جىگىتتەر جۇلقىنىپ تۇر

رەسەي مەن ۋكراينا اۋماعىندا ۇيىمداستىرىلعان ءتۇرلى تۋرنيرلەردە قارسىلاس شاق كەلتىرمەگەن حابيب نۋرماگومەدوۆ الەمدەگى ەڭ بەلدى پروموۋشەندە ءوزىنىڭ تۇساۋكەسەر كەزدەسۋىن 2012 جىلدىڭ 20 قاڭتارىندا وتكىزگەن بولاتىن. سول جەكپە-جەكتە ول يراندىق كامال شالورۋستى قىلقىندىرىپ تاستادى. ارادا التى جىلدان اسا ۋاقىت وتكەننەن كەيىن امەريكالىق ەل ياكۆينتانى ۇپاي سانىمەن ۇتقان حابيب چەمپيوندىق بەلبەۋدى يەلەندى. سودان كەيىن يرلانديالىق كونور ماكگرەگور مەن اقش-تىڭ وكىلى داستين پۋارەنى ايقىن با­سىم­دىقپەن جەڭىپ, ءوز اتاعىن ساق­تاپ قالدى. وكتاگوندا بارلىعى 28 كەز­دەسۋ وتكىزگەن 32 جاستاعى دا­عىس­تاننىڭ ۇلتتىق باتىرى بارلى­عىندا باسىمدىق تانىتىپ, 18 با­سە­كەنى مەرزىمىنەن بۇرىن اياق­تادى.

دجاستين گەتجي دە وڭاي قار­سىلاس ەمەس. 14 قاراشادا 32 جاسقا تولعالى وتىرعان اقش-تىڭ اري­زونا شتاتىنىڭ تۋماسى دا ءتۇرلى ءدۇبىرلى دودالاردا شەبەرلىگىن شىڭداپ, 2017 جىلدىڭ جازىندا UFC-گە اۋىستى. تۇساۋكەسەر باسەكەسىندە مايكل دجونسوندى ۇرىپ جىقتى. سول كەزگە دەيىن ەشكىمنەن جەڭىلمەگەن ساقا سپورتشى سودان كەيىن قاتارىنان ەكى جەكپە-جەكتە ەسە جىبەردى. ول ءوز وتانداستارى ەددي الۆارەس پەن داستين پۋارەدەن ۇتىلدى. ەسەسىنە ودان كەيىن دجەيمس ۆيك, ەدسون باربوزا, دونالد سەررونە جانە توني فەرگيۋسسوندى سوققىعا جىقتى. بۇل باسەكەلەردىڭ بارلىعى دا مەرزىمىنەن بۇرىن اياقتالدى. وسى كۇنگە دەيىن گەتجي 24 كەزدەسۋ وتكىزىپ, 22 رەت جەڭىس تويىن تويلادى. 20 قارسىلاسىن ايقىن باسىمدىقپەن ۇتتى. بۇل كۇندەرى امەريكالىق سپورتشى UFC-ءدىڭ ۋاقىتشا چەمپيونى اتانىپ وتىر.

ءابۋ-دابيدەگى ءتۋرنيردى قازاق­ستان­دىق جانكۇيەرلەر دە تاعاتسىز­دانا كۇتۋدە. ويتكەنى وسى كەشتە قوس بىردەي جەرلەسىمىز – شاۆكات راحمونوۆ پەن سەرگەي موروزوۆ ونەر كورسەتەدى. ولاردىڭ ەكەۋىنىڭ دە ەسىمى سپورتسۇيەر قاۋىمعا جاقسى تانىس. 26 جاستاعى شاۆكات كۇنى بۇگىنگە دەيىن ەشكىمنەن جەڭىلگەن ەمەس. 12 كەزدەسۋدىڭ بارلىعىن ول مەرزىمىنەن بۇرىن جانە العاشقى راۋندتاردا اياقتادى. جارتىلاي ورتا سالماقتاعى قانداسىمىز قازاقستاندىق سپورتشىلار اراسىنان العاشقى بولىپ UFC-مەن كەلىسىمشارتقا وتىردى. الايدا ءتۇرلى جاعدايلارعا بايلانىس­تى شاۆكات راحمونوۆ ايتۋلى ۇيىم وتكىزىپ وتىرعان جارىستاردا ءالى كۇش سىناسقان جوق. ال 31 جاستاعى سەرگەي موروزوۆ اسا جەڭىل سالماقتا سايىسقا ءتۇسىپ, 19 جەكپە-جەگىنىڭ تەك ۇشەۋىندە جەڭىلىستىڭ كەرمەك ءدامىن تاتتى. قالعاندارىن ءوز پايداسىنا شەشتى. 12 باسەكەدە ايقىن باسىمدىق تانىتتى. جوعارىدا ەسىمدەرى اتالعان قوس وتانداسىمىز دا رەسەيدە ىرگەتاسى قالانعان م-1 ۇيىمىنىڭ چەمپيوندارى. 

پارسى شىعاناعىندا شاۆكات راحمونوۆ 32 جاستاعى الەكس ولي­ۆەي­رامەن ايقاسادى. «كوۆبوي» دەگەن لاقاپ اتپەن تانىلعان برازيليا سپورتشىسى 32 مارتە ايقاس الاڭىنا شىعىپ, 21 رەت جەڭىسكە جەتتى. 18 قارسىلاسىن ەسىنەن تاندىردى. جەتى رەت جەڭىلدى. ءبىر مارتە تەڭ ءتۇسىپ, تاعى ەكى كەزدەسۋدىڭ ناتيجەسى ەسەپكە الىنبادى. سەرگەي موروزوۆ حابيب نۋرماگومەدوۆتىڭ ىنىسىمەن كۇش سىناسۋى ءتيىس ەدى. الايدا ول اۋرۋحاناعا ءتۇسىپ قالعان سوڭ, وعان باسقا قارسىلاس ىزدەستىرۋدە.