ەلىمىزدە تۇڭعىش رەت بالا باۋىرى اۋىستىرىلدى

ەلىمىزدە تۇڭعىش رەت ءتىرى دونوردان باۋىر اۋىستىرۋ وتاسى جاسالىپ, ول ءساتتى اياقتالدى. بۇل تۋرالى «جەتىنشى» تەلەارنا حابارلادى.

باۋىر تسيرروزىنا شالدىققان 6 جاسار يليا پانيحينگە وتانى رەسپۋبليكالىق جەدەل جاردەم ورتالىعى مەن شەتەل ماماندارى جاسادى. ستاتيستيكالىق دەرەككە جۇگىنسەك, رەسپۋبليكا بويىنشا 7 مىڭعا جۋىق ادام, ونىڭ ىشىندە 100 بالا دونورلىق اعزاعا مۇقتاج.

جالپى, قايسىبىر ەل بولماسىن ترانسپلانتولوگيا ماسەلەسى توڭىرەگىندە تارقاتىلماعان ءتۇيىن بار. سوندىقتان كوپتەگەن ادامدار اعزا اۋىستىرۋدا قيىندىقتارعا تاپ بولىپ جاتادى. ال 2 ايلىعىنان باستاپ باۋىردىڭ قاتەرلى دەرتىنە شالدىققان يلياعا اناسىنىڭ اپكەسى كومەككە كەلدى. ول باۋىرىنىڭ ۇشتەن ءبىر بولىگىن بەرگەن ەكەن.

«جيەنىمە تەك مەنىڭ باۋىرىم سايكەس كەلگەندىكتەن, ويلانباستان وتاعا كەلىستىم. قورىققانىممەن دارىگەرلەرگە سەنىمدى بولدىم. ەندى ولارعا العىسىم شەكسىز.ال ءوزىم قازىر تولىق قالپىما كەلدىم. بىراق باۋىرىمنىڭ ءبىر بولىگىن العاننان كەيىن, ىشىمدە بىردەڭە جوق سياقتى سەزىلەدى»,-دەيدى ەۆگەنيا يتسكو.

ءتىرى ادامنىڭ اعزا مۇشەسىن ءتىرى ادامعا سالۋدىڭ قاۋپى مەن قاتەرىن دارىگەرلەر جاقسى بىلەدى. ماماندار وسى ءىستى ودان ءارى جەتىلدىرۋ ماقساتىن كوزدەپ وتىر. وكىنىشتىسى, دونورعا مۇقتاج ناۋقاستاردىڭ جىلىنا 70 پايىزعا جۋىعى كەزەگىن كۇتىپ جۇرگەندە كوز جۇمادى ەكەن.

باقىتبەك كەنەش ۇلى.