ماۋلەن اشىمباەۆتىڭ توراعالىعىمەن سەنات بيۋروسى ءوتىپ, الداعى جالپى وتىرىستا قارالاتىن كۇن ءتارتىبى تالقىلاندى. وسى ورايدا ماجىلىستەن كەلىپ تۇسكەن زاڭ جوبالارى كوميتەتتەر اراسىندا ءبولىنىپ بەرىلدى, دەپ حابارلايدى Egemen.kz.
سەنات بيۋروسىنىڭ وتىرىسىندا ماۋلەن اشىمباەۆ پارلامەنتكە 1 قىركۇيەكتە كەلىپ تۇسكەن ءۇش جىلعا ارنالعان رەسپۋبليكالىق بيۋدجەت جوباسىنا دەپۋتاتتاردىڭ نازارىن اۋداردى. سەنات توراعاسى ەلدىڭ باستى قارجى قۇجاتىمەن جۇمىستىڭ ناقتى مەرزىمىن بەلگىلەدى.
ء"بىز وسى زاڭدى 1 جەلتوقسانعا دەيىن قابىلداۋىمىز كەرەك. ونى وزدەرىڭىز جاقسى بىلەسىزدەر. سوندىقتان سەنات دەپۋتاتتارى ماجىلىستەگى ارىپتەستەرىمەن بىرگە اتالعان زاڭ جوباسى بويىنشا جۇمىستى باستادى. رەسپۋبليكالىق بيۋدجەت جونىندەگى زاڭ جوباسىن ۋاقىتىلى ءارى ساپالى قابىلداۋ پارلامەنت پەن ۇكىمەتتىڭ ءتيىمدى ءوزارا ءىس-قيمىلىنا بايلانىستى", دەدى ماۋلەن اشىمباەۆ.
سەنات توراعاسى جۇرتشىلىق مەملەكەتتىك قارجىنى ءبولۋ ماسەلەلەرىنە ەرەكشە نازار اۋداراتىنىن, قوعامدا رەسپۋبليكالىق بيۋدجەتتى جوسپارلاۋعا قويىلاتىن تالاپتار ارتا تۇسكەنىن ەسكە سالدى. م. اشىمباەۆ ونى وڭ ءۇردىس رەتىندە سانايدى. سوندىقتان پارلامەنتشىلەر زاڭ جوباسىن مۇقيات زەردەلەپ, قوعام تاراپىنان بار سۇرانىستاردى ەسكەرە وتىرىپ پىسىقتاۋى قاجەت.
سەنات بيۋروسىنىڭ وتىرىسىندا 24 قىركۇيەكتە وتەتىن الداعى جالپى وتىرىستىڭ كۇن ءتارتىبى دە بەلگىلەندى. دەپۋتاتتار "2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى, ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىردا قول قويىلعان حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى" زاڭ جوباسىن قارايدى.
سەناتورلار پالاتانىڭ قاراۋىنا "قازاقستان رەسپۋبليكاسى مەن بىرىككەن اراب امىرلىكتەرى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى" زاڭ جوباسىن دا شىعاردى. سونىمەن قاتار, بيۋرودا ماجىلىستەن كەلىپ تۇسكەن زاڭ جوبالارى كوميتەتتەرگە ءبولىنىپ بەرىلدى.
"قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى بويىنشا الەۋمەتتىك-مادەني دامۋ جانە عىلىم كوميتەتى باس كوميتەت بولىپ بەلگىلەندى.
"قازاقستان رەسپۋبليكاسى مەن ۋكراينا اراسىنداعى قىلمىستىق ىستەر بويىنشا قۇقىقتىق كومەك تۋرالى شارتتى راتيفيكاتسيالاۋ تۋرالى" زاڭ جوباسى بويىنشا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە قورىتىندى دايىنداۋ تاپسىرىلدى.