قاراعاندى وبلىسىندا سەگىز سانيتارلىق بەكەت قويىلادى

بۇل تۋراسىندا  جەرگىلىكتى Saryarqa تەلەارناسىندا وتكەن بريفينگتە وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى دەپارتامەنتى باسشىسىنىڭ مىندەتىن اتقارۋشى يۋري زالىگين مالىمدەدى.

وبلىستىڭ جەزقازعان, پريوزەرسك قالالارى مەن ۇلىتاۋ, نۇرا, وساكاروۆ, بۇقار جىراۋ جانە قارقارالى اۋداندارىنىڭ كىرە بەرىسىنە سانيتارلىق بەكەت قويۋ جونىندە شەشىم قابىلدانعان. بۇل جەرلەردە پوليتسيا مەن مەديتسينالىق قىزمەتكەرلەر جۇرگىزۋشىلەر مەن جولاۋشىلاردىڭ دەنساۋلىق جاعدايىن تەكسەرىپ, كەزەكشىلىك ەتەتىن بولادى.

بۇعان قوسا قالالاردا كوپقاباتتى تۇرعىن ۇيلەردىڭ كىرەبەرىستەرى, ليفتىلەر مەن پاركينگتەر تاۋلىگىنە كەم دەگەندە ەكى مارتە پروفيلاكتيكالىق دەزينفەكتسيالاۋدان جانە ىلعالدى تازالاۋدان وتكىزىلەتىن بولادى. بالالار مەن اۋلا الاڭدارى دا كۇن سايىن دەزينفەكتسيالانادى. جاسى 65-تەن اسقان ەگدە  ادامدارعا قوزعالىستى شەكتەۋ ۇسىنىلادى.

شتاتىندا 30-دان استام ادامى بار مەملەكەتتىك كاسىپورىندار مەن ۇيىمداردا قىزمەتشىلەردىڭ 50%-ى قاشىقتان جۇمىس فورماتىنا كوشىرىلۋى ءتيىس. شەتەلگە شىعاتىن تۋريستەرمەن اقپاراتتىق جۇمىستى كۇشەيتۋ تالاپ ەتىلەدى.

ەلۋ ادامنان اسا وتىراتىن ورنى بار ساۋدا-ويىن-ساۋىق ورتالىقتارىندا, ساۋدا ۇيلەرىندە, جەلىلىك دۇكەندەردە, قوعامدىق تاماقتانۋ پۋنكتتەرىندە بەينەكامەرالار ورناتۋ ۇسىنىلعان. مۇنداي قادام ەرەجە بۇزۋشىلىقتاردى ناقتى ۋاقىت رەجىمىندە تىركەۋ ءۇشىن كەرەك ەكەن. سونداي-اق, ونەركاسىپتىك كاسىپورىنداردا, اۆتوۆوكزالدار مەن اۆتوبەكەتتەردە ستاتسيونارلىق تەپلوۆيزورلار مەن اقىلدى بەينەباقىلاۋ جۇيەلەرىن ورناتۋ تالاپ ەتىلەدى.

جولاۋشىلار كولىگىنە جۇكتەمەنى تومەندەتۋ ماقساتىندا كاسىپورىندار مەن ۇيىمداردىڭ سارالانعان جۇمىس كەستەسى بويىنشا ماسەلە شەشىلەتىن بولادى. بۇدان بولەك, ونەركاسىپتىك كاسىپورىنداردىڭ باسشىلارى ءوز قىزمەتكەرلەرىن جۇمىسقا جانە ۇيگە جەتكىزۋدى ۇيىمداستىرۋى كەرەك.

كارانتين ءتارتىبى وسىلايشا قاتاڭداعان كەزدە ەرىكتىلەر زەينەتكەرلەر مەن مۇمكىندىگى شەكتەۋلى جاندارعا كومەك كورسەتۋ جۇمىستارىن جانداندىراتىن بولادى. ماسكالىق رەجىمنىڭ, سانيتاريالىق-دەزينفەكتسيالىق تالاپتاردىڭ ساقتالۋىن باقىلاۋ كۇشەيەدى.

بريفينگ بارىسىندا وبلىستاعى باس سانيتارلىق دارىگەردىڭ مىندەتىن اتقارۋشى ويىن-ساۋىق, سپورتتىق, وتباسىلىق, ەستەلىك, سالتاناتتى جانە باسقا دا بۇقارالىق ءىس-شارالاردى وتكىزۋگە تىيىم سالىنعانىن تاعى ءبىر مارتە ەسكەرتتى. ال كاراوكە, بيليارد, كومپيۋتەرلىك كلۋبتار, تۇنگى كلۋبتار, بوۋلينگ ورتالىقتارى سياقتى ويىن-ساۋىق مەكەمەلەرىنىڭ, سونىمەن قاتار جابىق ءۇي-جايلارداعى بالالار ويىن الاڭدارى مەن اتتراكتسيوندارىنىڭ, باتۋتتاردىڭ, جابىق عيماراتتاعى كينوتەاترلاردىڭ, بۋكمەكەرلىك كەڭسەلەردىڭ جۇمىس ىستەۋىنە  ءالى دە رۇقسات ەتىلمەگەن.

– ۆيرۋس ءالى دە قاۋىپتى. ۇيدەن قاجەت بولماعان جاعدايدا شىقپاڭىزدار, كوپشىلىك جينالاتىن جەردەن اۋلاق بولىڭىزدار, الەۋمەتتىك قاشىقتىق پەن ماسكا رەجىمىن ساقتاڭىزدار, دەدى يۋري زالىگين.

ال قاراعاندى وبلىستىق دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆ كوروناۆيرۋستىڭ بولۋى مۇمكىن ەكىنشى تولقىنىنا دەگەن وڭىردەگى دايارلىقتىڭ قالاي ءوربىپ جاتقانىنان مالىمەت بەردى.

– وبلىستا كوروناۆيرۋس ينفەكتسياسىنىڭ جاڭا تولقىنىنا قارسى كۇرەس دايارلىعى كەڭ اۋقىمدا جۇرگىزىلۋدە. مىسالى جەزقازعان قالاسىندا 200 توسەكتىك جاڭا جۇقپالى اۋرۋلار اۋرۋحاناسى ناۋقاستاردى قابىلداۋعا دايىندالۋدا. ول مودۋلدىك تاسىلمەن سالىنعان جانە زاماناۋي مەديتسينالىق جابدىقتارمەن قامتاماسىز ەتىلگەن. قاراشا ايىنا قاراي اباي, بالقاش, تەمىرتاۋ جانە شاحتينسك قالالارىندا جۇقپالى اۋرۋلار اۋرۋحانالارىن قايتا قۇرۋ جانە جوندەۋ اياقتالادى, دەپ مالىمدەدى وبلىستىڭ باس دارىگەرى.

بۇگىنگى كۇندە وڭىردەگى اۋرۋحانالاردى زاماناۋي مەديتسينالىق تەحنيكامەن جابدىقتاۋ جالعاسۋدا. اتاپ ايتقاندا, 223 ءوجج اپپاراتى, 2400 وتتەگى كونتسەنتراتورى, 2600 پۋلسوكسيمەتر, 40 تسيفرلىق رەنتگەن اپپاراتى ساتىپ الىنعان.

سونداي-اق, مەديتسينالىق گازداردى بەرۋدىڭ ورتالىقتاندىرىلعان جۇيەلەرى ورناتىلادى. ءموبيلدى بريگادالار قوسىمشا كولىكتەرمەن جابدىقتالعان. كومپيۋتەرلىك توموگرافتار پاركى كۇشەيتىلۋدە. پتر-زەرتحانالار جەلىسى كەڭەيۋدە, ولاردىڭ قۋاتى تاۋلىگىنە 10 000 تەستكە دەيىن وسەتىن كورىنەدى.

ەرجان نۇرلىباەۆ ەگدە ادامدار توبى ءۇشىن ۆيرۋستىق ينفەكتسيانىڭ ماۋسىمدىق كوتەرىلۋى كەزەڭىندە ەمحاناعا بارۋدىڭ قاجەتى بولمايتىنداي جاعداي جاساۋدىڭ امالدارى قاراستىرىلاتىنىن ايتتى.

 – قارت ادامدارعا مەديتسينالىق قىزمەتتەردىڭ كوپشىلىگى ۇيدە كورسەتىلەتىن بولادى. ديسپانسەرلىك ەسەپتە تۇرعان بارلىق پاتسيەنتتەر قاڭتاردى قوسقانداعى الداعى ءۇش ايعا قاجەتتى ءدارى-دارمەك قورىن الادى, دەپ سەندىردى ەرجان نۇرلىباەۆ.

سونىمەن بىرگە, وبلىستىڭ باس دارىگەرى تۇماۋ مەن پنەۆموكوكك ينفەكتسياسىنا قارسى ۆاكتسيناتسيا ناۋقانى اياسىندا 200 مىڭعا جۋىق ادامنىڭ تەگىن ەكپە الاتىنىن جەتكىزدى.

بريفينگتىڭ سوڭىندا ەرجان نۇرلىباەۆ پەن  يۋري زالىگين ءوڭىر تۇرعىندارىن سانيتارلىق تالاپتاردى قاتاڭ ساقتاۋعا شاقىردى.