تۇزەۋ مەكەمەسىندەگى سوتتالعاندار قالاي ءبىلىم الىپ جاتىر

قىزىلوردا قالاسىنداعى  زك-169/5 مەكەمەسىندە جازاسىن وتەپ جۇرگەن سوتتالعاندار اراسىندا  2019-2020 وقۋ جىلىندا 26 سوتتالعان ورتا ءبىلىم الدى. ونىڭ ىشىندە 2 سوتتالعان 9 سىنىپتى بىتىرسە, 8 سوتتالعان 11 سىنىپتى ءتامامدادى. ال, قالعان سوتتالعاندار ورتا ءبىلىمىن جالعاستىرادى.

بۇل ازاماتتارعا قىزىلوردا قالالىق ءبىلىم ءبولىمىنىڭ «جالپى ءبىلىم بەرەتىن كەشكى مەكتەپ» مۇعالىمدەرى ءبىلىم بەردى. ەلىمىزدەگى كوروناۆيرۋس ىندەتىنىڭ ودان ءارى ءورشىپ, تارالماۋىنىڭ الدىن الۋ ماقساتىندا ءبىلىم بەرۋ ورىندارى ونلاين وقىتۋ جۇيەسىنە كوشكەن بولاتىن. سوتتالعاندارعا ء بىلىم بەرەتىن كەشكى مەكتەپ تە ونلاين جۇيەسىنە كوشىپ,جازاسىن وتەۋشىلەر ء ىىى, ءىV توقساندا ينتەرنەت جەلىسى قوسىلعان   ارنايى كابينەتتە ونلاين رەجيمىندە ءبىلىم الدى. 

مەكەمەنىڭ ىشكى كۇن تارتىبىنە سايكەس, كۇنىنە 2 ساعاتتان مەكەمە كىتاپحاناسىنا بارىپ, بەرىلگەن تاپسىرمالاردى ورىندادى. مەكەمە اكىمشىلىگى سوتتالعانداردى  وقۋ-قۇرال جابدىقتارىمەن تولىقتاي  قامتاماسىز ەتتى. قازىرگى تاڭدا مەكەمەدە 2020-2021 وقۋ جىلىنا دايىندىق جۇمىستارى جۇرگىزىلىپ جاتىر. سوتتالعاندار اراسىنان 10 ازامات ورتا ءبىلىم الۋعا ءوتىنىش ءبىلدىردى. وسى ازاماتتاردىڭ ىشىندە مۇلدە جازۋ- سىزۋ بىلمەيتىن سوتتالعاندار دا كەزدەستى. جاقىندا مەكەمەگە جازاسىن وتەۋگە كەلگەن نۇرسۇلتان وسىنداي جانداردىڭ ءبىرى. ول دا ورتا ءبىلىم الۋعا ءوز ءوتىنىشىن بەردى.جاستىقتىڭ جالىنىمەن جاڭىلىپ,  جازا باسقان ازامات, ەندى جازا وتەۋىمەن بىرگە ورتا ءبىلىم  الىپ شىعادى.  بۇل مەكەمەدە كەشكى مەكتەپتىڭ اشىلعانىنا 7 جىل بولدى. وسى 7 جىل ىشىندە 100-دەن استام سوتتالعان ورتا ءبىلىم العان. ولار جازا مەرزىمىن وتەي ءجۇرىپ,  ودان ءارى كاسىپتىك مامان يەسى بولۋىنا مۇمكىندىگى  بار.

2019-2020 وقۋ جىلىندا مەكەمەدە جازاسىن وتەپ جۇرگەن 62 ازامات  ارناۋلى ءبىلىمىن دالەلدەيتىن قۇجات الدى. ونىڭ ىشىندە 23 سوتتالعان اعاش ۇستاسى, 22 سوتتالعان تىگىنشى, 17 سوتتالعان گازەلەكتردانەكەرلەۋشى ماماندىعىن الدى.

 قىزىلوردا قالاسىندا م.ىقسانوۆ اتىنداعى «قىزىلوردا قۇرىلىس جانە بيزنەس» جانە «قىزمەت كورسەتۋ جانە سەرۆيس» كوللەدجىنىڭ  مەكەمەدە اشىلعانىنا بيىل جەتىنشى جىل. جەتى جىلدا ءار ءتۇرلى ماماندىق بويىنشا  300-دەن استام سوتتالعان ديپلوم العان. 

ماماندىقتارى بويىنشا ديپلوم العان ازاماتتار جازا مەرزىمى اياقتالعانشا وسى مەكەمەدە اقىلى جۇمىسقا ورنالاسىپ, جالاقى الىپ, قىلمىسپەن كەلتىرگەن شىعىنداردى وتەۋگە مۇمكىندىكتەرى بار. بۇل ازاماتتار جاقسى وقىعانى ءۇشىن اي سايىن 32 مىڭ كولەمىندە شاكىرتاقى الىپ تۇردى. سوتتالعانداردىڭ جەكە ىستەرى بويىنشا اتقارۋ پاراقتارى بولسا, شاكىرتاقىسىنان بەلگىلەنگەن سوما ۇستالىپ وتىردى. سوتتالعانداردىڭ تۋىستارى ءۇشىن ماتەريالدىق قولداۋ كورسەتۋ ءۇشىن, جەكە باسىنا قاتىستى قاجەتتى زاتتاردى ساتىپ الۋ ءۇشىن شاكىرتاقىسىن پايدالانۋعا مۇمكىندىك بەرىلدى.

مەكەمەدەگى ازاماتتار اراسىندا ءۇش ماماندىق(  گازەلەكتردانەكەرلەۋشى ,تىگىنشى, اعاش ۇستاسى)  يەسى اتانعان ازاماتتار دا بار. ءۇش ماماندىقتىڭ يەسى نۇرلان قازىر مەكەمەنىڭ وندىرىستىك ايماعىنداعى تىگىن تسەحىندا تىگىنشى بولىپ جۇمىس ىستەيدى. ءبىزدى قوعامنان سوتتالعان دەپ بولمەي, جەكە تۇلعا رەتىندە قالىپتاسۋىمىزعا جاعداي جاساپ, ءبىلىم الۋىمىزعا, ماماندىق يەسى اتانۋىمىزعا مۇمكىندىك جاساپ وتىرعان مەكەمە اكىمشىلىگىنە نۇرلان العىسىن ءبىلدىردى.

مەكەمەدەگى سوتتالعاندار اراسىندا كاسىپتىك مامان يەسى اتانعىسى كەلگەن 75 ازامات 2020-2021 وقۋ جىلىنا ءۇش ماماندىق بويىنشا (اعاش ۇستاسى, تىگىنشى, گازەلەكتردانەكەرلەۋشى)  ءوتىنىش ءبىلدىردى.

جازاسىن وتەۋشىلەر وسىندا مەرزىمدەرى بىتكەنشە بەلگىلى ءبىر ماماندىقتى يەلەنىپ, مەكەمەدەن  شىققاندا جاڭا ومىرگە قادام باسۋعا مۇمكىندىك الادى.