اقتوبەلىك پوليتسەيلەر ەسىرتكى تۇتىنىپ, اۆتوكولىك باسقارۋ قۇقىعىنسىز ماشينا ايداعان جۇرگىزۋشىنى ۇستادى, دەپ حابارلايدى Egemen.kz Polisia.kz سايتىنا سىلتەمە جاساپ.
اقتوبەدە پاترۋلدىك پوليتسيا قىزمەتكەرلەرى 4 قازان كۇنى قىزمەت اتقارۋ كەزىندە قوناەۆ پەن سماعۇلوۆ كوشەلەرىنىڭ قيىلىسىندا "وپەل-استرا" اۆتوكولىگىن توقتاتقان, كولىك رولىندەگى 21 جاستاعى جۇرگىزۋشى بۇرىن كولىك قۇرالىن باسقارۋ قۇقىعىنان ايىرىلعان بولىپ شىقتى
بۇدان باسقا ونىڭ ەسىرتكى پايدالانۋ ناتيجەسىندە ماساڭ كۇيدە بولعانى انىقتالدى.
سىرتقى تەكسەرۋ كەزىندە جۇرگىزۋشىنىڭ شالبارىنىڭ قالتاسىنان ماريحۋاناعا ۇقساس ەرەكشە ءيىسى بار, جاسىل ءتۇستى وسىمدىك تەكتەس زات سالىنعان قاعاز پاكەت تاركىلەندى.
"بۇل فاكتىلەر بويىنشا كولىك قۇرالىن باسقارۋ قۇقىعىن بەرەتىن قۇجاتسىز, ەسىرتكىلىك ماساڭ كۇيدە كولىك قۇرالىن باسقارعانى ءۇشىن قر قك-ءنىڭ 346-بابىنىڭ 1-بولىگى (كولىك قۇرالدارىن باسقارۋ قۇقىعىنان ايىرىلعان جانە الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى, سول سياقتى كولىك قۇرالىن باسقارۋدى وسىنداي ادامعا بەرۋ نەمەسە كولىك قۇرالىن وسىنداي ادامنىڭ باسقارۋىنا جول بەرۋ) جانە قر قك-ءنىڭ 296-بابىنىڭ 2-بولىگى (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىنسىز زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ) بويىنشا تەرگەۋ باستالدى", دەلىنگەن حابارلامادا.
جۇرگىزۋشى ۋاقىتشا ۇستاۋ يزولياتورىنا قامالدى.