كەشە مەملەكەت باسشىسى نۇرسۇلتان نازارباەۆ پرەزيدەنت اكىمشىلىگىنىڭ قىزمەتىن جەتىلدىرۋ ماسەلەلەرىنە ارنالعان كەڭەس وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
كەشە مەملەكەت باسشىسى نۇرسۇلتان نازارباەۆ پرەزيدەنت اكىمشىلىگىنىڭ قىزمەتىن جەتىلدىرۋ ماسەلەلەرىنە ارنالعان كەڭەس وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆ پرەزيدەنت اكىمشىلىگىنىڭ يدەولوگيالىق, اۋماقتىق-ۇيىمداستىرۋ جانە ەكونوميكالىق باعىتتار اياسىنداعى ءتيىمدى جۇمىسىن جولعا قويۋدىڭ ماڭىزدىلىعىن اتاپ ءوتتى.
مەملەكەت باسشىسى تاياۋدا ۇكىمەتتىڭ كەڭەيتىلگەن وتىرىسىندا بەرىلگەن تاپسىرمالار بويىنشا ءتيىستى جۇمىستار جۇرگىزىلىپ, ولار بۇقارالىق اقپارات قۇرالدارىندا كەڭىنەن جاريالانۋى كەرەكتىگىن تاعى دا ەسكە سالدى.
– اپپارات مەملەكەتتىك باعدارلامالاردىڭ ورىندالۋ بارىسىن باقىلاپ, كەمشىلىكتەردى ايقىنداۋعا جانە ولاردى ءتيىمدى ىسكە اسىرۋ جونىندە ناقتى شارالاردى بەلگىلەۋگە ءتيىس. ۇكىمەتتىڭ كەڭەيتىلگەن وتىرىسىندا مەنىڭ تاراپىمنان ايتىلعان سىنداردان ءتيىستى قورىتىندى شىعارىلۋى كەرەك. بۇل باعىتتاردا قانداي جۇمىستار جۇرگىزىلىپ جاتقانى, كىمدەر جاۋاپقا تارتىلعانى جانە جازالانعانى تۋرالى ءاربىر فاكت بويىنشا حالىق الدىندا ەسەپ بەرىپ, باق-تاردا جاريالاۋ تۋرالى تاپسىرما بەرىلگەن بولاتىن. مەن ايتقان سىن بويىنشا تەك «تۇرعىنۇي-قۇرىلىسجيناقبانكىنىڭ» جاعدايى جونىندەگى دەرەكتەر عانا ايتىلدى, وزگە ەشقانداي اقپارات بولعان جوق. ءتىپتى, بۇل رەتتە مەنىڭ تاراپىمنان ايتىلعان سىننىڭ ءبىر بولىگى گازەت بەتتەرىندە كورىنىس تاپپاعان جانە تەلەەفيردەن دە بەرىلمەگەن. سوندىقتان, اركىمنەن تەك ءوز باعىتى بويىنشا باعدارلامالاردىڭ ورىندالۋىمەن عانا ەمەس, سونداي-اق, ۇكىمەتتىڭ, مينيسترلىكتەر مەن ۆەدومستۆولاردىڭ جۇمىسىنداعى كەمشىلىكتەردى جويۋ جونىندەگى بارلىق نۇسقاۋىمنىڭ ورىندالۋى بويىنشا قاتاڭ تۇردە جۇمىس جۇرگىزۋىن تالاپ ەتەمىن, – دەدى مەملەكەت باسشىسى.
بۇعان قوسا, قازاقستان پرەزيدەنتى ەلىمىزدەگى پاتريوتتىق تاربيە مەن ءدىني احۋال سالاسىنداعى جۇمىستاردىڭ تيىمدىلىگى كەمشىن ءتۇسىپ جاتقانىن اتاپ كورسەتتى.
سونداي-اق, نۇرسۇلتان نازارباەۆ وڭىرلەردىڭ الەۋمەتتىك-ەكونوميكالىق دامۋىنا مونيتورينگ جانە تالداۋ جۇرگىزۋ بولىگىندە پرەزيدەنت اكىمشىلىگىنىڭ قىزمەتىن جاقسارتۋ قاجەتتىگىنە توقتالدى.
– پرەزيدەنت اكىمشىلىگىنىڭ مەملەكەتتىك ينسپەكتورلارى وبلىستارداعى احۋالدى تولىق ءبىلمەيدى. ولار ءوز وڭىرلەرىندەگى بارلىق اكىمدەردى, اۋىلدىق اكىمدەردى جۇزبە-ءجۇز تانىپ, ارقايسىسىنىڭ جۇمىس ەرەكشەلىگىن اجىراتا بىلۋگە ءتيىس. مەملەكەتتىك ينسپەكتوردىڭ جۇمىسى بارلىق ىستەن حاباردار بولۋ ءۇشىن دە ىستەلەدى. مىسالى, باتىس قازاقستان وبلىسىنا ساپار بارىسىندا مەملەكەتتىك ينسپەكتور قاجەتتى اقپاراتتىڭ ءبارىن بىلمەيتىن بولىپ شىقتى. ول جاڭادان كەلگەن ادام بولۋى ءمۇمكىن ءارى ءبارىنىڭ قىر-سىرىن تەرەڭ مەڭگەرىپ ۇلگەرمەگەن شىعار. بىراق, سونىڭ وزىندە ولاردا ءوڭىر جونىندە جەرگىلىكتى اتقارۋشى بيلىك قىزمەتىندەگى جەتىستىكتەر مەن كەمشىلىكتەردى, سونداي-اق, پروبلەمالار مەن ىسكە اسىرىلىپ جاتقان جوبالاردى قامتيتىن تولىق اقپارات بولۋعا ءتيىس. ولاي بولماعان جاعدايدا ولاردىڭ اتقارىپ وتىرعان لاۋازىمىنا سايكەستىگى جونىندە بەلگىلى ءبىر قورىتىندى جاساۋ قاجەت بولادى, – دەدى قازاقستان پرەزيدەنتى.
كەڭەس قورىتىندىسىندا مەملەكەت باسشىسى قارالعان ماسەلەلەرگە جانە بيىلعى جىلدىڭ سوڭىنا دەيىن جوسپارلانعان قوعامدىق ماڭىزى بار ءىس-شارالارعا ءتيىمدى ۇيىمداستىرۋشىلىق-اقپاراتتىق قولداۋ كورسەتۋگە قاتىستى بىرقاتار ناقتى تاپسىرمالار بەردى.
-----------------------------------------
سۋرەتتى تۇسىرگەندەر
س.بوندارەنكو, ب.وتارباەۆ.