جۋىردا قازاقستان-ءۇندىستان بىرلەسكەن جۇمىس توبىنىڭ ساۋدا-ەكونوميكالىق ىنتىماقتاستىق جونىندەگى 7-وتىرىسى ءوتتى.
ونلاين رەجىمدەگى بەينەكونفەرەنتسيا قازاقستاننىڭ ساۋدا جانە ينتەگراتسيا ۆيتسە-ءمينيسترى قايرات تورەباەۆ پەن ءۇندىستاننىڭ ساۋدا جانە ونەركاسىپ ءمينيسترىنىڭ ورىنباسارى بيديۋت بەحاري سۆەيننىڭ تەڭتوراعالىعىمەن ءوتتى. شاراعا ەكى ەلدىڭ توتەنشە جانە وكىلەتتى ەلشىلەرى, سونداي-اق مۇددەلى مەملەكەتتىك ورگاندارى مەن ۇيىمدارىنىڭ وكىلدەرى قاتىستى.
قايرات تورەباەۆ اتاپ وتكەندەي, قازاقستان ۇندىستانمەن ءوزارا ءتيىمدى ساۋدا-ەكونوميكالىق ىنتىماقتاستىقتى ودان ءارى دامىتۋعا ۇلكەن ءمان بەرەدى. جۇمىس توبىنىڭ وسى جولعى ونلاين جيىنى قازاقستان باسشىسى ق.توقاەۆتىڭ ۇندىستانعا ساپارىنا دايىندىق كەزەڭدەرىنىڭ ءبىرى بولىپ تابىلادى.
وتىرىستا قىزمەت كورسەتۋدىڭ ءتۇرلى سالالارىنداعى ىنتىماقتاستىق ماسەلەلەرى تالقىلاندى. ساۋدا, ينۆەستيتسيالار, كولىك جانە بايلانىس, اۋىل شارۋاشىلىعى, ەنەرگەتيكا, ونەركاسىپ جانە تاعى باسقا سالالارداعى اتقارىلعان جۇمىستار ەكى مەملەكەتتىڭ اراسىنداعى ساۋدا كولەمىنىڭ ۇلعايۋىنا وڭ اسەر ەتۋى ءتيىس.
تالقىلاۋ بارىسىندا قازاقستاندىق تاراپ ءۇندى تاراپىن مەتاللۋرگيا, تاماق, حيميا, ماشينا جاساۋ ونەركاسىبى جانە قۇرىلىس تاۋارلارى سياقتى سالالاردا جالپى سوماسى 271,4 ملن دوللاردى 60 ءتۇرلى تاۋاردى جەتكىزە الاتىنىن ايتىپ, قازاقستاننىڭ ەكسپورتتىق الەۋەتىن ۇلعايتۋ مۇمكىندىگىن جەتكىزدى. ارىپتەس ەلگە قازاقستان مەن ورتالىق ازيا ەلدەرىنەن يران ارقىلى ۇندىستانعا لوگيستيكالىق سەرۆيس ۇسىندى.
ەكى ەلدىڭ ونەركاسىپتىك كووپەراتسياسىن ودان ءارى دامىتۋ ماقساتىندا ءبىزدىڭ تاراپ اۋعانستان مەن ءۇندىستاندى ورتالىق ازيامەن جانە ەۋروپامەن, ورال, ءسىبىر جانە قيىر شىعىس وڭىرلەرىمەن بايلانىستىراتىن «سولتۇستىك-وڭتۇستىك» ورتالىق ازيا كولىك-ترانزيتتىك ەكونوميكالىق ءدالىزىن دامىتۋ تۋرالى بىرلەسكەن زەرتتەۋ جۇرگىزۋدى ۇسىندى.
2019 جىلى قازاقستان مەن ءۇندىستان اراسىنداعى تاۋار اينالىمى 1,9 ملرد اقش دوللارىن قۇراعانىن ايتا كەتەيىك. بۇل 2018 جىلعا قاراعاندا 55,8%-عا جوعارى كورسەتكىش. قازاقستاننان ۇندىستانعا جىبەرىلگەن ەكسپورت كولەمى بىلتىر 65%-عا ءوسىپ, 1,6 ملرد دوللارعا جەتتى. ءۇندىستاننان كەلەتىن يمپورت بولسا 20,1-عا ۇلعايىپ, 291,6 ملن دوللار بولدى. بيىل جەتى ايدا ەكى ەل اراسىنداعى تاۋار اينالىمى 2,2 ەسە ارتقانىن دا اتاپ وتكەن ءلازىم.