نۇر-سۇلتاندا سوڭعى اۋىلشارۋاشىلىق جارمەڭكەسى وتۋدە

نۇر-سۇلتاندا "حان شاتىر" سو الاڭىندا سوڭعى اۋىلشارۋاشىلىق جارمەڭكەسى ءوتىپ جاتىر. وڭىرلەردەن شارۋالار 300 توننا اۋىل شارۋاشىلىق ونىمدەرىن اكەلدى.

“10 شاقتى ەتپەن اينالىساتىن ساۋداگەر جۇمىس جاساۋدا. ەتتىڭ كوپ مولشەرى اقمولا وبلىسىنان اكەلىندى, سيىر ەتىن 1 700 تگ ساتۋدامىز. شقو 30-40 توننا جىلقى ەتىن ۇسىنىپ وتىر, باعاسى 1 900 تگ, قازى-قارتا, جال-جايا 2 100 تگ ساۋدالانۋدا. بارلىق ازىق-ت ۇلىك ىشىنەن ەت ءونىمى جاقسى ءوتىپ جاتىر”, – دەيدى قالالىق اكىمدىكتىڭ وكىلى ەرمەك شيرەكباەۆ.

كوكونىستەر مەن جەمىستەر سۇرانىسقا يە. جارمەڭكەدە ءبىر كيلوگرامم كارتوپ نەمەسە ءسابىزدى 80 تەڭگەگە ساتىپ الۋعا بولادى.

"پاۆلودار وبلىسىنان 10 توننا كارتوپ اكەلدىك, باعاسى تۇراقتى, ساپالى ءونىم دەپ ايتۋعا بولادى. جالپى العاندا 40 توننادان اسا كوكونىس ءونىمى اكەلىندى. سونىمەن قوسا ءسابىز بەن پيازدى دا ارزان باعاعا الاسىزدار. “قىستىڭ قامىن جازدا ويلا” دەمەكشى, حالىق كوپ كەلۋدە جانە كوكونىستەردى قاپپەن الۋدا”, – دەيدى م-اگرو وكىلى دارحان ءسايدىلدين.

اۋىل شارۋاشىلىق تاۋارلارى تىكەلەي وندىرۋشىلەردەن دەلدالسىز جەتكىزىلەدى. دەمەك تاۋار قۇنى ارزان بولادى. جىلقى ەتى – 1 900 تگ, سيىر ەتى – 1 700 تگ, قوي ەتى – 1 700 تگ, قۇس ەتى – 900-1 200 تگ, جۇمىرتقانىڭ ءبىر ساناتى 350 تگ, بال – 1 500-2 000 تگ, شۇجىق – 1 400-2 000, كوكونىستەر كارتوپ 80-90 تگ, قىزاناق-قيار 400 تگ, الما 300-400 تەڭگەدەن ساتىلادى.

جارمەڭكەدە بىرنەشە ديلەر كومپانيالارى: پاۆلودار وبلىسىنىڭ "رۋبيكوم" جشس, "كرەگەل" جشس جانە سولتۇستىك قازاقستان وبلىسىنىڭ "پانچەنكو" كونديتەرلىك فابريكاسىنىڭ ونىمدەرى ساۋدالانۋدا. ۇيىمداستىرۋشىلاردىڭ ايتۋىنشا, مۇنداي ايماقتىق جارمەڭكەلەر ازىق-ت ۇلىك باعاسىن تۇراقتاندىرۋ, وڭىرارالىق ىنتىماقتاستىقتى دامىتۋعا ىقپال ەتەدى.

قالاداعى ەپيدەميولوگيالىق جاعداي ەسكەرىلە وتىرىپ, ءىس-شارا بارلىق سانيتارلىق ەرەجەلەر مەن كارانتين تالاپتارىن ساقتاي وتىرىپ وتكىزىلەدى. كەلۋشىلەرگە ماسكا تاعۋ, سانيتايزەرلەردى پايدالانۋ جانە قاشىقتىقتى ساقتاۋ تالاپتارى قويىلعان.

ەستەرىڭىزگە سالا كەتەيىك, جارمەڭكەلەر قىركۇيەك ايىنىڭ باسىنان باستاپ, ءار دەمالىس كۇندەرى وتكىزىلدى. وسى ۋاقىت ىشىندە شارۋالار نۇر-سۇلتانعا 4 300 توننادان استام ءونىم اكەلدى. تۇرعىندار سۇرانىسىنان سوڭ, قالادا جارمەڭكەلەردى وتكىزۋدى قازان ايىنىڭ سوڭىنا دەيىن ۇزارتۋ تۋرالى شەشىم قابىلداندى.