ءماجىلىس توراعاسى نۇرلان نىعماتۋلين جاڭا ەكولوگيالىق كودەكس, ەڭ الدىمەن, قازاقستاندىقتاردىڭ ءومىر ءسۇرۋ ساپاسىن ارتتىرۋعا ىقپال ەتۋى ءتيىس. بۇل تۋرالى پالاتا سپيكەرى بۇگىن ماجىلىستە وتكەن ەكولوگيالىق كودەكس جوباسىن تالقىلاۋ بارىسىندا ايتتى, دەپ حابارلايدى Egemen.ءkz ماجىلىستىڭ ءباسپاسوز قىزمەتىنە سىلتەمە جاساپ.
ماجىلىسكە كەلىپ تۇسكەن جاڭا ەكولوگيالىق كودەكستىڭ ەڭ وزەكتى ماسەلەلەرىن تالقىلاۋعا مەملەكەتتىك ورگانداردىڭ, «اتامەكەن» ۇكپ-نىڭ, ءىرى وتاندىق كاسىپورىنداردىڭ باسشىلارى, ەكولوگ-ساراپشىلار, سونداي-اق ازاماتتىق قوعام وكىلدەرى قاتىستى.
ءماجىلىس توراعاسى نۇرلان نىعماتۋلين مەملەكەت باسشىسىنىڭ قازاقستانداعى ەكولوگيالىق جاعدايدى جاقسارتۋ ءۇشىن ەرەكشە نازار اۋدارعانىنا توقتالدى. تالقىلاۋ بارىسىندا جاڭا ەكولوگيالىق كودەكس جوباسىنىڭ ەڭ وزىق قولجەتىمدى تەحنولوگيالاردى ەنگىزۋ شارتىمەن I ساناتتاعى وبەكتىلەر ءۇشىن كەشەندى ەكولوگيالىق رۇقساتتارعا كوشۋ سياقتى نورماسىنا ەرەكشە نازار اۋدارىلدى.
زاڭ جوباسىن ازىرلەۋشىلەردىڭ پىكىرىنشە, تەحنولوگيالىق پروتسەستەردى جاڭعىرتۋ قورشاعان ورتاعا ەميسسيانى تومەندەتۋگە مۇمكىندىك بەرەدى. كاسىپورىندار ءۇشىن ىنتالاندىرۋ شارالارى رەتىندە كاسىپورىنداردى قولجەتىمدى تەحنولوگيالار ەنگىزىلگەن جاعدايدا ەكولوگيالىق تولەمدەردەن بوساتۋ, كەرىسىنشە جاعدايدا ەميسسيا ءۇشىن تولەمدەردى بىرتىندەپ ارتتىرۋ ۇسىنىلادى. وسىنداي نورمانىڭ قاجەتتىلىگىمەن كەلىسە وتىرىپ, ءماجىلىس دەپۋتاتتارى وبەكتيۆتى سەبەپتەر بويىنشا 10 جىل ىشىندە قولجەتىمدى تەحنولوگيالاردى ەنگىزۋگە بولىنەتىن كاسىپورىندارعا قاتىستى جەكەلەگەن كورسەتكىشتەر بويىنشا بەلگىلەنگەن نورماتيۆتەرگە قول جەتكىزۋ ماسەلەسىن كوتەردى. ال قولجەتىمدى تەحنولوگيالاردى ەنگىزۋ بويىنشا مىندەتتەمەلەر ورىندالماعان جاعدايدا بارلىق جىلدار ءۇشىن تولەنبەگەن ەكولوگيالىق تولەمدەر تۇرىندە ارتتىرۋ كوەففيتسيەنتتەرى مەن وسىماقىلارى بار ايىپپۇل سانكتسيالارى كوزدەلەدى.
وسى رەتتە نۇرلان نىعماتۋلين: - بىرىنشىدەن, جاڭا تەحنولوگيالاردى ەنگىزۋ قاجەت. ول دۇرىس. بۇل قازىرگى زاماننىڭ تالابى. ەكولوگيالىق ماسەلەلەردى شەشۋ ءۇشىن دە ول قاجەتتى نارسە. وسى جوباعا 10 جىل ۋاقىت بەرىلەدى. دەگەنمەن, ومىردە ءارتۇرلى جاعدايلار بولادى. مىسالى, كاسىپورىن جاڭا قولجەتىمدى تەحنولوگيانى ەنگىزە باستادى, بىراق, وبەكتيۆتى سەبەپتەرمەن جۇمىستار ءالى اياقتالعان جوق. ەندى وعان 10 جىلدىڭ ايىپپۇلدارى سالىناتىن بولسا, وندا ونى قالاي تولەيدى؟ سونىمەن بىرگە, بۇل سۇراقتىڭ الەۋمەتتىك جاعى تاعى بار, - دەدى.
ءماجىلىس توراعاسى بۇنى ءبىر كۇننىڭ ماسەلەسى ەمەس ەكەنىن, قولجەتىمدى تەحنولوگيالاردى ەنگىزۋدى ىنتالاندىرۋ نورمالارى كاسىپورىنداردى تەحنولوگيالىق قايتا جاراقتاندىرۋعا ىقپال ەتۋى ءتيىس ەكەنىن اتاپ ءوتتى. مۇنىڭ ءبارى ەكونوميكالىق ىنتىماقتاستىق جانە دامۋ ۇيىمى (ەىدۇ) ستاندارتتارىنا قول جەتكىزۋگە باعىتتالعان. ءماجىلىس دەپۋتاتتارى سونداي-اق ۇسىنىلىپ وتىرعان نورماعا قاتىستى ماسەلەنى كوتەردى, وعان سايكەس ءبىزدىڭ ەلدە ەۋرازەق تەحنيكالىق رەگلامەنتىنىڭ تالاپتارىنا سايكەس كەلمەيتىن كولىك قۇرالدارىن وندىرۋگە جانە پايدالانۋعا تىيىم سالىنادى. وسى جاعدايعا ءماجىلىس دەپۋتاتتارى الاڭداۋشىلىق ءبىلدىردى. سەبەبى, بۇدان اۋىل تۇرعىندارى زارداپ شەگۋى مۇمكىن. ويتكەنى ولاردىڭ كوپشىلىگى ءالى كۇنگە دەيىن ەسكى اۋىل شارۋاشىلىعى تەحنيكاسىن پايدالانادى. ستاتيستيكاعا سايكەس, ەلدە پايدالانۋ مەرزىمى 15 جىلدان اساتىن تراكتورلاردىڭ 82%-ى جانە كومباينداردىڭ 65%-ى بار. بارلىق اۋىل شارۋاشىلىعى تەحنيكاسى پاركىنىڭ تەك 30%-ى عانا زاماناۋي تالاپتارعا سايكەس كەلەدى.
ءماجىلىس سپيكەرىنىڭ پىكىرىنشە, بۇل نورمانى اۋىل تۇرعىندارىنا قولايسىزدىق تۋدىرماۋى ءۇشىن مۇقيات پىسىقتاۋ قاجەت. وتىرىس بارىسىندا دەپۋتاتتار ەكولوگيالىق ساقتاندىرۋ ماسەلەسىن دە كوتەردى. بۇل تەك I ساناتتاعى وبەكتىلەر ءۇشىن مىندەتتى بولادى دەپ كوزدەلەدى.
سونىمەن قاتار, ەلىمىزدە شارۋاشىلىق جانە وزگە دە قىزمەتتىڭ ەكولوگيالىق قاۋىپتى تۇرلەرى ساناتىنا جاتاتىن II ساناتتاعى 2 مىڭنان استام وبەكت جانە III ساناتتاعى 3 مىڭنان استام وبەكت بار. نۇرلان نىعماتۋليننىڭ پىكىرىنشە, بۇل نىسانداردى ەكولوگيالىق ساقتاندىرۋمەن دە قامتۋ كەرەك.
تالقىلاۋدى قورىتىندىلاعان ءماجىلىس توراعاسى بۇگىنگى وتىرىستىڭ ءوز ماقساتىنا جەتكەنىن العا تارتىپ: – ەكولوگيالىق كودەكس ول - ءاربىر ادامنىڭ ومىرىنە, جالپى ەلىمىزدىڭ دامۋىنا تىكەلەي قاتىسى بار قۇجات. سوندىقتان, جاڭا كودەكستە قورشاعان ورتاعا زيان كەلتىرمەۋ, باقىلاۋدى كۇشەيتۋ, ءتيىستى شارا قولدانۋ بويىنشا ماڭىزدى نورمالار ەنگىزىلدى.
سونىمەن بىرگە زامانعا ساي, جاڭا تەحنولوگيالار پايدالانۋعا دا باسا نازار اۋدارىلدى. ولاردىڭ بارلىعى مەملەكەت باسشىسى العا قويعان مىندەتتەردى ورىنداۋعا جانە ەكولوگيانى كۇشەيتۋگە جاڭا سەرپىن بەرەتىنى, ارينە, ءسوزسىز – دەدى.