سوتتالعان بالالارعا تۇماۋعا قارسى ەكپە جاسالدى

كۇز بەن قىس ايلارىندا ءورشيتىن تىنىس الۋ ورگاندارى اۋرۋلارىنىڭ الدىن الۋ, سوتتالعان بالالاردىڭ اراسىندا اتالعان اۋرۋدىڭ جاپپاي تارالماۋى ماقساتىندا جۋىردا الماتى قالاسىندا جازالارىن وتەپ جاتقان مەكەمەدەگى جاسوسپىرىمدەرگە №5 قالالىق ەمحانامەن بىرلەسىپ, ەكپە سالۋ جۇمىستارى جۇزەگە اسىرىلدى.

بالالاردى ەكپەگە دايىنداۋ بارىسىندا ماماندار ولاردا تىنىس جولدارى اۋرۋلارى بەلگىلەرىنىڭ بار-جوعىن, كوروناۆيرۋسپەن اۋىرعاندارمەن بايلانىسىن تەكسەرىپ, دەنە قىزۋلارىن ولشەدى. ەكپە 45 ءجاسوسپىرىم سوتتالعاندارعا جانە مەكەمە قىزمەتكەرلەرىنە جاسالدى.

باس بوستاندىعىنان ايىرۋ ورنىنداعى بالالاردىڭ يممۋنيتەتىن كوتەرۋدىڭ ماڭىزى زور ەكەنى بەلگىلى. بۇل ورايدا الماتى قالاسىنداعى لا-155/6 تۇزەۋ مەكەمەسىندە بالالارعا بەرىلەتىن تاماقتىڭ قۇنارلىلىعى ۇنەمى باستى نازاردا ۇستالادى.

اتالعان مەكەمەدەگى مەديتسينالىق بولىمدە 17 مەديتسينا قىزمەتكەرى, ونىڭ ىشىندە دارىگەر تەراپەۆت, ءتىس دارىگەرى, پسيحياتر مەن فتيزياتر جازالى جاسوسپىرىمدەردىڭ دەنساۋلىعىن قاداعالايدى. قانداي ءبىر اۋرۋ بەلگىلەرى انىقتالعان جاعدايدا ولار تولىققاندى ەمدەۋ جۇمىستارىن جۇرگىزەدى. جىلىنا ەكى رەت سوتتالعان بالالار №5 قالالىق ەمحانا ماماندارىنىڭ كومەگىمەن جان-جاقتى پروفيلاكتيكالىق تەكسەرۋدەن وتكىزىلەدى.

– ەكپە سالۋ كەزىندە اعزاعا ينفەكتسيالىق اگەنتتىڭ بولشەگى ەنگىزىلەدى. ۆاكتسيناداعى ينفەكتسيالىق اگەنت اۋرۋ تۋدىرمايدى, بىراق اعزانىڭ اۋرۋعا قارسى انتيدەنە وندىرۋىنە جاعداي جاسايدى, دەيدى الماتى قالاسى بويىنشا قاج دەپارتامەنتىنىڭ سوتتالعانداردى مەديتسينالىق قامتاماسىز ەتۋ توبىنىڭ باس مامانى اراي ءمادي.