1-15 قىركۇيەك ارالىعىندا وتكەن ىزدەۋ جۇمىستارى بارىسىندا №372 جانە №365 جول ايرىعىندا (سايقىن اۋىلى, بوكەي ورداسى اۋدانى, باتىس قازاقستان وبلىسى) ءىز-ءتۇسسىز كەتكەن بولىپ ەسەپتەلگەن 17 جاۋىنگەردىڭ سۇيەگى تابىلدى, دەپ حابارلايدى Egemen.kz
"استراحان-ساراتوۆ تەمىر جولى بويىندا باۋىرلاستار زيراتى بار. ءىز-ءتۇسسىز كەتكەن جاۋىنگەرلەردىڭ سۇيەكتەرى ءالى دە سول جاقتا جاتىر. سول سەبەپتەن «Atamnyn Amanaty» قوعامدىق بىرلەستىگى ىزدەۋ جۇمىستارىن وتكىزۋ تۋرالى شەشىم قابىلدادى. بۇل ءبىز ۇيىمداستىرىپ وتىرعان العاشقى ىزدەۋ جۇمىستارى. باتىس قازاقستان وبلىسىنىڭ اكىمدىگىمەن كەلىسسوزدەر جۇرگىزىلىپ, ىزدەۋ جاساعىنا قاجەتتى قارجىلاي قولداۋ كورسەتىلدى. قازبا جۇمىستارى 1 قىركۇيەك كۇنى باستالدى. بولاشاقتا وسى باعىتتاعى شارالاردى تاعى ۇيىمداستىرامىز دەپ جوسپارلاپ وتىرمىز", دەيدى "Atamnyn Amanaty" قوعامدىق بىرلەستىگىنىڭ باسقارما توراعاسى مۇرات مولداعاليەۆ.
"Atamnyn Amanaty" قوعامدىق بىرلەستىگى ۇيىمداستىرعان ىزدەۋ جۇمىستارى كەڭەس وداعىنىڭ باتىرى مانشۇك مامەتوۆا اتىنداعى ىزدەۋ جاساعىمەن بىرلەسە وتىرىپ جاسالدى. سولداتتاردىڭ سۇيەكتەرى تابىلعان سوڭ قوعامدىق بىرلەستىكتىڭ ىزدەۋشىسى مۇراعاتتاردان قازا بولعانداردىڭ تىزىمدەرىن تاپقان. ول تىزىمدە جاۋىنگەرلەردىڭ اتى-ءجونى, تۋعان جىلى جانە مايدانعا اتتانعان جەرى جازىلعان. سول تىزىمدەر بويىنشا Atamnyn Amanaty» قوعامدىق بىرلەستىگى سولداتتاردىڭ تۋىستارىن ىزدەۋ شارالارىن وتكىزەدى. تىزىمگە سايكەس جاۋىنگەرلەر رەسەي, ۋكراينا, بەلارۋس جانە تاتارستاننان بولعان.
"ەڭ الدىمەن №365 جول ايرىعىندا ءبىر سولداتتىڭ سۇيەگى تابىلدى. بولجام بويىنشا ول اعا سەرجانت نەمەسە ستارشينا بولعان. ول اسكەري فورمانىڭ فراگمەنتتەرىندە كەستەلەنگەن جۇلدىز بويىنشا بەلگىلى بولدى. ول تىنىق مۇحيتى فلوتىنىڭ تەڭىز جاياۋ اسكەرى بولدى دەپ ايتۋعا بولادى, سەبەبى بۇل سولدات تۋرالى اقپارات تىنىق مۇحيتى فلوتىنىڭ تىزىمدەرىندە بار. كەلەسى كۇندەرى №372 جول ايرىعىندا تاعى اتقىشتار ارتيللەريالىق بريگاداسىنىڭ 16 سولداتتىڭ سۇيەكتەرى تابىلدى. بولجام بويىنشا, ولاردىڭ ەكەۋى كوماندير بولعان. مۇراعاتتان ىزدەپ تابىلعان اقپارات بويىنشا جاۋىنگەرلەر ستالينگراد جاققا قاراي بارا جاتقان. بۇل تۋرالى اقپارات جاۋعا بەلگىلى بولىپ, جاۋ اۆياتسياسىنىڭ شابۋىلى جاسالادى", دەيدى "Atamnyn Amanaty" قوعامدىق بىرلەستىگىنىڭ ىزدەۋشىسى سەرگەي فەدورەنكو