قازاقستان ۇكىمەتى جاۋاپكەرشىلىكتەن قورقادى. بۇل جونىندە ورتالىق كوممۋنيكاتسيالار قىزمەتىنىڭ بريفينگىسىندە «قازاقستاننىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى نۇرلان ەرىمبەتوۆ ايتتى. «مەن وڭىرلەرگە ءجيى بارامىن, ەڭبەك ۇجىمدارىمەن كەزدەسەمىن. سوندا ماعان «پرەزيدەنت ەلدە نە بولىپ جاتقانىن بىلە مە؟» دەگەن ساۋالدى كوپ قويادى. جاقىندا وتكەن ۇكىمەتتىڭ كەڭەيتىلگەن وتىرىسى مەملەكەت باسشىسىنىڭ جاعدايدى انىق-قانىعىنا دەيىن بىلەتىنىن انىق كورسەتتى», - دەدى ن.ەرىمبەتوۆ.
ونىڭ ايتۋىنشا, وكىنىشكە وراي, ەلباسىنىڭ ايتقانىن, بەرگەن تاپسىرمالارىن ۇكىمەت جالعاستىرا المادى.
«بۇل اڭگىمە جالعاسىن تاپپادى. ادەتتەگىدەي, كەزەكتى جوسپارلار, ستراتەگيالار, دوكترينالار باستالدى. مۇنىڭ بارلىعى سول ايتىلعانداردىڭ ءبارىن جۋىپ-شايىپ كەتتى», - دەگەن وكىنىشىن ءبىلدىردى ەرىمبەتوۆ.
«ۇكىمەتتەگىلەردىڭ ەشبىرى جاۋاپكەرشىلىكتى مويىندارىنا العىلارى كەلمەيدى. ولاردىڭ ءسوزىن تىڭداپ كورىڭدەرشى, ولاردىڭ ءسوزى «مەملەكەت باسشىسى ايتقانداي...», «مەملەكەت باسشىسى اتاپ كورسەتكەندەي...», «مەملەكەت باسشىسى تاپسىرعانداي...» دەپ باستالىپ, سولاي اياقتالادى. ال سەنىڭ ءوزىڭنىڭ ماقساتىڭ, سەنىڭ تاپسىرماڭ, سەنىڭ يدەياڭ قايدا؟ سەنى نە ءۇشىن مينيستر, سەنى نە ءۇشىن ۇكىمەت توراعاسى, جاۋاپتى حاتشى دەيدى؟ مەن كىنالى ەمەسپىن دەپ, ءبارىن ۇلكەن كىسىگە جاپسىرا سالادى. بىزدە مۇنداي تاريحتا بولعان. مەنىڭ ويىمشا, ءبىز بۇدان ساباق الۋىمىز كەرەك», - دەگەن پىكىرىن ءبىلدىردى ول.
ساكەن مايلىباي.