قاڭتار-تامىز ارالىعىندا ەلىمىزدە قازاقستاندىق جانە شەتەلدىك تولەم كارتالارى ارقىلى قولما-قول قاراجات بەرۋ 10,4 ترلن تەڭگەگە جەتتى. بىلتىرعى كەزەڭمەن سالىستىرعاندا بۇل كورسەتكىش ايتارلىقتاي وزگەرمەگەن. ءوسىم – 0,1%. بۇل تۋرالى Ranking.kz پورتالى حابارلادى.
بۇل رەتتە تولەم كارتالارىمەن جيىنتىق اينالىمنان قولما-قول اقشانى الۋ ۇلەسى رەسپۋبليكا اۋماعىندا 59,9%-دان 35,8%-عا دەيىن قىسقارىپ, كەرىسىنشە اقشاسىز ەسەپ ايىرىسۋدىڭ كولەمى ارتتى. وسىدان 5 جىل بۇرىن قولما-قول اقشانى الۋ كورسەتكىشى اينالىمنىڭ 90%-نان اسىپ تۇرعان ەدى.
كارتالار ارقىلى قولما-قول قاراجاتتى شەشۋ كولەمىنىڭ قىسقارۋى ءۇش وڭىردە بايقالىپ, قالعان ايماقتاردا جىلدىق ءوسىم 0,9%-دان (ماڭعىستاۋ وبلىسى) 27,7%-عا دەيىن (الماتى وبلىسى) جەتكەن.
الماتى شاھارىندا كەرىسىنشە قولما-قول اقشانىڭ كولەمى مينۋس 28,2%-عا دەيىن ازايىپ, ەداۋىر قىسقارۋ تىركەلگەن. الايدا بۇعان قاراماستان, ءدال وسى قارجى ورتالىعىنا وڭىرلەر اراسىنداعى قولما-قول قاراجاتتى الۋدىڭ ەڭ ۇلكەن ۇلەسى تيەسىلى (2,1 ترلن تەڭگە).
قازاقستاندا تولەم كارتالارىنداعى قاراجات كوبىنەسە بانكوماتتار ارقىلى الىنادى. ماسەلەن, قاڭتار-تامىز ايلارىندا ونىڭ كولەمى 9,6 ترلن تەڭگەنى قۇراپ, بىلتىرعى ۇقساس كەزەڭمەن سالىستىرعاندا 10,6%-عا كوبەيدى.
كوروناۆيرۋس پاندەمياسى مەن ەلىمىزدەگى ەكىنشى دەڭگەيلى بانكتەردىڭ شەكتەۋلى جۇمىسىنىڭ سالدارىنان بولىمشەلەردەگى POS تەرمينالدار ارقىلى قاراجاتتى الۋ 2 ەسەگە قىسقاردى. سايكەسىنشە, قولما-قول اقشا الۋدىڭ جالپى كولەمىندەگى بانكوماتتاردىڭ ۇلەسى 83,6%-دان 92,4%-عا دەيىن ءوستى.
ءبىرىنشى جارتىجىلدىقتىڭ سوڭىنا قاراي العاش رەت رەسپۋبليكا اۋماعىنداعى بانكوماتتار سانى 12 مىڭنان اسىپ, 2019 جىلمەن سالىستىرعاندا 10,8%-عا ارتتى. ءوسىم Cash-in قىزمەتى بار قۇرىلعىلار سانىنىڭ 36,4%-عا, ياعني 4,9 مىڭعا دەيىن ۇلعايۋىمەن بايلانىستى. ونىڭ كولەمى بانكوماتتاردىڭ جالپى سانىنان ءبىر جىل ىشىندە 33%-دان 40,6%-عا دەيىن وسكەن.
ال اقشانى تەك بەرۋ فۋنكتسياسى بار قۇرىلعىلاردىڭ سانى, كەرىسىنشە 1,7%-عا, اتاپ ايتقاندا 7,2 مىڭعا دەيىن ازايعان. تولەم كارتانىڭ يەلەرى امبەباپ قۇرىلعىلاردى پايدالانعاندى قۇپ كورەدى. ءوز كەزەگىندە بانكتەر كليەنتتەردىڭ سۇرانىستارىن قاناعاتتاندىرۋعا تىرىسىپ كەلەدى.
بارلىق بانكوماتتىڭ ۇشتەن ءبىرى الماتىدا (2,3 مىڭ) جانە ەلوردادا (1,5 مىڭ) شوعىرلانعان. سول سەكىلدى مىڭداعان شاعىن بانكومات تۇركىستان وبلىسى, شىمكەنت قالاسى جانە قاراعاندى ايماعىندا ورنالاسقان.