ول مەنىڭ بالدان ءتاتتى بالالىق شاقتى, بوزداق جۇلدىزداي بوزبالا كەزەڭدى, ونان كەيىنگى «قارتايىپ, قايعى ويلاعان, ۇيقى سەرگەك» (اباي) ويلى, مۇڭلى, كۇندەردى بىرگە وتكىزگەن سىر جاسىرماس, جان اياسپاس دوسىم ەدى. ەكەۋمىز قوستاناي وبلىسى, امانگەلدى اۋدانىنداعى امانگەلدى ورتا مەكتەبىنە بىرگە باردىق. ءال-فارابي اتىنداعى قازاق ۇلتتىق ۋنيۆەرسيتەتىندە بەس جىل قاتار وقىدىق.
ول مەكتەپتى التىن مەدالمەن ءبىتىرىپ, ۋنيۆەرسيتەتتى قىزىل ديپلوممەن اياقتاعان ەدى. ۋنيۆەرسيتەتتە قالۋعا ۇسىنىس بولسا دا, الماتىدا ايالداماي تۋرا ءوزى تۋىپ-وسكەن ارقالىققا تارتتى. تۋعان جەرگە تۋ تىككەن ول ىبىراي التىنسارين اتىنداعى ارقالىق پەداگوگيكا ۋنيۆەرسيتەتىنە وقىتۋشى بولىپ ورنالاستى. سودان سوڭعى دەمى بىتكەنشە التىنسارين ۋنيۆەرسيتەتىندە تاپجىلماي, تاباندى, جەمىستى ەڭبەك ەتتى. ونىڭ تەلەگەي تەڭىز بىلىمىمەن سۋسىنداعان مىڭداعان شاكىرتتەرى بۇگىندە كەڭ بايتاق قازاقستاننىڭ بارلىق وڭىرلەرىندە جەمىستى ەڭبەك ەتىپ ءجۇر. ولاردىڭ ءبىرازى ەلگە تانىمال تۇلعالار.
ونىڭ جانىپ سۇيگەن جان جارى ءماديناسى الماتى وبلىسى, جامبىل اۋدانىنىڭ قىزى ەدى, مۇسامەن قاتار وقىعان ول دا فيزيك بولاتىن. ول دا ارقالىق پەداگوگيكالىق ۋنيۆەرسيتەتىندە ۇستاز بولدى. ونىڭ دا الدىنان مىڭداعان شاكىرت ءوتتى.
مۇسا كەڭپەيىلوۆتىڭ بىلىمدىلىگى, تالانتتىلىعى, تازالىعى كوپكە بەلگىلى بولاتىن. سودان دا الماتى مەن استاناداعى, قوستانايداعى باسشىلار وعان جايلى پاتەر, جاقسى قىزمەت, جوعارى ەڭبەكاقى ۇسىنىپ, قايتا-قايتا شاقىرۋمەن بولدى. ايتسە دە, مۇقاعالي ماقاتاەۆتىڭ:
سەن دە كەتتىڭ اۋىلدان,
مەن دە كەتتىم اۋىلدان,
ۇيات بولدى-اۋ وسىنىمىز.
قاۋمالاعان قاۋىمنان, –
دەيتىن جىرىن جاتقا ايتاتىن مۇسا تۋ تىككەن تۋعان جەردەن – ارقالىقتان ەشقايدا ۇزامادى. ءوزىنىڭ ۇستازدىق جانە بەلسەندى قوعامدىق جۇمىسىمەن ارقالىق قالاسىنىڭ جانە قوستاناي وبلىسىنىڭ شالعايداعى اۋداندارى – امانگەلدى, جانگەلدين اۋداندارىنىڭ رۋحاني ءومىر جاڭعىرتۋعا ولشەۋسىز ۇلەس قوستى. وسىدان جيىرما جىل بۇرىن مۇسا الپىس جاسقا تولعاندا ەت جاقىندارى ونىڭ مەرەيتويىن دۇركىرەتىپ وتكىزىپ ەدى. رەسپۋبليكامىزدىڭ بارلىق وڭىرلەرىنەن ونىڭ دوس, تۋىس جانە شاكىرتتەرى اعىلىپ كەلدى. ءالى ەسىمدە بۇل 2000 جىل, قىركۇيەك ايىنىڭ 30-ى بولاتىن. ىبىراي التىنسارين اتىنداعى ۋنيۆەرسيتەتتىڭ ۇلكەن اكت زالىندا بوس ورىن بولعان جوق. زالدىڭ قوس قاپتالىندا تۇرەگەلىپ تۇرعاندار, ىشكە كىرە الماي سىرتتا قالعاندار قانشا. قالا اكىمى مەن ۋنيۆەرسيتەت رەكتورىنان باستاپ ەدەن جۋشى مەن اۋلا جۇمىسشىلارىنا دەيىن بىرىنەن سوڭ ءبىرى ءسوز الىپ, اقجۇرەكتەن اقتارىلعان اقجارما تىلەكتەرىن ايتىپ جاتتى. ارناۋ جىرلار اعىلىپ, ءان مەن كۇيدىڭ تيەگى اعىتىلدى. الماتىدان ات ارىتىپ وسى مەرەيتويعا مەن دە جەتىپ ەدىم. زال تولى حالىققا قاراپ ولار ايتقان پاراساتتى سوزدەردى تىڭداي وتىرىپ مەن الماتىدا, اۋەزوۆ تەاترىندا وتكەن اسا اتاقتى, وتە تانىمال تۇلعالاردىڭ مەرەيتويلارىن ەسكە الدىم. ۋنيۆەرسيتەتتىڭ قاتارداعى قاراپايىم وقىتۋشىسىنىڭ ەمەس, قۇددى اتاقتى اقىن, جازۋشىنىڭ, الەمگە ايگىلى تۇلعانىڭ مەرەيتويى ءوتىپ جاتقانداي ەدى...
امال نەشىك, ادامنىڭ ەمەس, اللانىڭ دەگەنى بولادى. مۇسا كەڭپەيىلوۆ سەكسەنگە دە جەتە الماي, و دۇنيەگە اتتانىپ كەتتى, قاقاعان قىستا. توپىراق سالۋعا ۇلگەرمەي قىرقىنا جەتتىك قىستىڭ كوزى قىراۋدا بورانداتىپ...
مۇسانىڭ قۇداي قوسقان قوساعى ءماديناسى شاڭىراقتىڭ شىراقشىسى. نەمەرەلەرى ەركەجان, ديماش, الديار, دياس, ايگەرىم, ايجان, ينديرا بۇگىن شاڭىراقتىڭ شاتتىعى, كەلەشەكتە ەلدىڭ ەرتەڭى.
ۇلدارى الماس, باعلان, كەلىندەرى جۇماگۇل, زىليقا ەل قاتارلى ەڭبەك ەتىپ ءجۇر.
راسۋل عامزاتوۆ ايتقانداي:
دانا بولىپ, ەر بوپ,
شىعارعان جوق ول اتىن,
باس ءيىپ بىراق كەزىندە,
ناعىز ادام بولاتىن.
ناعىز ادام, ۇلاعاتتى ۇستاز مۇسا كەڭپەيىلوۆ بۇگىندە اڭىز ادامعا اينالدى. ونىڭ تاڭعى شىقتاي تازالىعى اڭىز, ەلگە سىڭىرگەن ەڭبەگى اڭىز, مۇحيتتاي تەرەڭ ءبىلىمى, اسا باي جان دۇنيە جاۋھارلارى اڭىز, كىسىلىگى مەن كىشىلىگى اڭىز. اڭىز... اڭىز...
ەگەر ول ءتىرى بولسا 80 جاسقا كەلەر ەدى. دوس, تۋىس, جولداس-جورا, جەرلەستەرى, شاكىرتتەرى, اراسىندا وزىنە ءتان بايسالدىلىقپەن, سابىرمەن, سالماقپەن جۇمساق جىميىپ, بالقىپ, شالقىپ, اسپانداعى اي مەن كۇندەي اينالاسىنا ءۇنسىز ساۋلە شاشىپ وتىرار ەدى. امال قانشا, وسى ايتقىڭ, جازعىڭ كەلمەيتىن «ەدى» ءسوزىن جازۋعا ءماجبۇرمىز.
الدى – سايران, سوڭى – ويران ءومىر عوي, وسىدان ەكى جىل بۇرىن ادامزاتتىڭ دۇشپانى – ارسىز اجال ارامىزدان الىپ كەتتى اياۋلى دوستى, اسقار تاۋدىڭ الماس اسىل تاسىنداي ازاماتتى.
مۇسا كەڭپەيىلوۆ ۇستاز ەدى. ۇستاز – ۇلاعاتتى ۇلى ەسىم. بالا دا, دانا دا ۇستاز الدىن كورگەن. ۇستاز بولۋ – ءوزىڭدى اياماۋ, شاكىرتتەرىڭدى ايالاۋ. سودان دا ول ەلگە اسا سىيلى, اياۋلى جان. سونداي ۇلاعاتتى ۇستاز ەدى مۇسا كەڭپەيىلوۆ. ادامنىڭ اسىلى ەدى ول. سودان دا ول ەلدىڭ ەسىندە, مىڭداعان شاكىرتتەرىنىڭ جۇرەگىندە.
سەن ەلدىڭ ەسىندە, ءوزىڭدى سۇيگەن جانداردىڭ جۇرەگىندەسىڭ اياۋلى دوس, اسىل ازامات!
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى
الماتى