اباي وبلىسىندا اليمەنت ءوندىرۋ ماسەلەسىنە قاتىستى جەدەل-پروفيلاكتيكالىق ءىس-شارالار ءجۇرىپ جاتىر. تەكسەرۋ بارىسىندا اليمەنت بويىنشا بەرەشەگى بار ازاماتتار انىقتالعان. قارىز كولەمى بىرنەشە مىڭ تەڭگەدەن باستاپ, قوماقتى قاراجاتقا دەيىن جەتكەن جاعدايلار كەزدەسەدى, دەپ جازادى Egemen.kz.
بالانىڭ نەسىبەسىنە سالعىرت قاراۋ – تەك وتباسىنىڭ ەمەس, قوعام ءۇشىن دە ماڭىزدى جايت ەكەنى راس. وسى ماسەلەنىڭ ءمان-جايىن ناقتىلاۋ ءۇشىن اباي وبلىسى جەكە سوت ورىنداۋشىلارىنىڭ وڭىرلىك پالاتاسىنىڭ باسشىسى ماعجان ەسەنباەۆقا ساۋال جولداعان ەدىك. ونىڭ ايتۋىنشا, اليمەنت ءوندىرۋ ءتارتىبى كۇشەيگەن. ماسەلەن, اليمەنتكە بايلانىستى سوت بۇيرىعى نەمەسە اتقارۋشىلىق قۇجات بورىشكەردىڭ تۇرعىلىقتى جەرى نە جۇمىس ورنى بويىنشا جەكە سوت ورىنداۋشىسىنا بەرىلەدى. سودان كەيىن ءوندىرىپ الۋ جۇمىسى باستالادى.
«ەگەر بورىشكەر رەسمي جۇمىس ىستەمەسە, بەرەشەك ەلدەگى ورتاشا ايلىق جالاقى مولشەرىنە سۇيەنىپ ەسەپتەلەدى. بۇل نورما اليمەنت تولەۋدەن جالتارۋدىڭ الدىن الۋعا باعىتتالعان. بەرەشەگى بار ازاماتتاردىڭ بانكتىك شوتتارى بۇعاتتالىپ, مۇلكىنە تىيىم سالىنادى. ەلدەن شىعۋىنا ۋاقىتشا شەكتەۋ قويىلادى. سونداي-اق كولىك قۇرالىن باسقارۋ قۇقىعى شەكتەلەدى», دەدى ماعجان ەسەنباەۆ.
14 مىڭ بورىشكەر اليمەنت تولەۋدەن قاشىپ ءجۇر
وڭىرلىك پالاتانىڭ دەرەگىنشە, بورىشكەرلەرگە قاتىستى ماجبۇرلەۋ ءىس-شارالارى كەزەڭ-كەزەڭىمەن قولدانىلادى. سوت ورىنداۋشىسىنىڭ تالاپتارىن ورىنداماعان تۇلعا اكىمشىلىك جاۋاپكەرشىلىككە تارتىلادى. ايىپپۇل سالىنادى, قوعامدىق جۇمىسقا جىبەرىلەدى نەمەسە اكىمشىلىك قاماۋعا الىنادى.
ال اليمەنت تولەۋدەن قاساقانا ءارى ۇزاق ۋاقىت جالتارعاندار قىلمىستىق جاۋاپكەرشىلىككە تارتىلادى. مۇنداي جاعدايدا ايىپپۇل سالۋ, تۇزەۋ جۇمىستارىنا تارتۋ, بوستاندىعىن شەكتەۋ نەمەسە باس بوستاندىعىنان ايىرۋ جازالارى قاراستىرىلعان. بۇعان قوسا, ەلدەن شىعۋعا تىيىم سالۋ, كولىك جۇرگىزۋ قۇقىعىن شەكتەۋ جانە مۇلكىن تاركىلەۋ شارالارى قاتار جۇرەدى.
تاراپتار وزدەرىنە بەكىتىلگەن جەكە سوت ورىنداۋشىسى تۋرالى مالىمەتتى بىرنەشە جولمەن الا الادى. ADILETGOV ءموبيلدى قوسىمشاسى ارقىلى, ادىلەت مينيسترلىگىنىڭ رەسمي سايتىنداعى تىزىلىمنەن نەمەسە تۇرعىلىقتى جەرى بويىنشا وڭىرلىك جەكە سوت ورىنداۋشىلارى پالاتاسىنا جۇگىنۋ ارقىلى اقپاراتقا قول جەتكىزۋگە بولادى. وڭىرلىك پالاتا وكىلدەرى اليمەنت ءوندىرۋ جۇمىستارى الداعى ۋاقىتتا دا جالعاساتىنىن جەتكىزدى.
استانادا جەكە سوت ورىنداۋشى اليمەنت تولەمەگەن اكەدەن 196 ملن تەڭگە ءوندىرىپ الدى