ينفراقۇرىلىمدى دامىتۋعا باعىتتالعان "نۇرلى جول" مەملەكەتتىك باعدارلاماسىنىڭ اياسىندا 2025 جىلدىڭ سوڭىنا دەيىن رەسپۋبليكالىق ماڭىزى بار اۆتوموبيل جولدارىنىڭ بويىندا سانيتارلىق-گيگيەنالىق توراپتاردىڭ 297 بىرلىگىن ورناتۋ كوزدەلگەن. بۇدان بولەك, جەكە ينۆەستيتسيالاردىڭ ەسەبىنەن سانيتارلىق-گيگيەنالىق تورابى بار 128 جانارماي قۇيۋ بەكەتى تۇرعىزىلادى دەپ كۇتىلۋدە, دەپ حابارلايدى Egemen.kz
بيىل قايتا جاڭارتۋ جۇمىستارىنىڭ اياسىندا "شورتاڭدى-زەرەندى", "قاراعاندى قالاسىنىڭ اينالما جولى", "نۇر-سۇلتان-پاۆلودار", "جەتىباي-جاڭاوزەن", "نۇر-سۇلتان قالاسىنىڭ اينالما جولى", "ۇزىناعاش-وتار", "وسكەمەن-راحمان قاينارى" مەن "پەتروپاۆل-قورعان" اۆتوجولدارىندا 22 سانيتارلىق توراپ قويىلادى. 2021 جىلى سانيتارلىق-گيگيەنالىق توراپتىڭ 40, 2022 جىلى – 50, 2023 جىلى – 55, 2024 جىلى – 65 جانە 2025 جىلى - 87 بىرلىگى ورناتىلادى دەپ جوسپارلانۋدا.
سونىمەن قاتار, 2025 جىلدىڭ سوڭىنا دەيىن حالىقارالىق جانە رەسپۋبليكالىق ماڭىزى بار جولداردىڭ بويىندا جەكە ينۆەستيتسيالاردىڭ ەسەبىنەن سانيتارلىق-گيگيەنالىق تورابى بار Compass, قازمۇنايگاز, Helios, Sinooil جانە Kaztransgas سياقتى كومپانيالاردىڭ 128 جانارماي قۇيۋ بەكەتى قويىلادى.
بۇگىنگى تاڭدا "الماتى-قورعاس", "الماتى-تاشكەنت", "سامارا-شىمكەنت", "اقتوبە-مارتىق", "نۇر-سۇلتان-تەمىرتاۋ", "الماتى-وسكەمەن", "ەكاتەرينبۋرگ-الماتى" مەن "دوسسور-اقتاۋ تەڭىز پورتى" اۆتوموبيل جولدارىندا 18 جانارماي قۇيۋ بەكەتىنىڭ قۇرىلىسى جۇرگىزىلىپ جاتىر.
جول بويىنداعى سەرۆيستى دامىتۋ ماسەلەسى قر يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ باستى نازارىندا.
ەسكە سالايىق, "قازاۆتوجول" ۇك" اق اۆتوجولداردىڭ اقىلى ۋچاسكەلەرىندە جەكە ينۆەستيتسيالار ەسەبىنەن سانيتارلىق-گيگيەنالىق توراپتارى بار مودۋلدىك پاۆيلونداردى ورناتۋ بويىنشا كونكۋرس جاريالاعان بولاتىن.