سەناتور عالىمدارمەن عىلىمدى دامىتۋ ماسەلەلەرىن تالقىلادى

ششۋچينسك قالاسىنىڭ سولتۇستىك بولىگىندە وسى اتتاس كولدىڭ جاعاسىندا ورنالاسقان عىلىمي ورتالىقتىڭ قىزمەتىمەن تانىسۋ بارىسىندا سەناتور ەۋروپادان, سىبىردەن, سولتۇستىك امەريكادان, قيىر شىعىستان, جاپونيادان, قىتايدان, كورەيادان, ورتا ازيادان وسىمدىكتەردىڭ 600-دەن استام ءتۇرى ۇسىنىلعان ينترودۋتسەنتتەر توپتامالارىنىڭ ارالۋاندىعىنا نازار اۋداردى.

دەندرولوگيالىق پاركتىڭ قىزمەتى مەن نەگىزگى مىندەتتەرى تۋرالى باقىتجان جۇماعۇلوۆقا ا.ن.بوكەيحاننىڭ اتىنداعى قازقسعزي باس ديرەكتورى ءالىمجان راحىمجانوۆ پەن سەلەكتسيا ءبولىمىنىڭ مەڭگەرۋشىسى يانا كرەكوۆا ايتىپ بەردى

ينستيتۋت ورمان فلوراسىن ساقتاۋمەن جانە كوبەيتۋمەن, ورمان ەكپەلەرىن ادام ومىرىندە پايدالانۋدىڭ جاڭا مۇمكىندىكتەرىن قامتاماسىز ەتۋمەن اينالىسادى. عالىمداردىڭ زەرتتەۋلەرى ەكولوگيالىق اپات ايماقتارىن, اگروورمانمەليوراتيۆتىك جانە كوگالداندىرۋ ەكپەلەرىن قوسا العاندا, قازاقستاننىڭ ورمان قورىن زەرتتەۋگە باعىتتالعان.

عالىمداردىڭ ايتۋىنشا, دەندرولوگيالىق ساياباقتا ۇسىنىلعان وسىمدىكتەردىڭ ەڭ قۇندى قورلارى عىلىمي زەرتتەۋلەر, ەكسپوزيتسيالار قۇرۋ جانە بيوالۋانتۇرلىلىكتى ساقتاۋ الاڭى عانا ەمەس, سونىمەن قاتار ورمان شارۋاشىلىعىندا, كوگالداندىرۋدا جانە باسقا دا سالالاردا قولدانىلاتىن تەحنيكالىق, تاعامدىق, دارىلىك جانە ساندىك وسىمدىكتەردىڭ اسسورتيمەنتىن بايىتۋدىڭ ماڭىزدى كوزى بولىپ ەسەپتەلەدى.

سەناتور ساپار بارىسىندا ورمان شارۋاشىلىعى جانە اگروورمانمەليوراتسيا سالاسىندا زەرتتەۋلەر جۇرگىزۋ; ورمان شارۋاشىلىعىن جۇرگىزۋدىڭ عىلىمي نەگىزدەرىن ازىرلەۋ; عىلىمي كادرلار دايارلاۋ; يننوۆاتسيالىق تەحنولوگيالاردى عىلىمي قامتاماسىز ەتۋ جانە ولاردى وندىرىسكە ەنگىزۋ سياقتى باعىتتاردا مامانداناتىن «ۇلتتىق اگرارلىق عىلىمي-ءبىلىم بەرۋ ورتالىعى» كەاق قۇرامىنا كىرەتىن عىلىمي-زەرتتەۋ ينستيتۋتىنىڭ قىزمەتىنە قاتىستى ماسەلەلەردى تالقىلادى.

سەناتور كەزدەسۋدە ەلوردا اينالاسىن جانە ەلىمىزدىڭ ىرى قالالارىن كوگالداندىرۋ, ورمان عىلىمىن دامىتۋ, عزي نىساندارىنىڭ ينفراقۇرىلىمىن جاڭعىرتۋ, قازاقستاندا تۋىندايتىن ەكولوگيالىق پروبلەمالاردى شەشۋدەگى عالىمداردىڭ رولى ماسەلەلەرىن كوتەردى.