بيىلعى جولداۋ بارىسىندا مەملەكەت باسشىسى ەلىمىزدەگى ەكولوگيالىق جاعدايعا باسا نازار اۋدارىپ, ەلىمىز بويىنشا 2 ملرد اعاش وتىرعىزىلاتىنى تۋرالى بايانداعان. وسىعان وراي قازاقستان رەسپۋبليكاسى ەكولوگيا, گەولوگيا جانە تابيعي رەسۋرستار مينيسترلىگى ءميسترىنىڭ ورىنباسارى ەرلان نىسانباەۆ 2 ملرد ءتۇپ اعاشتى قالاي وتىرعىزاتىنى تۋرالى جۋرناليستەرگە ايتىپ بەردى, دەپ حابارلايدى Egemen.kz
"جولداۋعا سايكەس 2025 جىلعا دەيىن 2 ملرد ءتۇپ اعاش وتىرعىزۋ مىندەتى تۇر. بۇل دەگەنىمىز 85 مىڭ گا قاشىقتىقتى قۇرايدى. جالپى ەل كولەمىندەگى ورمان القابى 6 ملن گا-عا جەتىپ وتىر. قازاقستاندا دالالىق القاپتار وتە كوپ. ەندىگى ماقسات وسى جەرلەردى ورمانعا اينالدىرۋ", دەدى ەرلان نىسانباەۆ.
ەكولوگيا ءمينيسترىنىڭ ورىنباسارى ءسوز بارىسىندا اعاش وتىرعىزۋ پروتسەسى ءار وڭىردە كليماتتىق جاعدايعا بايلانىستى ءار ءتۇرلى ءجۇرىپ وتىراتىنىنا دا ەرەكشە نازار اۋداردى.
ء"بىز كليمات فاكتورىن دا ەسكەرۋىمىز كەرەك. مىسال رەتىندە الاتىن بولساق: وڭتۇستىك ايماققا تەرەك پەن قارا اعاش, وڭتۇستىك جانە باتىس ايماقتارىنا سەكسەۋىل اعاشتارىن, سولتۇستىكتە قايىڭ, شىرشا جانە قاراعاي اعاشتارىن وتىرعىزۋ جوسپارلانعان", دەدى ۆيتسە-مينيستر.
ەرلان نىسانباەۆ كەزدەسۋ بارىسىندا 2025 جىلعا دەيىن ءار جىل سايىن 85 مىڭ گا اۋماق قامتىلىپ, ونىڭ ءار 1 گا ىشىنە 4300 ءتۇپ اعاش وتىرعىزۋ جوسپارلانعانىن اتاپ ءوتتى. وسى 4300 ءتۇپ اعاشتى 85 مىڭ گا جەر كولەمىنە كوبەيتسەك جىلىنا 365,5 ملن ءتۇپ اعاش وتىرعىزىلادى دەگەن ءسوز. سوندا 5 جىل ىشىندە ەل بويىنشا 1 ملرد 860 ملن ءتۇپ اعاش ەگىلەدى. قالعان ءتۇپ اعاشتار, بۇرىن شىقپاي قالعان كوشەتتەردىڭ ورنىنا قايتا اعاش وتىرعىزۋدى قامتيتىنىن اتاپ ءوتتى ۆيتسە-مينيستر.
"وسىنىڭ ءبارىن ەسەپتەگەندە 5 جىل كولەمىندە پرەزيدەنتتىڭ تاپسىرماسىنا ساي 2 ملرد ءتۇپ اعاش وتىرعىزۋ نورماسىن ورىندايمىز دەپ ويلايمىن", دەيدى نىسانباەۆ.