بۇگىن اقمولا وبلىسى بۇلاندى اۋدانى نوۆوبراتسك اۋىلدىق وكۋرگىنە قاراستى بۋدەننوۆكا اۋىلى ماڭىنان, ناقتىراق ايتقاندا ەلدى-مەكەندى جاناي اعىپ جاتقان ارشالى وزەنى بويىنان ءزىلدىڭ (مامونت) جىلىگى تابىلدى, - دەيدى ەگەمەننىڭ رەداكتسياسىنا حابارلاسقان اۋداندىق گازەتتىڭ قىزمەتكەرى, تالانتى اقىن جايناربەك زاندىباي ۇلى.
جادىگەردى ۆالەري ۆلاديميروۆيچ دەگەن اۋىل تۇرعىنى بالىق اۋلاپ ءجۇرىپ تاۋىپ العان. ياعني, ول وزەن جاعاسىنداعى قايراق قۇمدا كومىلىپ جاتقان سۇيەكتىڭ سۇلباسىن بايقاپ قالىپ, قىزىعۋشىلىعى ويانىپ قازىپ كورگەن. وتكەن تاريحتان ازدا بولسىن حابارى بار بالىقشى بۇل سۇيەكتىڭ تەگىن دۇنيە ەمەس ەكەنىن اڭدايدى دا, جاتقان ورنىنا بۇرىنعىداي قايدان ورنالاستىرىپ, كورگىن-بىلگەنىن اۋىل اكىمىنە كەلىپ باياندايدى.
ءمان-جايعا قانىققان اكىم دەرەۋ وبلىس-اۋدانعا حابارلاعان. ءسويتىپ, بۇگىن اقمولا وبلىستىق تاريحي مادەني مۇرانى قورعاۋ جانە پايدالانۋ ورتالىعىنىڭ وكىلى راۋان ەرجانوۆ باستاعان ادامدار جىلىكتى كورىپ, ولشەگەن ەكەن ۇزىندىعى –1,05 مەتر ەكەنى انىقتالىپتى. مامان ارحەولوگتار بۇل جىلىك ءزىلدىڭ سۇيەگى ەكەنى انىق دەيدى. جادىگەر وزەن جاعاسىنداعى قايراق قۇمدا جاتۋىنا قاراعاندا, كوكتەمگى تاسقاندا باسقا جاقتان قارعىن سۋمەن اعىپ كەلۋى دە مۇمكىن دەگەن بولجامدار ايتىلۋدا.
ءبىر قىزىعى وبلىس اۋماعىنان مۇنداي ءزىلدىڭ سۇيەكتەرى بۇرىندا بىرنەشە جەردەن تابىلعان. ولاردىڭ ءبارى قازىر وبلىستىق تاريحي-ولكەتانۋ مۋزەيىندە جەكە بولىمدە ساقتاۋلى تۇر. مىنا جىلىكتە بۇگىن مۋزەيگە جەتكىزىلىپ, ونداعى ءزىل سۇيەكتەرىنە قوسىلدى. «كەلەسى جىلى جادىگەر تابىلعان اۋماققا قازبا جۇمىسىن جۇرگىزەمىز» دەپتى وبلىستان كەلگەن وكىلدەر.