وردا بۇزار وتىز جاسىندا وپات بولعان باۋىرجان ۇسەنوۆ قازاق ولەڭىندەگى ورنەگى بولەك شايىردىڭ ءبىرى.
كۇرمەۋگە كەلمەس قىسقا عۇمىرىندا ول سوڭىنا وشپەس مۇرا قالدىردى. وتىز جەتىنىڭ ويرانىن, الاش ارىستارىنىڭ قاسىرەتىن جىرلاعان "قارا ماشينا" ولەڭىنىڭ ءوزى اقىننىڭ ادۋىن مىنەزىن كورسەتكەن شىعارما. جارىق دۇنيەدەن جالت ەتىپ وتە شىققان اقىننىڭ بيىل تۋعانىنا الپىس جىل تولىپ وتىر. وسى ورايدا, تاراز قالاسىنداعى ش.ءۋاليحانوۆ اتىنداعى وبلىستىق امبەباپ-عىلىمي كىتاپحاناسىندا ء"بىزدىڭ سەزىم كۇزدە ونگەن گۇل سياقتى…" اتتى اقىندى ەسكە الۋ كەشى ءوتتى. باسقوسۋعا اقىننىڭ كوزكورگەن دوستارى, وتباسى مەن وقىرماندارى قاتىستى.
شارانى اقىننىڭ كۋرستاس دوسى, قازاقستان جۋرناليستەر وداعىنىڭ مۇشەسى, وبلىستىق "Aq jol" گازەتىنىڭ ءبولىم رەداكتورى امانگەلدى ءابىل ءسوز سويلەپ اشىپ, جۇرگىزىپ وتىردى. قالامگەردىڭ جاستىق شاعى, ستۋدەنتتىك كەزدەگى تانىستىقتارى تۋرالى ەستەلىكتەر ايتتى. سونداي-اق, اقىننىڭ دوسى, "سالىق ءتارتىبى" گازەتىنىڭ باس رەداكتورى عالىم قاساباي دا باۋىرجان ۇسەنوۆ جايىندا جىلى لەبىزىن ء بىلدىردى. ادەبي كەش بارىسىندا اقىننىڭ جارى گاۋھار تاجكەنوۆا, ۇلى مۇحامەدسالىق ۇسەنوۆ, قارىنداسى ءاليا كەبەكباەۆا, ءىنىسى ءبىرجان ۇسەنوۆتەر دە اقىن تۋرالى ەستەلىكتەرىمەن ءبولىستى. بۇدان كەيىن اقىننىڭ كۋرستاسى, قازاقستان جۋرناليستەر وداعىنىڭ مۇشەسى قۋانىش يەمبەرديەۆ باۋىرجان ۇسەنوۆتىڭ الپىس جىلدىعى كارانتينگە بايلانىستى اتالىپ وتپەگەنىمەن, ونى الداعى ۋاقىتتا دا جوعارى دەڭگەيدە اتاپ وتۋگە بولاتىنىن جەتكىزدى. سونىمەن قاتار, اۋليەاتا جەرىندە اقىننىڭ ەسكەرتكىشى ورناتىلسا دەگەن ۇسىنىسىن ايتتى. "باۋكەڭنىڭ دوسى, تالانتتى بارد اقىن تابىلدى دوسىموۆتىڭ ەسكەرتكىشى تۋعان جەرىندە ورناتىلعاندا بىزدە دە ۇسەنوۆتىڭ ەسكەرتكىشى قاسقايىپ تۇرسا دەگەن وي تۋعان ەدى. ەندى دەمەۋشىلەردىڭ, ادەبيەتسۇيەر ازاماتتاردىڭ قولداۋىمەن بولسا دا اقىننىڭ تۋعان توپىراعىندا ەسكەرتكىشى ورناتىلسا ءجون بولار ەدى", دەدى ول.
سونداي-اق, باسقوسۋ بارىسىندا وبلىستىق "Aq jol" گازەتىنىڭ باس رەداكتورى ورالحان ءداۋىت, وبلىستىق "Jambyl" تەلەارناسىنىڭ ديرەكتورى مەيىرجان الىبەك ۇلى, وبلىستىق "ARAI" جاستار گازەتىنىڭ باس رەداكتورى داۋلەت تولەندى دە اقىن شىعارماشىلىعى تۋرالى ويلارىن ايتتى. ال, اتالعان شاراعا پولشادان ارنايى كەلگەن اقىننىڭ ۇلى مۇحامەدسالىق ۇسەنوۆ اكەسىنىڭ اتاقتى "قارا ماشينا" ولەڭىن وقىپ بەرسە, شارانى تىكەلەي ونلاين تۇردە تاماشالاپ وتىرعان جۋالى اۋداندىق كىتاپحاناسىنىڭ وقىرماندارى باۋىرجان ۇسەنوۆتىڭ جىرلارىن جاتقا ايتتى. سونىمەن قاتار, بەلگىلى اقىندار سۆەتقالي نۇرجان مەن باۋىرجان جاقىپتىڭ دا ەستەلىكتەرى ايتىلدى. شارا سوڭىندا باۋىرجان ۇسەنوۆتىڭ سوزىنە جازىلعان جانە اقىننىڭ ءوزى شىعارعان اندەرى دە ورىندالدى.