كەزدەسۋدە قاسىم-جومارت توقاەۆ ازيا ينفراقۇرىلىمدىق ينۆەستيتسيالار بانكى ەلىمىزدىڭ ماڭىزدى ستراتەگيالىق سەرىكتەسى سانالاتىنىن اتاپ ءوتتى. قارجى ينستيتۋتى قازاقستاندا باسىمدىققا يە ينفراقۇرىلىمدىق جانە ينۆەستيتسيالىق جوبالاردى ىسكە اسىرۋعا قاتىسادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت بۇگىن قول قويىلعان سەرىكتەستىك تۋرالى نەگىزدەمەلىك كەلىسىمدى قۇپتادى. اتالعان قۇجاتتىڭ ورنىقتى ەكونوميكالىق دامۋدى ىلگەرىلەتۋ مەن وڭىرلىك ىنتىماقتاستىقتى نىعايتۋدا ءمانى زور. قاسىم-جومارت توقاەۆ تسزوۋ ءتسزيايدى جۋىردا ازيا ينفراقۇرىلىمدىق ينۆەستيتسيالار بانكىنىڭ پرەزيدەنتى بولىپ تاعايىندالۋىمەن قۇتتىقتادى.
– ءسىزدىڭ وسى لاۋازىمداعى ساپارىڭىزدى قازاقستاننان باستاعانىڭىزدى جوعارى باعالايمىز. بۇل ەكىجاقتى ىنتىماقتاستىققا تىڭ سەرپىن بەرەتىن جاقسى نىشان دەپ سانايمىز. بانكپەن بىرگە جالپى سوماسى 2,6 ميلليارد دوللاردان اساتىن 9 جوبانى جۇزەگە اسىرىپ جاتىرمىز. مۇنىڭ ءبارى ءوزارا ىقپالداستىعىمىز بەن بايلانىسىمىزدى جانداندىرا تۇسەتىنىنە سەنىمدىمىن, – دەدى مەملەكەت باسشىسى.
تسزوۋ تسزياي ازيا ينفراقۇرىلىمدىق ينۆەستيتسيالار بانكى قازاقستاننىڭ ەنەرگەتيكا, كولىك جانە الەۋمەتتىك ينفراقۇرىلىم سەكتورلارىنداعى بىرقاتار ءىرى جوباعا قولداۋ كورسەتكەنىن جەتكىزدى.
– ىستىق ىقىلاسىڭىز بەن ۇزاق جىلدار بويى ازيا ينفراقۇرىلىمدىق ينۆەستيتسيالار بانكىنە كورسەتكەن قولداۋىڭىز ءۇشىن العىس ايتامىن. قازاقستان مەن باسقا دا اكتسيونەرلەردىڭ ماعان ارتقان سەنىمىنە ءدان ريزامىن. بانك قىزمەتىندە العاشقى ونجىلدىقتاعى جەتىستىكتەرگە نەگىزدەلگەن ساباقتاستىقتى ساقتايمىن. سونداي-اق تۇتىنۋشىلاردىڭ وزگەرىپ جاتقان سۇرانىستارىنا جەدەل جاۋاپ بەرۋ ءۇشىن قارجى ينستيتۋتىن ودان ءارى وركەندەتۋگە تىرىسامىن, – دەدى بانك جەتەكشىسى.
قاسىم-جومارت توقاەۆ پەن تسزوۋ تسزياي بىرلەسكەن قىزمەت اياسىن تەرەڭدەتۋگە ايتارلىقتاي مۇمكىندىك بار ەكەنىنە توقتالدى. تاياۋ جىلدارى قازاقستان ينفراقۇرىلىم سەكتورىن جاڭعىرتۋ بويىنشا اۋقىمدى جوسپاردى جۇزەگە اسىرۋعا نيەتتى. ازيا ينفراقۇرىلىمدىق ينۆەستيتسيالار بانكى وسى ستراتەگيالىق باستامالارعا بەلسەنە اتسالىسۋعا دايىن.
مەملەكەت باسشىسى Sunwah Group كورپوراتسياسىنىڭ توراعاسىن قابىلدادى
قازىرگى ۋاقىتتا بانك كوكشەتاۋ قالاسىنداعى كوپبەيىندى اۋرۋحانا قۇرىلىسى, قۋاتى 220 مۆت بولاتىن جەل ەلەكتر ستانساسى, جەزقازعان – قاراعاندى, اقتوبە – قارابۇتاق – ۇلعايسىن اۆتوكولىك جولدارىنىڭ ۋچاسكەلەرى جانە الماتى قالاسىن اينالىپ وتەتىن تەمىرجول سالۋ جوبالارىنا قارجى ءبولىپ جاتىر.
ايتا كەتەيىك, بۇگىن مەملەكەت باسشىسى ەڭبەك جانە حالىقتى الەۋمەتتىك قورعاۋ ءمينيسترىن دە قابىلدادى.