تەلەكوپىر فورماتىندا وتكەن زاۋىتتىڭ اشىلۋ سالتاناتىنا كورەيا رەسپۋبليكاسىنىڭ ساۋدا, يندۋستريا جانە ەنەرگەتيكا ءمينيسترى سون يۋن مو, قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ, «Hyundai Motor Company» پرەزيدەنتى لي ۆون جانە «Astana Group» پرەزيدەنتى ن.سماعۇلوۆ قاتىستى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
زاۋىت الەمدىك اۆتوموبيل جاساۋدىڭ زاماناۋي تەحنولوگيالارى مەن ەكولوگيالىق ستاندارتتار تالاپتارىن ەسكەرە وتىرىپ سالىنعان.
كاسىپورىننىڭ جوبالىق قۋاتتىلىعى ءبىرىنشى كەزەڭدە جىلىنا 30 مىڭ بىرلىكتى, ەكىنشى كەزەڭدە جىلىنا 45 مىڭ بىرلىككە دەيىن قۇرايدى. ينۆەستيتسيالاردىڭ جالپى كولەمى 28 ملرد تەڭگەدەن اسادى. شەكتەس سالالاردى ەسكەرە وتىرىپ, 1000-نان استام جاڭا جۇمىس ورىندارى قۇرىلدى. الداعى ۋاقىتتا اۆتوكومپونەنتتەر شىعاراتىن زاۋىت اشۋ كوزدەلگەن, بۇل 51%-دان استام جەرگىلىكتەندىرۋدى قامتاماسىز ەتۋگە جانە تمد ەلدەرىنە ەكسپورتقا شىعۋعا مۇمكىندىك بەرەدى.
«2020 جىلدىڭ 9 ايىندا اۆتوموبيل جاساۋ سالاسىنداعى ءوندىرىس كولەمى 50%-دان استامعا ۇلعايدى. بۇل سالا جوعارى بىلىكتى جۇمىس ورىندارىن اشۋعا جانە قوسىلعان قۇنى جوعارى ءونىم شىعارۋعا مۇمكىندىك بەرەدى», — دەدى ا. مامين.
پرەمەر-مينيستر الماتى قالاسىندا Hyundai اۆتوموبيل ءوندىرىسىنىڭ اشىلۋى اۆتوموبيل ونەركاسىبىنىڭ الەمدەگى اسا ءىرى كوشباسشىلارىنىڭ ءبىرى «Hyundai Motor Company» كومپانياسىمەن ونەركاسىپتىك كووپەراتسيانى كەڭەيتۋدىڭ, سونداي-اق قازاقستاننىڭ كورەيا رەسپۋبليكاسىمەن جەمىستى ىنتىماقتاستىعىن تەرەڭدەتۋدىڭ كورنەكتى ۇلگىسى بولا الاتىنىن اتاپ ءوتتى.
جۇمىس ساپارى اياسىندا ۇكىمەت باسشىسى الماتى قالاسىنداعى جەو-2 ارالاپ, وندا ەلەكتر ستانتسياسىن جاڭعىرتۋ جانە گازعا اۋىستىرۋ تۇجىرىمداماسىمەن تانىستى. ىلە الاتاۋى مەملەكەتتىك ۇلتتىق تابيعي پاركىندە پرەمەر-مينيسترگە قازاقستاندا ەكولوگيالىق ءتۋريزمدى دامىتۋ جوبالارى تانىستىرىلدى.
ا. مامين ۇلكەن الماتى اينالما اۆتوموبيل جولىنىڭ ء(ۇاااج) جانە قالانىڭ باسقا دا كولىك جانە تۇرعىن ءۇي ينفراقۇرىلىمى نىساندارىنىڭ قۇرىلىسىمەن تانىستى, سونداي-اق دەنساۋلىق ساقتاۋ جانە ءبىلىم بەرۋ مەكەمەلەرى — «Halyk Arena»-داعى ينفەكتسيالىق ستاتسيونارعا, ەرەكشە قاجەتتىلىكتەرى بار بالالار مەن جاسوسپىرىمدەرگە ارنالعان «MEIIRIM» وڭالتۋ ورتالىعىنا جانە ش. ءۋاليحانوۆ اتىنداعى مەكتەپكە باردى.
2020 جىلدىڭ 9 ايىندا وتكەن جىلدىڭ سايكەس كەزەڭىمەن سالىستىرعاندا الماتى قالاسىندا ونەركاسىپتىك ءونىم ءوندىرىسىنىڭ كولەمى 3,2%-عا 712,2 ملرد تەڭگەگە دەيىن, نەگىزگى كاپيتالعا ينۆەستيتسيالار 12,5%-عا 608,2 ملرد تەڭگەگە دەيىن, قۇرىلىس جۇمىستارىنىڭ كولەمى 6,9%-عا (248,5 ملرد تەڭگەگە), پايدالانۋعا بەرىلگەن تۇرعىن ءۇي اۋماعى 8%-عا (1,47 ملن ش.م. استام) ءوستى.