بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ەنەرگەتيكا ۆيتسە-ءمينيسترى سۇڭعات ەسىمحانوۆ ەلدەگى ەنەرگەتيكا ينفراقۇرىلىمىن جاڭعىرتۋ جانە جىلىتۋ ماۋسىمىنا دايىندىق بارىسى تۋرالى باياندادى, دەپ حابارلايدى Egemen.kz.
2025 جىلى ەنەرگەتيكالىق نىسانداردا اۋقىمدى جوندەۋ جۇمىستارى جۇرگىزىلدى. اتاپ ايتقاندا, 10 ەنەرگوبلوك, 63 قازاندىق جانە 39 تۋربينا جاڭارتىلدى. سونىمەن قاتار 17 مىڭ شاقىرىم ەلەكتر جەلىسى مەن 420 قوسالقى ستانتسيا جوندەۋدەن ءوتتى. جىلۋ جەلىلەرىنىڭ 323 شاقىرىمى اۋىستىرىلدى.
ەنەرگەتيكا باعىتىنداعى ەلەۋلى وزگەرىستەر
ناتيجەسىندە ەلەكتر ەنەرگياسىن ءوندىرۋ كولەمى تاريحي ەڭ جوعارى دەڭگەيگە جەتىپ, 17 273 مۆت بولدى. بۇل الدىڭعى جىلىتۋ ماۋسىمىمەن سالىستىرعاندا 7 پايىزعا ارتىق. جەو-لاردىڭ توزۋ دەڭگەيى 64 پايىزدان 61 پايىزعا دەيىن تومەندەدى.
2026 جىلى:
9 ەنەرگوبلوك, 55 قازاندىق جانە 51 تۋربينا جوندەلەدى;
17,1 مىڭ شاقىرىم ەلەكتر جەلىسى مەن 444 قوسالقى ستانتسيا جاڭارتىلادى;
377 شاقىرىم جىلۋ جەلىسى اۋىستىرىلادى.
جوسپارلانعان جۇمىستار توزۋ دەڭگەيىن 61 پايىزدان 59 پايىزعا دەيىن تومەندەتۋگە مۇمكىندىك بەرەدى.
قازىرگى تاڭدا ەنەرگونىساندار قويمالارىندا 4,7 ملن توننا كومىر بار. بۇل وتكەن جىلمەن سالىستىرعاندا 7 پايىزعا كوپ. بارلىق ستانتسيالاردا نورماتيۆتىك وتىن قورى قالىپتاستىرىلعان.
فرانتسيا قازاقستاننىڭ اتوم-ەنەرگەتيكالىق جوبالارىنا قالاي قولداۋ كورسەتەدى؟
جالپى, بيىل كوممۋنالدىق-تۇرمىستىق سەكتور مەن حالىقتىڭ كومىرگە دەگەن قاجەتتىلىگى 7,46 ملن توننانى قۇرايدى. بۇگىندە 7,68 ملن توننا كومىر دايىندالىپ, جوسپار 103 پايىزعا ورىندالعان.
ەنەرگەتيكا مينيسترلىگى كۇزگى-قىسقى كەزەڭنىڭ تۇراقتى ءوتۋىن قامتاماسىز ەتۋ باعىتىنداعى جۇمىستى جالعاستىراتىنىن مالىمدەدى. جاڭعىرتۋ شارالارى ەلدىڭ ەنەرگەتيكالىق قاۋىپسىزدىگىن كۇشەيتۋگە باعىتتالعان.