ەلىمىزدىڭ جاڭا كونستيتۋتسياسى جوباسىنا ازاماتتار مەن ساراپشىلار قاۋىمداستىعىنىڭ ۇسىنىستارى نەگىزىندە بىرقاتار ماڭىزدى تولىقتىرۋ ەنگىزىلدى. ولاردى كونستيتۋتسيالىق رەفورما جونىندەگى كوميسسيانىڭ ونىنشى وتىرىسىندا كونستيتۋتسيالىق سوت توراعاسىنىڭ ورىنباسارى باقىت نۇرمۇحانوۆ, تانىستىردى. ۇسىنىستاردىڭ ىشىندە ۆولونتەرلىك قىزمەتتى كونستيتۋتسيالىق دەڭگەيدە بەكىتۋ باستاماسى قولداۋ تاپتى, دەپ جازادى Egemen.kz.
كوميسسيا وتىرىسىندا ايتىلعانداي, ۆولونتەرلىك قىزمەتتىڭ قوعام دامۋى مەن قورشاعان ورتانى قورعاۋداعى ءرولى ارتىپ كەلەدى. وسىنى ەسكەرە وتىرىپ, قولدانىستاعى «ۆولونتەرلىك قىزمەت تۋرالى» زاڭمەن ساباقتاستىق ساقتالا وتىرىپ, اتا زاڭعا ءتيىستى نورما ەنگىزۋ ءجون دەپ تانىلعان.
«31-باپتىڭ 2-تارماعىندا ەلىمىزدە ەرىكتى الەۋمەتتىك ساقتاندىرۋ, الەۋمەتتىك قامسىزداندىرۋدىڭ وزگە دە نىساندارىن قۇرۋ, ۆولونتەرلىك قىزمەت جانە قايىرىمدىلىقتىڭ ىنتالاندىرىلاتىنى جونىندە تولىقتىرۋ ەنگىزىلدى», دەدى باقىت نۇرمۇحانوۆ.
ونىڭ ايتۋىنشا, بۇل باستاما جاڭا كونستيتۋتسيا جوباسىنىڭ وزگە دە ەرەجەلەرىمەن ۇيلەسەدى. اتاپ ايتقاندا, پرەامبۋلا مەن مەملەكەتتىڭ تۇبەگەيلى قاعيداتتارىندا كورىنىس تاباتىن جاۋاپتى ءارى جاسامپاز پاتريوتيزم يدەيالارىن ىلگەرىلەتۋگە, ەڭبەكقورلىق قۇندىلىقتارىن بەكىتۋگە سەرپىن بەرەدى.
قازاقستان باستاماسى: جاھاندىق ەرىكتىلەر جىلى
سونىمەن بىرگە وتىرىستا قۇرىلتاي قىزمەتىن ۇيىمداستىرۋعا قاتىستى وزگەرىستەر دە قوزعالدى. باقىت نۇرمۇحانوۆ كونستيتۋتسيا جوباسىنىڭ 59-بابىنىڭ 3-تارماعىن الىپ تاستاۋ ۇسىنىسىن ورتاعا سالدى. بۇل تارماقتا كوميتەتتەر مەن كوميسسيالاردىڭ قۇرىلۋ ءتارتىبى, وكىلەتتىكتەرى مەن قىزمەتىن ۇيىمداستىرۋدى زاڭمەن ايقىنداۋ كوزدەلگەن ەدى.
ەرىكتىلەر – ەل مەن ەڭبەككە ادال جاندار
ونىڭ ايتۋىنشا, بۇل ماسەلەلەر قازىردىڭ وزىندە «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭمەن, «قر پارلامەنتىنىڭ كوميتەتتەرى مەن كوميسسيالارى تۋرالى» زاڭمەن جانە پارلامەنت رەگلامەنتتەرىمەن رەتتەلىپ وتىر.
«بۇل تۇزەتۋ اتالعان كونستيتۋتسيالىق زاڭدا وسى ماسەلەلەردى قامتۋعا جانە ولاردى قۇقىقتىق رەتتەۋ دەڭگەيىن ارتتىرۋعا مۇمكىندىك بەرەدى», دەپ اتاپ ءوتتى ول.
كوميسسيا وتىرىسىندا كونستيتۋتسيا جوباسىنىڭ مەملەكەتتىك جانە ورىس تىلدەرىندەگى ماتىندەرىن جەتىلدىرۋ جۇمىستارى جالعاسىپ جاتقانى دا ايتىلدى. باقىت نۇرمۇحانوۆتىڭ مالىمدەۋىنشە, جۇمىس توبى قۇقىقتىق نورمالاردىڭ مازمۇنىن بارىنشا قولجەتىمدى ءارى تۇسىنىكتى ەتۋ ءۇشىن تۇجىرىمداردى وڭتايلاندىرۋعا باسىمدىق بەرىپ وتىر. بۇل باعىتتا تەرمينولوگيالىق جانە سەمانتيكالىق بىرىزدىلىككە ەرەكشە ءمان بەرىلىپ وتىر.
ۆولونتەرلىك قاۋىمداستىق جاڭا كونستيتۋتسيا جوباسىن قولدايتىنىن مالىمدەدى
اتاپ ايتقاندا, ۇكىمەت, پارلامەنت, پرەزيدەنت اكىمشىلىگى, كونستيتۋتسيالىق كوميسسيانىڭ رەداكتسيالىق-تەرمينولوگيالىق جۇمىس توبى, سونداي-اق قازاق ءتىلى حالىقارالىق قوعامى ماماندارى مەن تارتىلعان لينگۆيستەردىڭ ۇسىنىستارى نەگىزىندە جەكەلەگەن رەداكتسيالىق جانە ستيليستيكالىق تۇزەتۋلەر ەنگىزىلگەن.