3 وڭىردە, اتاپ ايتقاندا سولتۇستىك قازاقستان, ماڭعىستاۋ جانە اتىراۋ وبلىستارىندا قالا حالقى 100% ورتالىقتاندىرىلعان سۋمەن قامتىلعان. بۇل تۋرالى ۇكىمەت وتىرىسىندا يدم باسشىلىعى ايتىپ ءوتتى, دەپ حابارلايدى Egemen.kz
الماتى, اتىراۋ جانە قىزىلوردا وبلىستارىندا اۋىلدىق جەرلەردە سۋمەن جابدىقتاۋ دەڭگەيى تومەن. بۇل رەتتە جەكەلەگەن وڭىرلەر ارتتا قالىپ وتىر. اۋىز سۋمەن قامتۋ دەڭگەيى قوستاناي, جامبىل جانە پاۆلودار وبلىستارىندا تومەن. سۋمەن قامتاماسىز ەتۋدىڭ الەۋمەتتىك ماڭىزى زور.
مەملەكەت باسشىسى تازا اۋىز سۋعا قول جەتكىزۋ دەڭگەيىن بارلىق وڭىردە تەڭەستىرۋ قاجەتتىگىن بىرنەشە رەت اتاپ كورسەتتى.
"نۇرلى جەر" باعدارلاماسى اياسىندا اۋىلداردى ساپالى جانە قاجەتتى مولشەردە سۋمەن جابدىقتاۋ قىزمەتىمەن كەزەڭ-كەزەڭمەن قامتۋ جونىندە جوسپار ازىرلەندى.
سوندىقتان وڭىرلەر حالىقتى سۋمەن قامتاماسىز ەتۋ ءۇشىن وسى جوسپاردى كەيىنگە قالدىرماي, ءتيىمدى شارالار قابىلداۋى كەرەك.
ەلباسىنىڭ باستاماسىمەن ەلىمىزدە قازىر "اۋىل-ەل بەسىگى" باعدارلاماسى ىسكە اسىرىلۋدا. اۋىلداردى سۋمەن جابدىقتاۋ جۇيەسىن دامىتۋ وسى باعدارلامامەن ۇيلەستىرىلگەن. قازىر رەسپۋبليكا بويىنشا بارلىعى 6341 اۋىل بار. ونىڭ ىشىندە 4078 اۋىل ورتالىقتاندىرىلعان سۋمەن جابدىقتالعان. 279 اۋىلدا كەشەندى بلوك-مودۋلدەر ورناتىلعان.
1146 اۋىلدا ورتالىقتاندىرىلعان سۋمەن جابدىقتاۋ جۇيەسى سالىنىپ جاتىر. حالىق سانى از اۋىلداردا ءوز ەلىمىزدە وندىرىلگەن سۋ تازارتاتىن كەشەندى بلوك-مودۋلدەر ورناتىلادى.