ماقتاارالدا ماقتا تەرىمى باستالدى

5,5 گەكتار جەرگە "ماقتاارال 4017" ماقتا سورتىن ەككەن قوجالىق 27 تسەنتنەردەن ءونىم الۋدا. ماقتا تەرىمىنە جەرگىلىكتى اۋىل تۇرعىندارى قاتىسىپ, كەلىسىنە 30 تەڭگەدەن ەڭبەكاقىلارى تولەنۋدە. قوجالىق باسشىسى جيناعان ءونىمىن "كەڭەسشىل" ماقتا قابىلداۋ بەكەتىنە وتكىزبەكشى ەكەن.

بيىل ماقتاارالدىق شارۋالار جالپى 38,2 مىڭ گەكتار جەرگە ماقتا ءشيتىن سەبكەن بولاتىن. مىنە, كۇز كەلىپ, ديقاندارىمىز قىرمانىن "اق التىنعا" تولتىرۋدى باستاپ كەتتى. "كۇزگى جيىن-تەرىم ناۋقانىن ءساتتى وتكىزۋ - ءبارىمىزدىڭ ورتاق مىندەتىمىز" دەگەن بولاتىن اۋدان اكىمى باقىت اسانوۆ.

بۇگىندە اۋدان بويىنشا ماقتا تەرىم ناۋقانىنا 15 بريگادا, 403 تەرىمشى قاتىسۋدا. قازىرگى تاڭدا نەگىزىنەن قول تەرىم جۇمىستارى جۇرگىزىلىپ, 125 گەكتار ماقتا القابىنان 269,5 توننا "اق التىن" قامباعا جينالدى.  

ماقتا تەرىم ناۋقانىنا دايىنداۋ ءۇشىن كومبايندارعا جوندەۋ جۇمىستارى تولىقتاي جۇرگىزىلگەن. قوسىمشا اۋدانىمىزعا اقش-تان 23 دانا "دجون-دير" ماقتا تەرىم كومباينى ساتىپ الىنعان. سوندىقتان, بىلتىرعىعا قاراعاندا بيىل ماقتا تەرىم كومبايندارىنان قيىندىقتار تۋمايدى. وسىنىڭ ارقاسىندا ماقتانى ماشينالىق ادىسپەن تەرۋ 66%-عا جەتەتىن بولادى. جالپى بيىلعى ماقتا تەرىم ناۋقانىنا 514 دوڭعالاقتى تراكتور, 1206 تىركەمە جانە 151 كومباين قاتىسادى دەپ كۇتىلۋدە. 

بىلتىر اۋداندا ماقتا وندىرەتىن 5 زاۋىت جانە ماقتا قابىلدايتىن 60-تان استام بەكەت شارۋالارعا قىزمەت كورسەتكەن ەدى. بيىل دا بۇل ءوندىرىس ورىندارى جيىن-تەرىم ناۋقانىنا دايىندالۋدا. سونداي-اق, كۇزگى دالا جۇمىستارىن جۇرگىزۋگە مەملەكەت تاراپىنان جەڭىلدەتىلگەن باعامەن جانار جاعارماي شارۋالارعا تاراتىلۋدا.