كونفەسسياارالىق جانە وركەنيەتارالىق ديالوگتى دامىتۋ جونىندەگى نۇرسۇلتان نازارباەۆ ورتالىعى مەن قاسيەتتى تاقتىڭ دىنارالىق ديالوگ جونىندەگى پاپالىق كەڭەسى (ۆاتيكان) ءوزارا تۇسىنىستىك تۋرالى مەموراندۋمعا قول قويدى, دەپ حابارلايدى Egemen.kz.
رۋحاني ديپلوماتيانىڭ حالىقارالىق باستامالارىن ناسيحاتتاۋ, الەمدىك جانە ءداستۇرلى دىندەر ليدەرلەرى سەزىنىڭ يدەيالارى مەن شەشىمدەرىن كەڭىنەن ناسيحاتتاۋ, قازاقستان مەن ۆاتيكان اراسىنداعى بايلانىستار مەن سەنىمنىڭ تەرەڭدەۋىنە, سونداي-اق ودان ءارى سىندارلى ىنتىماقتاستىقتى دامىتۋعا ىقپال ەتۋ ماقساتىندا 15 قازاندا كونفەسسياارالىق جانە وركەنيەتارالىق ديالوگتى دامىتۋ جونىندەگى نۇرسۇلتان نازارباەۆ ورتالىعى باسقارماسىنىڭ توراعاسى – التاي ابيبۋللاەۆ پەن قاسيەتتى تاقتىڭ دىنارالىق ديالوگ جونىندەگى پاپالىق كەڭەسىنىڭ پرەزيدەنتى (ۆاتيكان) – كاردينال Miguel Ángel Ayuso Guixot (ونلاين رەجيمىندە) العاش رەت ءوزارا تۇسىنىستىك تۋرالى مەموراندۋمعا قول قويدى.
"ريم پاپاسى يوانن پاۆەل II مەن قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ ءبىزدىڭ ءارتۇرلى دىندەردىڭ, مادەنيەتتەر مەن تىلدەردىڭ وكىلدەرى بولۋىمىزعا قاراماستان, باۋىرلارىمىز بەن قارىنداستارىمىزدى ءبىرتۇتاس ادامزاتقا بىرىكتىرەتىن مىقتى ديالوگ قۇردى. سوندىقتان, مەن الەمدىك جانە ءداستۇرلى دىندەر ليدەرلەرى سەزى حاتشىلىعىن ويداعىداي باسقارعان قازاقستان رەسپۋبليكاسىنىڭ پرەزيدەنتى, جوعارى مارتەبەلى قاسىم-جومارت توقاەۆ مىرزاعا دا قۇرمەتىمدى بىلدىرگىم كەلەدى. پرەزيدەنت قاسىم-جومارت توقاەۆ دىندەر مەن مادەنيەتارالىق ديالوگتى ىلگەرىلەتۋ بويىنشا ۇلكەن جۇمىس جاسادى", – دەدى كاردينال Miguel Ángel Ayuso Guixot.
مەموراندۋم تاراپتاردىڭ "بەيبىتشىلىك پەن بىرلەسىپ ءومىر ءسۇرۋ ماقساتىنداعى ادامزاتتىق باۋىرلاستىق تۋرالى قۇجاتتى" قولداۋىن, سونداي-اق مادەنيەتتەر, ەتنوستار مەن دىندەردىڭ ءوزارا تۇسىنىستىگى مەن كەلىسىمى بويىنشا جوبالار مەن ءىس-شارالاردى جۇزەگە اسىرۋ ءۇشىن "ديالوگ جونىندەگى بىرلەسكەن كوميتەت" قۇرۋدى, الەمدىك جانە ءداستۇرلى دىندەر ليدەرلەرى سەزىنىڭ باستامالارىن, بىتىمگەرشىلىك پرينتسيپتەرى, تەڭدىك جانە توزىمدىلىكتى ءوزارا قولداۋ مەن ىلگەرىلەتۋدى ماقسات ەتەدى.