27-30 تامىز ارالىعىندا وزبەكستاننىڭ تاۋەلسىزدىك العانىنا 29 جىل تولۋىنا وراي اۋىر اتلەتيكادان ايتۋلى مەملەكەتتىڭ باس شاھارى – تاشكەنتتە حالىقارالىق ونلاين تۋرنير ۇيىمداستىرىلادى, دەپ حابارلايدى Egemen.kz.
الەمنىڭ بىرقاتار بەلدى زىلتەمىرشىلەرى قاتىساتىن جارىستا قازاقستاننىڭ قوس ورەنى باق سىنايدى. ولار – ءزۇلفيا چينشانلو مەن يبراگيم بەرسانوۆ. بۇل سپورتشىلاردىڭ ەكەۋىنىڭ دە ەسىمى جانكۇيەرلەرگە جاقسى تانىس. 55 كيلو سالماقتا ونەر كورسەتەتىن چينشانلونىڭ الەمنىڭ ءۇش دۇركىن چەمپيونى جانە ازيا ويىندارىنىڭ ەكى دۇركىن كۇمىس جۇلدەگەرى دەگەن اتاعى بار. 2012 جىلى ول لوندون وليمپياداسىندا التىننان القا تاعىنعان ەدى. الايدا دوپينگ داۋىنا بايلانىستى ءزۇلفيا عالامدىق دودانىڭ باس جۇلدەسىنەن ايىرىلدى. بەرسانوۆ – ەرلەردىڭ ازيا چەمپيوناتى مەن جاستار اراسىنداعى الەم بىرىنشىلىگىنىڭ جۇلدەگەرى. ول 109 كيلو سالماقتا كۇش سىناسادى.
– ارينە, جارىس جولىنا شىعىپ, سان مىڭ جانكۇيەردىڭ كوز الدىندا ونەر كورسەتكەنگە نە جەتسىن! بىراق كۇللى الەم جۇرتشىلىعىن ابىگەرگە سالعان كوروناۆيرۋستىڭ كەسىرىنەن ازىرگە ونداي مۇمكىندىك بولماي تۇر. سول سەبەپتى دە ونلاين تۋرنيرلەرگە قاتىسۋعا ءماجبۇرمىز. دەسەك تە ۇنەمى بابىڭدى بايقاپ, ءوز مۇمكىندىگىڭدى شامالاپ كورۋ ءۇشىن بۇل دا جامان ەمەس. ولاي بولسا, تاشكەنتتەگى تۋرنيردە قوس جەرلەسىمىز ەل سەنىمىن اقتايدى دەپ ويلايمىن, – دەيدى قازاقستان ۇلتتىق قۇراماسىنىڭ باس باپكەرى باقىت احمەتوۆ.