رەسەي پرەزيدەنتى ۆلاديمير پۋتين تەررورشىلارعا قارسى قولدانىلاتىن تالابى قاتال زاڭعا قول قويدى. بۇل تۋرالى «ينتەرنوۆوستي. رۋ» پورتالى حابارلادى.
اتالعان جاڭا زاڭ بويىنشا ەندى لاڭكەستەردىڭ تۋعان-تۋىستارى دا بەلگىلى ءبىر دەڭگەيدە جاۋاپكەرشىلىك قامىتىن كيمەك. ناقتىسىن ايتقاندا, لاڭكەستىك ارەكەت جاساعان ادامداردىڭ تۋعان-تۋىستارى وقيعا سەبەپتەرىنەن بولعان ماتەريالدىق جانە مورالدىق شىعىندى وتەۋگە جاڭا زاڭ نەگىزىندە مىندەتتەلمەك. بۇدان بولەك, جاڭا زاڭ تەررورشىلاردىڭ اعايىندارى مەن دوستارىنىڭ دۇنيە-مۇلكىن تاركىلەۋگە جول اشىپ وتىر.
سونداي-اق, اتالعان زاڭ بويىنشا لاڭكەستىك توپ قۇرۋشىلار 20 جىلعا دەيىن باس بوستاندىعىنان ايىرىلادى, ونىڭ ۇستىنە, 1 ميلليون رۋبل كولەمىندە ايىپپۇل تولەيدى. ال لاڭكەستىك ارەكەتتەر جاساۋ ءۇشىن ارنايى جاتتىعۋدان وتكەندەر 10 جىلعا دەيىن تۇرمەدە وتىرادى ءارى 500 مىڭ رۋبل ايىپپۇل تولەيدى.
بۇل زاڭدى شەتەلدىك ساراپشىلار قاتتى سىنعا الا باستادى. ولار وسى زاڭ ارقىلى كرەمل كاۆكازدى جانە وزگە دە شەت ايماقتاردى «تۇنشىقتىرىپ» ۇستاۋدى كوزدەيدى دەپ ەسەپتەۋدە.
كەيبىر ساراپشىلار ءپۋتيننىڭ بۇل ارەكەتىن سوچي وليمپياداسى قارساڭىندا ءتارتىپتى كۇشەيتۋدىڭ امالى دەپ سانايدى.
جولدىباي بازار.