ەلوردالىق مەكتەپتەردىڭ كەزەكشى سىنىپتى قابىلداۋعا دايىندىق بارىسىمەن تانىسۋ ءۇشىن اليحان بوكەيحان اتىنداعى №76 مەكتەپ-ليتسەيدە باق وكىلدەرىنە ارنالعان پرەسس-تۋر ۇيىمداستىرىلدى, - دەپ حابارلايدى Egemen.kz.
الداعى وقۋ جىلى قاشىقتان وقىتۋ فورماتىندا باستالاتىنى بەلگىلى. تەك باستاۋىش سىنىپتار ءۇشىن اتا-انالاردىڭ ءوتىنىشى نەگىزىندە "كەزەكشى سىنىپتار" جۇمىس ىستەيدى. قازىرگى تاڭدا ەلوردالىق مەكتەپتەر كەزەكشى سىنىپتار ءۇشىن وتىنىشتەر قابىلداۋدا. قالا بويىنشا باستاۋىش سىنىپتاردا 82 مىڭنان استام وقۋشى بولسا, ونىڭ 50% كەزەكشى سىنىپتا وقۋعا ءوتىنىش بىلدىرگەن. كەزەكشى سىنىپقا ءوتىنىش قابىلداۋ ءالى دە جالعاسۋدا. مەكتەپتەردە بالا سانى 15–تەن اسپايتىن كەزەكشى سىنىپتار قۇرىلادى.
شارا بارىسىندا مەكتەپ باسشىسى ساپۋرا تۋلەكوۆا جۋرناليستەرگە مەكتەپتىڭ سانيتارلىق قاعيدالارعا ساي جاساقتالعانىن كورسەتىپ, كەزەكشى سىنىپتاردىڭ قالاي جۇمىس ىستەيتىنىن ايتىپ ءوتتى.
"№76 مەكتەپ-ليتسەيدە 32 كەزەكشى سىنىپ قۇرىلدى. بۇل سىنىپتاردا بالا سانى 15 تەن اسپايدى. اپتاسىنا ءۇش كۇن وفلاين, قالعان ەكى كۇن قاشىقتان وقيدى. ساباقتىڭ ۇزاقتىعى 40 مين, كۇنىنە 3,4 ساباق وتەدى. ء“بىر سىنىپ - ءبىر مۇعالىم” قاعيداسى قاتاڭ ساقتالادى. ياعني, باستاۋىش سىنىپتار سىنىپ جەتەكشىسى وتەتىن پاندەردى مەكتەپتە وقىپ, قالعانىن ونلاين رەجيمدە وتەتىن بولادى. ءبىز ءۇشىن بالالاردىڭ جانە پەداگوگتارىمىزدىڭ دەنساۋلىعى بىرىنشى ورىندا, سول ءۇشىن سانيتارلىق شارالار قاتاڭ ساقتالادى. ءار سىنىپتىڭ ءۇزىلىس ۋاقىتتارى دا ءارتۇرلى.ء اربىر ەكىنشى ساباقتان كەيىن ىلعالدى جيناۋ, سىنىپ بولمەسىن جەلدەتۋ جۇرگىزىلەدى. ساباق اياقتالعاننان كەيىن سىنىپ بولمەسى كۆارتستالادى. مەكتەپ دەزينفەكتسيالىق تۋننەلمەن, كۆارتسپەن, تەپلوۆيزورمەن, ماسكامەن جانە دەزينفەكتسيالىق قۇرالدارمەن تولىق قامتاماسىز ەتىلدى", – دەپ اتاپ ءوتتى مەكتەپ باسشىسى.
ەلوردالىق بارلىق مەكتەپتەر كەزەكشى سىنىپتار ءۇشىن دەنساۋلىق ساقتاۋ مينيسترلىگى بەكىتكەن قاۋلىعا سايكەس بارلىق سانيتارلىق شارالاردى قاتاڭ ساقتاي وتىرىپ, (ديزينفەكتسيالىق تۋننەل, اراقاشىقتىق ساقتاۋ ءۇشىن ارناي بەلگىلەر, ديزينفەكتسيالىق زالالسىزداندىرعىش قۇرالدار ورناتۋ)جۇمىس ىستەيدى. بۇل رەتتە اتا-انالار دا كوروناۆيرۋستىق ينفەكتسيانى جۇقتىرۋ قاۋپىن بولدىرماۋ ءۇشىن بارلىق قاجەتتى شارالاردى قامتاماسىز ەتۋ قاجەت. (ماسكالار, قولعاپتار, قولدى زارارسىزداندىرۋعا ارنالعان جەكە انتيسەپتيك نەمەسە باكتەرياعا قارسى دىمقىل سۇزگىشتەر)