شقو اكىمى دانيال احمەتوۆ وسكەمەندەگى جاڭا شاعىن اۋداندا سالىنىپ جاتقان ۇيلەردىڭ قۇرىلىسىن سىنعا الدى. ايماق باسشىسى الەۋمەتتىك جەلىلەردەگى پاراقشالارىندا مەردىگەر كومپانيا باسپانالاردى ءتيىستى مەرزىمىندە قولدانىسقا بەرىپ ۇلگەرمەيدى دەپ جازدى, دەپ حابارلايدى Egemen.kz.
"كەزەكتى رەت 19 شاعىن اۋدانداعى جاڭا اللەيادا اتقارىلعان جۇمىستاردىڭ بارىسىمەن تانىستىم. جوبانى جالعاستىرۋ ءۇشىن قازىبەك بي داڭعىلى جاعىنان ۇزىندىعى 80 مەتردى قۇرايتىن سكۆەردىڭ سمەتاسىن جاساۋ تاپسىرىلدى, وندا ەسكەرتكىش پەن ادەمى سۋبۇرقاق ورنالاساتىن بولادى.
قاراشا ايىندا سامار جانە الماتى باعىتتارىنداعى تراسسالاردى بايلانىستىراتىن اۆتوجولداردى رەكونسترۋكتسيالاۋ جۇمىسى اياقتالادى دەپ كۇتىلۋدە. اتالعان ماگيسترال قالانىڭ ورتالىق بولىگىندەگى كولىك جۇكتەمسىن ازايتىپ, پونتون كوپىرى ارقىلى وسكەمەننىڭ ءۇلبى بولىگى مەن 19 شاعىن اۋدانىن بايلانىستىرماق. سونىمەن قاتار, كەلەسى جىلى ەسەنبەرلين داڭعىلى جىبەك جولى مەن ساتپاەۆ كوشەلەرىنىڭ قيىلىسىنا دەيىن سوزىلادى. وسىلايشا, وبلىس ورتالىعىنىڭ نەگىزگى كولىك لوگيستيكاسى 2021 جىلى اياقتالىپ, تولىق اباتتاندىرىلادى.
قالانى ارالاۋ بارىسىندا "نۇرلى جول" جاڭا شاعىن اۋدانىنداعى جاڭا 16 جانە 12 قاباتتى تۇرعىن ۇيلەردىڭ قۇرىلىس قارقىنىمەن تانىستىم. وكىنىشكە وراي, مەردىگەر مەكەمە جوسپارلانعان 70 مىڭ شارشى مەتردى مەرزىمىندە پايدالانۋعا بەرمەيدى دەپ ويلايمىن. ونى وسى ۋاقىت ىشىندە اتقارىلعان ءىستىڭ كولەمىنەن باعالاپ كورۋگە بولادى. قالا اكىمى جاقسىلىق ومارعا ءتيىستى شارالار قابىلداۋ تاپسىرىلدى", - دەپ جازدى د.احمەتوۆ.
وبلىس اكىمى سونداي-اق قالا تۇرعىندارى بۇل ۇيلەردى كۇتىپ وتىرعاندارىن, باسپانالاردىڭ نەسيە ارقىلى جۇزەگە اسىرىلاتىنىن جەتكىزدى. ال قالا اكىمدىگىنە اقشانى بيۋدجەتكە قايتارۋى ءتيىس.