ءسىزدىڭ الدەبىر وتىرىستاردا نەمەسە كەزەكتى جيىنداردىڭ بىرىندە قايسىبىر زامانداسىڭىز تۋرالى نەمەسە قوعامداعى وتە وزەكتى ماسەلە توڭىرەگىندە ەلەۋسىز عانا ايتا سالعان ويىڭىزبەن ول ادامنىڭ ءومىرىن نەمەسە كۇن تارتىبىندە كۇيىپ تۇرعان سول ماسەلەنى تۇبەگەيلى وزگەرتىپ جىبەرۋىڭىز عاجاپ ەمەس. ارينە, ماسەلەنىڭ ءمانىسى وڭ شەشىمىن تاۋىپ, الگى بەيباقتىڭ عۇمىرى جاقسى جاعىنا ورىستەپ كەتسە, نۇر ۇستىنە نۇر عوي.
ال ەندى كەرىسىنشە ونىڭ بىرقالىپتى ىرعاقپەن باياۋ عانا ءجۇرىپ بارا جاتقان تىپ-تىنىش ءومىرىن ءسىزدىڭ الگى جالعىز اۋىز پىكىرىڭىز جارعا جىقسا قايتپەكسىز؟ ءتۇيىنى ەندى شەشىلەيىن دەپ تۇرعان ماڭىزدى ماسەلە ءسىزدىڭ الگى ايتقان بولماشى پىكىرىڭىزدەن كەيىن قايتا ۋشىعىپ كەتسە نە بولماق؟
جالپى, بۇگىن اقپارات اتقا ءمىنىپ تۇرعان الماعايىپ زاماندا اۋزىمىزدان شىققان ءار سوزگە قاراۋىل قويىپ سويلەمەسەك وتە قيىن. باياعىدا ءبىر كەلىنشەكتىڭ «ساماۋرىننان سۋ اعىپ تۇر» دەگەن ءسوزى وزىنە «سامارقاندى سۋ الىپتى» دەپ جەتىپتى. سول سياقتى ءبىر نارسەگە پىكىر ايتاردا, ويىمىزدى ون رەت ولشەپ بارىپ ورايىن كەلتىرگەن دۇرىس. ايتپەسە جازىلايىن دەپ تۇرعان جارانىڭ اۋزىن قايتا قاناتىپ جىبەرۋ ءاپ-ساتتە.
كەيدە جاقسى نيەتپەن سوزىلعان قولدا دا قاتەر بولادى. جاس كۇنىمىزدە شاتىردان قۇلاپ تۇسكەن قۇستىڭ بالاپانىنا جانىمىز اشىپ, باۋىرلارىمىزبەن بىرگە بەيشارا بالاپاندى ارقايسىمىز ءبىر ۇستاپ ءجۇرىپ ۇياسىنا اپارعانىمىز ەسىمىزدە. الايدا انامىز الگى بالاپاننىڭ ەرتەسىنە ءولىپ جاتقانىن ايتتى. قۇستىڭ بالاپانى شىن مانىندە بيىكتەن قۇلاعان اۋىر سوققىدان ەمەس, ءبىزدىڭ ماپەلەپ ۇستاعان ايالى الاقانىمىزدان ءولىپتى. سويتسەك, ادام الاقانىنىڭ ۋى قۇستىڭ بالاپانى تۇگىلى ودان زورعى تىرشىلىك يەسىن دە ءولتىرىپ جىبەرەدى ەكەن. بۇندا ارينە, قولدىڭ ۋىتى جايلى ايتىلىپ وتىر. ال ەندى, وي مەن ءسوزدىڭ ۋىتى جايلى ويلاساق, ماسەلە, ءتىپتى تەرەڭدەي تۇسەدى. كەيدە ءبىزدىڭ جاناشىر تىلەگىمىزدىڭ ءوزى وسىلاي جانىمىزداعى جاقىن جانداردى جارالاپ كەتۋى عاجاپ ەمەس. بىرەۋگە كومەكتەسەمىن دەپ كولەڭكەڭىزدى ءتۇسىرۋىڭىز مۇمكىن.تىرەۋ بولامىن دەگەن تىلەگىڭىز وعان ىرەۋمەن تەڭ ۇلكەن سوققى بولسا, سول قيىن.
عىلىمدا كوبەلەك ەففەكتى دەگەن قىزىق تەوريا بار. كەيبىر حاوستىق جۇيەلەردىڭ قاسيەتتەرىن سيپاتتايتىن جاراتىلىستانۋ عىلىمدارىندا قولدانىلاتىن بۇل تەرميننىڭ ءمانى قىزىق. اتالعان ۇعىمعا سايكەس, ءوز قالىبىمەن ءجۇرىپ جاتقان جۇيەگە تيگىزگەن ماردىمسىز اسەر باسقا ءبىر جەردە جانە باسقا ءبىر ۋاقىتتا زور, ءارى بولجانباعان سالدار تۋدىرۋى مۇمكىن ەكەن. تۇسىنىكتى تىلمەن ايتساق, جەر شارىنىڭ, مىسالى امەريكانىڭ ءبىر شتاتىنداعى كوبەلەك قاناتىن قاقسا, سول كوبەلەكتىڭ قاناتىنان تۋعان جەل جاپونيادا تايفۋن تۋعىزۋى مۇمكىن.
ارينە, ماسەلەنىڭ بارىنەن قارا بوياۋ ىزدەي بەرگەن دۇرىس ەمەس. بۇل قۇبىلىستىڭ جاقسى جاعى دا بارىن ايتۋىمىز كەرەك.
ورىستىڭ عاجاپ اقىنى اننا احماتوۆانىڭ مىنانداي ءبىر تاماشا ولەڭى بار:
دۆادتسات پەرۆوە. نوچ. پونەدەلنيك.
وچەرتانيا ستوليتسى ۆو مگلە.
سوچينيل جە كاكوي-تو بەزدەلنيك,
چتو بىۆاەت ليۋبوۆ نا زەملە.
ولەڭدى تۇپنۇسقاسىمەن ادەيى بەردىك. سەبەبى, تارجىماعا دا جوعارىدا ايتقان قۇبىلىس اسەر ەتەدى. ءبىر عانا ءسوزدى دۇرىس اۋدارماۋ ءمىنسىز ولەڭنىڭ تابيعاتىن تۋ تالاقاي قىلىپ, اۆتوردىڭ ايتايىن دەپ تۇرعان تەڭىزدەي تەرەڭ ويىن تاياز شالشىققا اينالدىرىپ جىبەرۋى مۇمكىن. بۇل, ارينە شەتەل ادەبيەتىن مۇلدە اۋدارۋعا بولمايدى دەگەن ءسوز ەمەس. تەك ايتقان ءسوزدىڭ ار جاعىنان تۋىندايتىن الاپات وقيعالار تۋرالى ۇنەمى ويلانىپ جۇرگەنىمىز دۇرىس.
ەرتەدە ەستىگەن قىزىق وقيعا ەسىمىزگە ءتۇسىپ وتىر. تۇندە جارقىراۋىق بالىقتارى كولدىڭ ءۇستىن عاجاپ كورىنىسكە بولەپ شورشيتىن اسەم ورىندى تاماشالاۋعا تۋريستەر الەمنىڭ تۇكپىر-تۇكپىرىنەن اعىلادى ەكەن. الايدا الگى ادەمىلىكتى ۇزاق تاماشالاۋعا تەك ءبىر عانا نارسە كەدەرگى كەلتىرسە كەرەك. قازاقشا ايتقاندا, ماسا مازا بەرمەيدى. ماماندار ويلانباستان اتالعان ايماقتاعى ماسانى ءتۇپ اتاسىمەن جويىپ جىبەرەدى. الايدا الگى ادەمى كورىنىستەن ەرتەڭىنە تۇك قالماعان. ءتىپتى جارقىراۋىق بالىقتار قىرىلىپ, كول بىرتە-بىرتە بورسي باستاعان. سويتسە, بالىقتار جارقىراعىسى كەلىپ جارقىرامايدى, تۇندە كولدىڭ بەتىندە ۇشىپ جۇرگەن الگى ماسالارمەن قورەكتەنەدى ەكەن.
ماسانىڭ دا ماڭىزدى قىزمەتى بار.
ءسوزدىڭ دە سالماعىن سارالاي جۇرگەنىمىز ءجون.