بۇگىن پاۆلودار قالاسىندا «جاڭارتىلعان كونستيتۋتسيا – تۇراقتى دامۋدىڭ نەگىزى» تاقىرىبىندا ساراپشىلار فورۋمى ءوتتى, دەپ حابارلايدى Egemen.kz.
ءىس-شارانىڭ ماقساتى – جاڭارتىلعان كونستيتۋتسيا ەرەجەلەرىن جان-جاقتى ساراپتامالىق تالقىلاۋ, ونى پراكتيكالىق تۇرعىدا ىسكە اسىرۋ بويىنشا كاسىبي ۇسىنىستار ازىرلەۋ جانە كونستيتۋتسيالىق رەفورمالاردى قولداۋعا باعىتتالعان ساراپشىلار قاۋىمداستىعىنىڭ ورتاق ۇستانىمىن قالىپتاستىرۋ.
فورۋم اياسىندا ساياسات, مەملەكەتتىك باسقارۋ جانە ءبىلىم بەرۋ سالالارىنىڭ ماماندارى, پارتيا وكىلدەرى مەن عىلىمي قاۋىمداستىق وكىلدەرى ءسوز سويلەدى. قاتىسۋشىلار كونستيتۋتسيالىق رەفورمالاردىڭ ەلدىڭ ۇزاق مەرزىمدى دامۋىنا ىقپالى, قوعامدىق-ساياسي ۇدەرىستەردەگى ءرولى جانە كونستيتۋتسيالىق نورمالاردى ءتيىمدى قولدانۋ تەتىكتەرىن تالقىلادى.
«اۋىل» پارتياسى ورتالىق اپپاراتى باسشىسىنىڭ ورىنباسارى نۇرحات وراش ءوز سوزىندە جاڭا كونستيتۋتسيا جوباسى ەلدىڭ ۇزاق مەرزىمدى دامۋ باعدارلارىن ايقىندايتىن ستراتەگيالىق قۇجات ەكەنىن اتاپ ءوتتى. ول ۇسىنىلىپ وتىرعان وزگەرىستەر قوعامنىڭ ادىلدىككە دەگەن سۇرانىسىن, بيلىك جاۋاپكەرشىلىگىن ارتتىرۋدى جانە مەملەكەتتىڭ قۇقىقتىق نەگىزدەرىن نىعايتۋدى كورسەتەتىنىن, سونداي-اق زاماناۋي ءارى تۇراقتى ساياسي جۇيەنى قالىپتاستىرۋعا باعىتتالعانىن جەتكىزدى.
«ۇسىنىلىپ وتىرعان رەفورمالار ەڭ الدىمەن حالىق مۇددەسىن قورعاۋعا, بيلىك تارماقتارى اراسىنداعى تەپە-تەڭدىكتى ساقتاۋعا جانە جەرگىلىكتى ءوزىن-ءوزى باسقارۋدىڭ ءرولىن كۇشەيتۋگە باعىتتالعان. سونىمەن قاتار ولار ەلدىڭ ورنىقتى الەۋمەتتىك-ەكونوميكالىق دامۋىنا بەرىك قۇقىقتىق نەگىز قالىپتاستىرىپ, ازاماتتاردىڭ مەملەكەتتىك ينستيتۋتتارعا دەگەن سەنىمىن نىعايتۋعا جانە نەعۇرلىم جاۋاپتى ءارى اشىق باسقارۋ مودەلىن ورنىقتىرۋعا مۇمكىندىك بەرەدى», دەدى ن. وراش.
پارلامەنت ماجىلىسىندەگى «اۋىل» پارتياسى فراكتسياسى اپپاراتىنىڭ جەتەكشىسى جازيرا سۇلتانقۇلوۆا «اۋىل» پارتياسى جاڭا كونستيتۋتسيا جوباسىن تولىق ءارى ءسوزسىز قولدايتىنىن, ونى ەلدىڭ ساياسي جانە قوعامدىق دامۋى جولىنداعى اسا ماڭىزدى قادام رەتىندە قاراستىراتىنىن اتاپ ءوتتى.
«ەلىمىزدىڭ جاڭا نەگىزگى زاڭىنىڭ جوباسى ازاماتتاردان, ساياسي پارتيالاردان, قوعامدىق ۇيىمداردان جانە جەتەكشى ساراپشىلاردان تۇسكەن ۇسىنىستاردى جان-جاقتى تالداۋ نەگىزىندە, سونداي-اق اشىق قوعامدىق تالقىلاۋلاردىڭ ناتيجەلەرى مەن جاڭا نورمالار مەن ەرەجەلەردى ەگجەي-تەگجەيلى پىسىقتاۋدى ەسكەرە وتىرىپ ازىرلەندى», دەدى ج. سۇلتانقۇلوۆا.
تورايعىروۆ ۋنيۆەرسيتەتىنىڭ ستراتەگيالىق دامۋ, حالىقارالىق ىنتىماقتاستىق جانە تسيفرلاندىرۋ جونىندەگى باسقارما مۇشەسى – پرورەكتور سالتانات اۋباكيروۆا اكادەميالىق ورتا ءۇشىن قۇقىقتىق جاڭعىرۋمەن قاتار جاستاردىڭ زاڭعا قۇرمەتىن جانە ازاماتتىق جاۋاپكەرشىلىگىن قالىپتاستىرۋدىڭ ماڭىزى زور ەكەنىن ايتتى. ونىڭ پىكىرىنشە, جاڭارتىلعان كونستيتۋتسيالىق باعدارلار جوعارى وقۋ ورىندارىنداعى ءبىلىم بەرۋ جانە اعارتۋشىلىق جۇمىستى كۇشەيتۋگە, ەلدىڭ جاس بۋىنىن جاسامپازدىق قۇندىلىقتارعا باعىتتاۋعا مۇمكىندىك بەرەدى.
ۆولونتەرلىك قاۋىمداستىق جاڭا كونستيتۋتسيا جوباسىن قولدايتىنىن مالىمدەدى
ساياساتتانۋشى بوريس پولومارچۋك ۇسىنىلىپ وتىرعان وزگەرىستەر ساياسي جۇيەنىڭ ەۆوليۋتسيالىق دامۋىن كورسەتەتىنىن جانە بيلىك ينستيتۋتتارىنىڭ اشىقتىعىن ارتتىرۋعا, قوعامنىڭ شەشىم قابىلداۋ ۇدەرىستەرىنە قاتىسۋ اياسىن كەڭەيتۋگە باعىتتالعانىن جەتكىزدى. ول مۇنداي قادامدار مەملەكەت پەن قوعام اراسىنداعى سەنىمدى نىعايتۋعا ىقپال ەتەتىنىن اتاپ ءوتتى.
ەرقانات كوپجاسار ۇلى: جاڭا كونستيتۋتسيادا ەركىندىك پەن جاۋاپكەرشىلىك ءبىر ارناعا توعىسادى
ساراپشى-ساياساتتانۋشى ەلامان ەلەمەس جاڭارتىلعان پارتيالىق جۇيەگە كوشۋ مەن پارلامەنتتىڭ جاڭا قۇرىلىمى ەلدىڭ ساياسي مادەنيەتىن جاڭا دەڭگەيگە كوتەرەتىنىن ايتتى. سونىمەن قاتار نەگىزگى زاڭعا وزگەرىستەردى تەك جالپىحالىقتىق رەفەرەندۋم ارقىلى ەنگىزۋ نورماسى مەملەكەتتىڭ تۇراقتىلىعىنىڭ ەڭ جوعارى كەپىلى ەكەنى ەرەكشە اتالدى.
باياندامالاردان كەيىن كاسىبي پىكىر الماسۋعا جانە ۇسىنىستار ازىرلەۋگە باعىتتالعان ساراپتامالىق تالقىلاۋ سەسسياسى ءوتتى.
كەزدەسۋ قورىتىندىسى بويىنشا قاتىسۋشىلار ءبىراۋىزدان جاڭا كونستيتۋتسيا – قاۋىپسىز, تازا ءارى ادىلەتتى مەملەكەت قۇرۋدىڭ بەرىك ىرگەتاسىن قالايتىن ستراتەگيالىق تاڭداۋ دەگەن تۇجىرىمعا كەلدى.
جاڭا كونستيتۋتسيا ءماتىنىن برايل قارپىمەن جازۋ ۇسىنىلدى
ساراپشىلار فورۋمى مازمۇندى ۇسىنىستار ازىرلەۋگە, كاسىبي ديالوگتى دامىتۋعا جانە مەملەكەتتىڭ ورنىقتى دامۋ باعىتىن قولداۋدى نىعايتۋعا ىقپال ەتكەن ماڭىزدى الاڭعا اينالدى.