مەملەكەتتىك حاتشى قىرىمبەك كوشەرباەۆ باستاعان دەلەگاتسيا اباي اۋدانىنداعى كورسە كوز تويىپ, كوڭىل مارقاياتىنداي يگىلىكتى ىستەردىڭ اتقارىلىپ جاتقانىنا كۋا بولدى, دەپ حابارلايدى Egemen.kz
اتاپ ايتساق, اباي اۋدانىنىنىڭ ورتالىعى – قاراۋىلداعى 300 ورىندىق مەكتەپ-ليتسەي قولدانىسقا بەرىلدى. جاڭادان اشىلعان ءبىلىم ورداسىندا نازارباەۆ زياتكەرلىك مەكتەپتەرىنىڭ ستاندارتى بويىنشا وقىتىلماق. البەتتە, ەلدەگى كارانتيندىك شارالارعا بايلانىستى ۇلكەن سىنىپتار قاشىقتىقتان وقىسا, باستاۋىش سىنىپتار بەلگىلەنگەن سانيتارلىق ەرەجەلەردى ساقتاي وتىرىپ مەكتەپ قابىرعاسىندا ءبىلىم الادى. اباي اتىنداعى جاڭا مەكتەپ-ليتسەيدىڭ ديرەكتورى روللان تىلەۋحانوۆتىڭ ايتۋىنشا, 300 ورىندىق مەكتەپتى ەكى اۋىسىمعا شاقتاسا, 600 بالاعا دەيىن وقىتۋعا قۋاتى جەتەدى ەكەن. ولاي دەپ وتىرعانى, اۋدان ورتالىعىندا حالىق سانى جىل سايىن ءوسىپ كەلەدى.
جيدەبايداعى تاريحي نىساندار دا جاڭعىرىپ, كەلەشەك ۇرپاق ابايدىڭ تاعىلىمىنان تاربيە الىپ, عيبراتتى سوزدەرىن ساناعا سىڭىرەتىندەي يگى ىستەر اتقارىلۋدا. "اباي-شاكارىم" موۆزەلەي كەشەنى جوندەۋدەن ءوتتى, قۇنانباي جاتقان اقشوقى اباتتاندىرىلدى.
– ابايدىڭ 175 جىلدىعىندا ءبىز اقىننىڭ مادەني جانە رۋحاني مۇراسىنا كوڭىل بولدىك. پرەزيدەنت باستاماسىمەن ابايدىڭ شىعارمالارى وركەنيەتتى ون ەلدىڭ تىلىنە اۋدارىلدى. نۇر-سۇلتان قالاسىندا "اباي اكادەمياسى" عىلىمي-زەرتتەۋ ورتالىعى قۇرىلدى. ابايدىڭ تۋىپ-وسكەن جەرى, قۇنانبايدىڭ جاتقان جەرى ۇلكەن مادەني ورتالىقتارعا اينالدى. از ۋاقىتتا ايتارلىقتاي ءىس تىندىرعان شىعىس قازاقستان اكىمدىگىنە العىس ايتامىن. ويتكەنى جۇمىستى مەملەكەتتىك تاپسىرىس رەتىندە عانا ەمەس, شىن نيەتتەرىمەن اتقارعان ەكەن, – دەپ ريزاشىلىعىن ءبىلدىردى قىرىمبەك كوشەرباەۆ.