جارقايىڭ اۋدانىنىڭ ديقاندارى كوكتەمدە 512 مىڭ گەكتار القاپقا ءداندى داقىلدار تۇقىمىن سىڭىرگەن بولاتىن. جاز تىم ىستىق, قۇرعاشقىلىق بولدى. كۇزدىڭ باسىندا قارا جاۋىننىڭ سوڭى بۇرشاققا ۇلاستى. وسىنداي تابيعات تاقسىرەتى تيگەن ەگىننىڭ 89 مىڭ گەكتارى ورتاشا دەڭگەيدە, دەپ حابارلايدى Egemen.kz
مامانداردىڭ ەسەپتەۋىنە قاراعاندا, 17 مىڭ گەكتار ەگىستىك القاپتارى زيان شەككەن. ايتسە دە, قالعان جەردەن تولىمدى ءونىم الساق دەگەن ءۇمىت بار.
–گەكتار بەرەكەسى 10 تسەنتنەردەن اينالادى دەپ بولجاپ وتىرمىز,–دەيدى اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باس مامانى مۇرات بەرلىبەكوۆ,–بيدايدىڭ ىلعالدىلىعى 20 پروتسەنت شاماسىندا. وسى اپتادا اۋا رايى ءبىرشاما تۇراقتى بولدى. ىلعالدىلىق تا 13 پروتسەنتكە دەيىن ءتۇستى.
ءبىر ايتا كەتەرلىگى, جارقايىڭ اۋدانىنىڭ القاپتارىنداعى استىقتىڭ قامىرلىلىعى جوعارى. سول سەبەپتى وزگە وڭىرلەرگە قاراعاندا, بيدايى قىمبات بولادى. ەڭبەكتىڭ ەسەسى قايتاتىن جەر دە وسى.
بۇگىنگى تاڭدا 885 استىق كومباينى اۋا رايىنىڭ ءاربىر اشىق ءساتىن پايدالانىپ, تىنىمسىز ەڭبەك ەتۋدە. كۇزگى دالا جۇمىستارىنا 9750 توننا كەپىلدەندىرىلگەن جانار-جاعار ماي بولىنگەن. اۋداندا سىيىمدىلىعى 428 مىڭ توننا بولاتىن 7 ءىرى استىق قابىلداۋ ورنى بار. باستىرىلعان ءدان ۇزدىكسىز جەتكىزىلۋدە. كۇن رايى دۇرىس بولسا, جارقايىڭنىڭ جانسەبىل ديقاندارى كۇزگى ەگىن وراعىن ەكى اپتادا ەڭسەرەمىز دەپ وتىر.
اقمولا وبلىسى,
جارقايىڭ اۋدانى