەنگىزىلىپتى. ال جىل باسىنان بەرى ەنگىزىلگەن ءمامس پاكەتى كوپشىلىكتىڭ قالتاسى كوتەرە بەرمەيتىن بۇل قىزمەتتىڭ قولجەتىمدىلىگىن ارتتىرىپ وتىر.
«2020 جىلى الماتى قالاسى بويىنشا ەكو پروتسەدۋرالارىنا 527,3 ملن تەڭگە بولىنگەن. وعان 615 ۇرىقتاندىرۋ باعدارلاماسى جاسالۋى ءتيىس. بۇگىنگە دەيىن 259 ايەل اتالعان باعدارلاماعا قاتىسىپ ۇلگەردى», دەيدى فيليال باسشىسى.
بيىل وڭتۇستىك استانا بويىنشا اتالعان باعدارلاماعا 5 مەديتسينا ۇيىمى قاتىسىپ جاتىر. ولاردىڭ ءبارى دە مەديتسينالىق ساقتاندىرۋ قورىمەن كەلىسىمشارت بەكىتكەن. اتاپ ايتقاندا «Private clinic» جشس, «اكۋشەرلىك, گينەكولوگيا جانە پەريناتولوگيا عىلىمي ورتالىعى» اق, «PERSONA» جشس, «ەكومەد» فيرماسى» جشس, «ەكو» ورتالىعى» جشس.
«ەكستراكورپورالدى ۇرىقتاندىرۋ ءادىسى – الەمدە بەلەڭ الىپ جاتقان بەدەۋلىك پروبلەماسىنا قارسى كۇرەستىڭ ەڭ ءتيىمدى تاسىلدەردىڭ ءبىرى. ول ايەلدەر مەن ەرلەردە كەزدەسەتىن بەدەۋلىكتىڭ كەز كەلگەن ءتۇرىن جەڭىپ شىعۋعا مۇمكىندىك بەرەدى. زاماناۋي رەپرودۋكتيۆتىك تەحنولوگيالار بالا سۇيۋدەن كۇدەر ۇزگەن ادامدارعا ءۇمىت سىيلايتىن كەزدەرى از ەمەس», دەيدى دارىگەر اكۋشەر-گينەكولوگ, رەپرودۋكتولوگ اناستاسيا رىبينا.
ونىڭ ايتۋىنشا, وسىنداي جانداردىڭ ءبىرى كۆوتا كەزەگىن 2 جىل كۇتكەن. وعان دەيىن بىرنەشە رەت جاسالعان ۇرىقتاندىرۋ باعدارلاماسىنان ناتيجە شىقپاپتى. وسى باعدارلاما ارقىلى بويىنا بالا بىتكەن كەلىنشەك بۇگىندە انا بولۋعا دايىندالىپ جاتىر.
ەسكە سالا كەتسەك, كۆوتا بويىنشا ەكو باعدارلاماسىنا قاتىسۋ ءۇشىن تىركەلگەن ەمحانا ارقىلى ارنايى ەسەپكە تۇرۋ قاجەت. ءتيىستى كورسەتىلىمدەر بولعان جاعدايدا دارىگەرلەر كۆوتاعا كەزەككە قويادى.