قازاقستان پرەزيدەنتى قىرعىز رەسپۋبليكاسىنىڭ سىرتقى ىستەر ءمينيسترى رۋسلان قازاقباەۆتى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ قازاقستانعا جۇمىس ساپارىمەن كەلگەن قىرعىز رەسپۋبليكاسىنىڭ سىرتقى ىستەر ءمينيسترى رۋسلان قازاقباەۆتى قابىلدادى.
مەملەكەت باسشىسى ەكى ەل اراسىنداعى ءوزارا ءىس-قيمىلداردىڭ دەڭگەيىن جوعارى باعالادى.
– قازاقستان مەن قىرعىزستان ەڭ جاقىن مەملەكەتتەر. ءبىزدى ءبولىپ تۇرعان ەشتەڭە جوق, كەرىسىنشە ەلدەرىمىزدى بىرىكتىرۋشى فاكتورلار وتە كوپ. قازاقستان ءۇشىن قىرعىزستان – سەنىمدى وداقتاس, ماڭىزدى ستراتەگيالىق سەرىكتەس جانە باۋىرلاس ەل, – دەدى قاسىم-جومارت توقاەۆ.
پرەزيدەنت قىرعىزستاندا بولىپ جاتقان وقيعالاردى قازاقستاننىڭ مۇقيات باقىلاپ وتىرعانىن, ونى قىرعىز ەلىنىڭ ىشكى ماسەلەسى دەپ قارايتىنىن اتاپ ءوتتى.
– باۋىرلاس قىرعىز ەلىنىڭ بولاشاعىنا الاڭدايمىز. سوندىقتان قىرعىزستانعا كومەك كورسەتۋ ءۇشىن بارلىق مۇمكىندىكتەردى قاراستىرامىز. بۇعان دەيىنگى كەلىسىمدەر نەگىزىندە ەكى ەل اراسىنداعى قارىم-قاتىناستاردى دامىتۋدى جالعاستىرا بەرەمىز, – دەدى مەملەكەت باسشىسى.
رۋسلان قازاقباەۆ ءوز كەزەگىندە قاسىم-جومارت توقاەۆقا قابىلداعانى جانە قىرعىزستانداعى كۇردەلى كەزەڭدە قولداۋ بىلدىرگەنى, كوروناۆيرۋس پاندەمياسى كەزىندە گۋمانيتارلىق كومەك كورسەتكەنى ءۇشىن العىس ايتتى.
– مەنىڭ ساپارىمنىڭ باستى ماقساتى – ەلىمىزدە بولىپ جاتقان ىشكى ساياسي وزگەرىستەرگە قاراماستان باۋىرلاس قازاق ەلىنە قاتىستى سىرتقى ساياسي باعدارىمىزدىڭ وزگەرمەيتىنىن ايقىنداۋ. قىرعىز رەسپۋبليكاسى باۋىرلاس قازاق ەلىمەن اراداعى جاقسى قارىم-قاتىناستاردى قاشان دا قۇرمەت تۇتادى جانە سولاي قالا بەرەدى. ەلىمىزدىڭ جاڭا باسشىلىعى باۋىرلاس ەكى ەلدىڭ تۇپكى مۇددەلەرىنە ساي كەلەتىن بارلىق باعىتتار بويىنشا قىرعىز-قازاق قاتىناستارىن ودان ءارى نىعايتىپ, ارتتىرۋعا نيەتتى, – دەدى قىرعىستاننىڭ سىرتقى ىستەر ءمينيسترى.
پرەزيدەنت مينيسترمەن كەزدەسۋ بارىسىندا ساياسي, ساۋدا-ەكونوميكالىق, ينۆەستيتسيالىق, كولىك-ترانزيتتىك جانە سۋ-ەنەرگەتيكا سالالارىنداعى ىنتىماقتاستىقتى نىعايتۋ ماسەلەلەرىنە ەرەكشە كوڭىل ءبولدى.