اقپارات جانە قوعامدىق دامۋ مينيسترلىگى جۋرناليستيكا ماماندىعىن يگەرىپ جاتقان ستۋدەنتتەردىڭ 1 كۋرستان باستاپ مەملەكەتتىك بۇقارالىق اقپارات قۇرالدارىندا (باق) وندىرىستىك تاجىريبەدەن وتۋىنە كومەكتەسۋگە دايىن, دەپ حابارلايدى Egemen.kz قازاقپاراتقا سىلتەمە جاساپ.
بۇل تۋرالى بۇگىن مەديا سالاسىنىڭ ماماندارىن دايىندايتىن جوعارى وقۋ ورىندارىنىڭ رەكتورلارىمەن كەزدەسكەن قر اقپارات جانە قوعامدىق دامۋ ءمينيسترى ايدا بالاەۆا ايتتى.
"شىنىمەن دە بۇگىن ەڭ وزەكتى, كوكەيتەستى ماسەلەلەردى ورتاعا سالىپ, ءوز ۇسىنىستارىڭىزدى ايتتىڭىزدار. ەڭ باستىسى بىزبەن تىعىز قارىم-قاتىناستا جۇمىس ىستەۋگە نيەتتەرىڭىزدى بىلدىردىڭىزدەر. ءبىز ونى قۋانا-قۋانا قابىلدايمىز. ويتكەنى, ءبىزدىڭ مينيسترلىك تەك قانا اقپارات سالاسىندا عانا ەمەس, جالپى قۇزىرەتى وتە كەڭ مەملەكەتتىك ورگان سانالادى. ونىڭ ىشىندە جاستار ساياساتى, رۋحاني جاڭعىرۋ باعدارلاماسىن جۇزەگە اسىرۋ ماسەلەلەرى, ءدىن, ەتنوساياسات ماسەلەلەرىنىڭ ءبارىن قامتىپ وتىرعان بىردەن-ءبىر مەملەكەتتىك ورگان. سوندىقتان وسى سالالاردىڭ بارلىعىندا وزدەرىڭىزبەن تىعىز قارىم-قاتىناستا بولۋعا جانە ارىپتەستىك ورناتۋعا دايىنبىز", دەدى كەزدەسۋدى قورىتىندىلاعان ايدا بالاەۆا.
سونىمەن قاتار مينيستر بۇگىنگى باس قوسۋدا تالقىلانعان جۋرناليستيكا تاقىرىبىنا توقتالدى.
"ارينە, جۋرناليستيكا - كۇردەلى ماماندىق, كۇردەلى عىلىم سالاسى. سوندىقتان ەلىمىزدەگى ءباسپاسوز جايلى ايتىلاتىن اڭگىمە دە, زەرتتەيتىن ماسەلە دە, جەتىلدىرەتىن تۇستار دا از ەمەس. ءباسپاسوزى مىقتى قوعامنىڭ مادەنيەتى مەن تالعامى دا, رۋحاني دەڭگەيى دە ازاماتتىق بەلسەندىلىگى دە جوعارى بولادى. وسى ورايدا, جوعارى وقۋ ورىندارىنىڭ مامانداردى دايىنداۋى ءبىلىم بەرۋ مازمۇنىمەن تىكەلەي بايلانىستى. ال جوعارى وقۋ ورىندارىنداعى وقۋدىڭ مازمۇندىق ساپاسىن جاڭعىرتۋ, ونى ۋاقىت تالابىنا ساي جەتىلدىرۋ ماسەلەسى وتە وزەكتى تاقىرىپ. بۇل ورايدا مينيسترلىك وقۋ ماتەريالدارىنىڭ ساپاسىن قاداعالاپ, قاجەت بولعان جاعدايدا ولاردىڭ مازمۇندىق جاعىن بىرگە سارالاپ, بىرگە ازىرلەۋ ءۇشىن ارىپتەستىك ورناتۋعا قاشاندا دايىن", دەدى مينيستر.
ونىڭ اتاپ وتۋىنشە, بۇل ءوز كەزەگىندە مينيسترلىك پەن جوعارى وقۋ ورىندارى اراسىنداعى ىنتىماقتاستىقتى نىعايتىپ, ستۋدەنتتەردىڭ ناقتى كاسىبي دەڭگەيىن كوتەرۋگە مۇمكىندىك بەرەدى.
"ديپلوم الىپ شىققان جاس جۋرناليستەرگە تاعىلاتىن سىننىڭ ءبىرى - ولاردىڭ پراكتيكالىق تۇرعىدا دايىن بولماۋى. ياعني, جوعارى وقۋ ورنىندا بەرىلەتىن تەوريالىق ءبىلىمنىڭ پراكتيكامەن جالعاسپاۋى. كوپ جاعدايدا جاس ماماندار پراكتيكانى جۇمىسقا تۇرعان سوڭ ۇيرەنۋگە ءماجبۇر. بۇل ورايدا ستۋدەنتتىك پراكتيكالىق داعدىلارىن دامىتۋ ءۇشىن اقپارات جانە قوعامدىق دامۋ مينيسترلىگى جۋرناليستيكا ماماندىعىن يگەرىپ جاتقان ستۋدەنتتەردىڭ 1-كۋرستان باستاپ مەملەكەتتىك باق-تاردا وندىرىستىك تاجىريبەدەن وتۋىنە كومەكتەسۋگە دايىن", دەدى ايدا بالاەۆا.