قاراعاندى وبلىسىنىڭ بارلىق اۋداندارىندا استىق جيناۋ ناۋقانى باستالدى. بۇل تۋراسىندا وبلىستىق اۋىل شارۋاشىلىعى باسقارماسىنىڭ باسشىسى ساعىنجان اپاقاشوۆ مالىمدەدى.
– بۇگىندە ءداندى داقىلداردىڭ ورتاشا ونىمدىلىگى ءبىر گەكتارعا 9,8 تسەنتنەردى قۇرايدى. قازىرگى ۋاقىتتا 59,1 مىڭ توننا استىق باستىرىلدى. كارتوپ 275 گەكتار الاڭنان جينالدى, ورتاشا ونىمدىلىك – گەكتارىنان 156 تسەنتنەردەن كەلەدى. كوكونىستىڭ جالپى جيناعى 2 320 توننانى قۇرايدى, – دەدى باسقارما باسشىسى.
بيىل بولجام بويىنشا, جينالعان استىقتىڭ جالپى مولشەرى ءار گەكتاردان 9,9 تسەنتنەردەن بولۋى ءتيىس. كارتوپتىڭ جالپى مولشەرى شامامەن 284,7 مىڭ توننا بولادى دەپ جوسپارلانعان.
قازىرگى ۋاقىتتا استىق جيناۋ سىندى جاۋاپتى ناۋقانعا 2 345 كومباين جۇمىلدىرىلعان. ال كارتوپتى القاپتا 16 كومباين قارقىندى ەڭبەكتىڭ كورىگىن قىزدىرۋدا. بۇدان بولەك, كارتوپ قازعىش 72 تەحنيكا دا دالا ءتوسىن دۇبىرگە بولەپ, ىركىلىسسىز جۇمىس ىستەۋدە. وڭىردەگى شارۋاشىلىق باسشىلارى قولداعى تەحنيكانى جاڭارتىپ وتىرۋعا باسا ءمان بەرەدى. مىسالى, بيىل ەگىن وراعىنا تۇسكەن كومباينداردىڭ 12-ءسى جاڭادان ساتىپ الىنعان.
تابيعاتىنىڭ ەرەكشەلىكتەرىنە بايلانىستى بيىل ارقا توسىندە استىق جيناۋ ناۋقانى 20 قازاندا تولىعىمەن اياقتالادى دەپ جوسپارلانعان. ال ديقاندار الدىنا كارتوپتى قازان ايىنىڭ 1-جۇلدىزىنا دەيىن ىسىراپسىز جيناپ الۋ مىندەتى قويىلدى.
بيىل اۋا رايىن بولجاۋشىلاردىڭ مالىمەتىنە قاراعاندا, وبلىستا قىركۇيەك ايى جاۋىن-شاشىندى بولاتىن ءتۇرى بار. ديقان قاۋىمى بۇعان دا جان-جاقتى دايىندىق جۇمىستارىن قاراستىرىپ جاتىر. مىسالى, اۋا رايى استىق جيناۋعا بوگەت بولماۋى ءۇشىن, وڭىرلەردە استىق كەپتىرگىشتەر ازىرلەنۋ ۇستىندە.
جالپى, وڭىردەگى بيىلعى استىق جيناۋ ناۋقانى وبلىس باسشىلىعىنىڭ تىكەلەي باقىلاۋىندا بولماق.
قاراعاندى وبلىسى